Loga e fakatufono he lalolagi katoa ne poaki ke fakavehā e tau tagata ti nakai fakaatā ke fakapotopoto auloa. Eketaha e Tau Fakamoli a Iehova ke omaoma ke he tau fakatufono mo e matutaki agaia ke taute e tau tapuakiaga he puhala haohao mitaki. Ke taute pihia, kua fakaaoga he tau fakapotopotoaga e tau videoconferencing app tuga e Zoom ke fakahoko e tau feleveiaaga.

Ke moua tumau mo e puipui fakamitaki e fakaholoaga ma e tau feleveiaaga ha tautolu, ne fakaatā he Kau Fakatufono ke fakaaoga e tau mena fakaalofa ne foaki ke fakatau aki e tau Zoom account ma e tau fakapotopotoaga. Lagomatai lahi mahaki e mena nei ke he falu fakapotopotoaga ne nakai maeke ke totogi e videoconference ia ne $15-$20 po ke lahi atu. Ko e tau fakapotopotoaga nei ne fakaaoga fakamua e tau app ne nakai fai totogi ka e fakakaupā ni e numera he tau tagata ke matutaki ki ai mo e nakai fai puipuiaga mitaki. Kua maeke e tau fakapotopotoaga oti ne fakaaoga e tau Zoom account he fakatokatokaaga ke matutaki ki ai mo e tokologa e tagata ka fakaaoga he tau feleveiaaga takitaha. Ke hoko mai ke he mogonei, molea e 65,000 e fakapotopotoaga he kavi ke he 170 e motu hane fakaaoga e tau fakaholoaga nei.

Ko e Fakapotopotoaga Kairagi i Manado, North Sulawesi, Indonesia, ne hiki mai he videoconference app ne nakai totogi ke fakaaoga e puhala Zoom he fakatokatokaaga. Fakamaama he matakainaga ko Hadi Santoso: “Ko e tau matakainaga ne nakai iloa mitaki he magaaho fakamua ke fakaaoga e tau koloa hila kua moua mitaki mogonei e tau feleveiaaga ha kua nakai tafeliuaki ke matutaki atu ke he taha e feleveiaaga.”

Ko Lester Jijón, Jr., ko e motua he Fakapotopotoaga Guayacanes Oeste i Guayaquil, Ecuador, ne talahau: “Ha ko e tuaga fakatupe he tau matakainaga tokologa, ne nakai maeke falu fakapotopotoaga ke totogi e laisini he Zoom ke fakaatā e fakapotopotoaga katoa ke fakalataha ke he tau feleveiaaga. Mogonei, kua tokologa ne maeke ke matutaki ke he Zoom ti atāina ke uiina e falu ke he tau feleveiaaga mo e nakai tupetupe neke tokologa lahi ka matutaki.”

Ko Johnson Mwanza, ko e motua he Fakapotopotoaga Ngwerere North i Lusaka, Zambia, ne tohi: “Tokologa e matakainaga ne talahau tumau, ‘ko e fakaholoaga he Zoom he fakatokatokaaga kua fakatata lahi a mautolu ke he tau matakainaga mo e logona hifo e fakaalofa mo e levekiaga ha Iehova ki a mautolu.’”

Ko e tau account nei he fakatokatokaaga ne totogi aki e tau tupe ne fatifati ma e foakiaga lagomatai ke he tau matematekelea. Ko e tau tupe nei ne lalago he tau foakiaga fakaalofa he lalolagi katoa. Loga he tau foakiaga nei ne tuku ai puhala he donate.isa4310.com. Fakaaue ke he ha mutolu a tau foakiaga fakamokoi ne lagomatai foki ke he falu gahua ha ko e matematekelea he lalolagi katoa.​—2 Korinito 8:14.