Akin tiiteixpantijkauan Jehová kuajli tikitaj tlen temachtia Biblia niman ijkon tiktlapejpeniskej tla tomachtiskej ipan escuelas noso ka. Tlen yotiuelkej ipan Biblia techpaleuiya matikmatikan tlenon tikchiuaskej. Ipan yejuin tlamachtijli, tikitaskej seki tlen kijtoua Biblia. a

•  Melak tepaleuij tla timomachtia ipan escuela

•  Matikitakan tlamachtijli tlen tikseliaj ipan escuela ken noneki

•  ¿Tlenon uelis panos tla yakaj kineki nomachtis ipan universidad?

•  ¿Iteixpantijkauan Jehová kinpiyaj inescuelas kampa nomachtiaj kokonej?

 Tla timomachtia ipan escuela melak mitspaleuis pampa miyek tikmatis niman tikasikamatis, niman Biblia kijtoua ika melak kuajli tla titlamachilisejkej (Proverbios 2:10, 11; 3:21, 22). Biblia noijki kijtoua ika Jesús okiminauati inomachtijkauan makinmachtikan oksekimej tlen yejua yokinmachtijka (Mateo 28:19, 20, TNM). Ika yejon, tikinyolchikauaj nochimej iteixpantijkauan Jehová manomachtikan niman ijkon mauelikan tlaamapouaskej, tlajkuiloskej niman makimatikan kenon tenotsaskej. b Niman noijki ijkuak nomachtiaj kinpaleuiya makimixmatikan okseki religiones niman noijki okseki kalpamej (1 Corintios 9:20-22; 1 Timoteo 4:13).

 Tekiuajkej tlanauatiaj ika nochimej kokonej manomachtikan primaria niman secundaria pampa kimatij ika escuela melak tepaleuij. Niman tejuamej tiktlakamatij yejon tlanauatijli pampa Biblia techijlia: “Nochi tlakatl ma tetlakamati intech on tekiuajkej” (Romanos 13:1). Niman noijki, akin tiiteixpantijkauan Jehová tikinyolchikauaj tokoneuan kuajli manomachtikan ipan escuela. c Ijkon ken kijtoua Biblia: “San tlinon yejuan nenkichiuaskej, xchiuakan ikan kuajli nemoyojlo ken nenkichiuaskiaj para toTEKO niman xpara on tlakamej” (Colosenses 3:23).

 Tla tomachtiaj ipan escuela techpaleuis matiktlajpiyakan tofamilia. Biblia kijtoua: “Tla yakaj xkintekipanoua on yejuan ken kinta, niman más on yejuan ifamilia, tla ijkon tej, xkichiua tlen technauatia totlaneltok, niman kichiua más xkuajli xken on yejuan xtlaneltoka” (1 Timoteo 5:8). Tlen temachtiaj ipan escuela uelis techpaleuis matiktlakamatikan yejuin tlanauatijli. The World Book Encyclopedia kijtoua ika tlen temachtiaj ipan escuelas, kinpaleuiya akin nomachtiaj más kuajli makichiuakan tekitl tlen kinnauatiaj. Noijki, yonoitak ika akin nomachtiaj ipan escuela niman kuajli kichiuaj intekiyo más totoka kinextia se tekitl tlen kinpaleuiya kuajli makitlajpiyakan infamilia, xijkon ken akin xnomachtiayaj (Proverbios 22:29).

 Para tajtin kintlajpiyaskej inkoneuan, noneki kuajli kimiskaltiskej niman ijkon ijkuak yonoskaltijkej kichiuaskej tlen kuajli. Tlen temachtiaj ipan escuela noijki uelis kinpaleuis tajtin kuajli makimiskaltikan inkoneuan (2 Corintios 12:14). Niman noijki, tikinyolchikauaj tajtin makintitlanikan inkoneuan ipan escuela maski tla kampa chantij notlaxtlauaj noso uejka nokauaj escuelas noso maski tla oksekimej akin ompa chanejkej xkintitlanij inkoneuan ipan escuela. d Noijki tikimititiaj tajtin kenon uelis kinpaleuiskej inkoneuan ipan inescuela. e

 Kuajli tikitaj kanon niman tlenon tomachtiskej. Biblia kijtoua: “On tlakatl yejuan tonto nochi kineltoka tlen kijliaj, pero on tlakatl yejuan tlamatki achtoj kinemilia tlinon kichiuas” (Proverbios 14:15). Tejuamej tiktlakamatij yejuin tlanauatijli ijkuak kuajli tikitaj kanon noso tlenon tomachtiskej tla yotitlankej secundaria. Noijki tikitaj kech tomin tikpopoloskej niman tlenon ika techpaleuis on tlen tiknekij tomachtiskej. Kemantika sekimej kuelita san nomachtiskej seki cursos pampa yejon xmás uejkauij.

 Más kuajli tla tomachtiaj Biblia xijkon ken tomachtiskej ipan escuelas. Ipan escuelas xtemachtiaj itech toTajtsin, san ika, tlen temachtia Biblia uelis techpaleuis matikixmatikan toTajtsin. Niman tla tejuamej tikixmatij, techpaleuis matikpiyakan se nemilistli tlen xkeman tlamis (Juan 17:3). Biblia noijki temachtia ika noneki tikchiuaskej tlen kuajli niman ika noneki tichipaujkanemiskej (Proverbios 2:9). Apóstol Pablo melak onomachti, onomachti ipan uejueyi escuelas kentla tla nomachtiskia ipan tlen aman tikimixmatij ken universidades. San ika, maski ijkon, yejua okijto ika “más ueyi kijtosneki” nochi tlen youelka itech Cristo (Filipenses 3:8; Hechos 22:3). Ijkon ken apóstol Pablo, miyekej iteixpantijkauan Jehová akin onomachtijkej ipan universidad, yokitakej ika más tepaleui tlen Biblia temachtia. f

 Biblia kijtoua: “Sen tlakatl yejuan nonemilia ijkuak kita itlaj xkuajli nochiua, nejkuania” (Proverbios 22:3). Akin tiiteixpantijkauan Jehová tiknemiliaj ika tlen nochiua ipan seki universidades noso ipan seki escuelas uelis kichiuas ika telpokamej makichiuakan tlen xkuajli niman noijki uelis kimijtlakouilis intlaneltok. Ika yejon, sekimej tajtin kinemiliaj ika más kuajli yes tla xkintitlanij inkoneuan ipan universidad. Ijkon kichiuaj pampa kinemiliaj ika ipan yejon escuelas kichiuaj ika sekimej makineltokakan itlaj tlen xmelauak, ken yejuin:

•   Tla tikpiya tomin kuajli tinemis niman tipakis

   Miyekej kijtouaj ika tla timomachtia ipan universidad uelis tiknextis se kuajli tekitl kampa miyek tiktlanis. Miyekej telpokamej ijkon tlanemiliaj, ika yejon, nomachtiaj ipan universidad. Sekimej kinemiliaj ika tla kipiyaj miyek tomin uelis yolpakiskej niman xtlaj kinpolos, san ika, Biblia kijtoua ika yejon xmelauak (Eclesiastés 5:10). Noijki, Biblia kijtoua ika “ijkuak se sanoyej kixtlajsojtla tomin, ompa peua nochi tlajtlamach tlen xkuajli” niman ipampa yejuin miyekej kitlalkauiyaj toTajtsin (1 Timoteo 6:10). Yejua ika, akin tiiteixpantijkauan Jehová melak tokojtiliaj niman ijkon xmelak tiktlasojtlaskej tomin (Mateo 13:22).

•   Tla timomachtia ipan universidad melak mitstlakaitaskej

   Nika Gilauri, se tlakatl akin okipix se ueyi tekitl ne Georgia, okijto tlenon kinemiliaj miyekej ipan ipaís: “Nikan Georgia miyekej kinemiliaj ika nochimej noneki nomachtiskej universidad pampa san ijkon uelis kintlakaitaskej”. Niman noijki okijto ika yeuejkaui melak tepinajti katka tla se tekoneuj xnomachtiaya ipan universidad. g San ika, Biblia kijtoua ika xnoneki tiktejtemoskej ika oksekimej matechueyikaitakan. Jesús ijkin okimijli sekimej tlayekankej ipan religiones akin kinekiyaj makinueyikaitakan: “¿Kenijki tej, uelis nennechneltokaskej tla sano nemejuamej nenkimoseliliaj on ueyiteneualistli [...]?” (Juan 5:44). Tla se nomachtia universidad kanaj ueliskia peuas noueyimatis, san ika, toTajtsin xkuelita yejuin (Proverbios 6:16, 17; 1 Pedro 5:5).

•   San tejua uelis tikijtos tlenon kuajli niman tlenon xkuajli

   Akin tiiteixpantijkauan Jehová tokauiliaj toTajtsin matechijli tlenon kuajli niman tlenon xkuajli (Isaías 5:20). San ika, ijkon ken onoijto ipan se revista, miyekej akin yauej universidad peuaj kichiuaj tlen xkuajli pampa kinchiualtiaj maka sa matlanemilikan ijkon ken tlanemiliayaj. h Niman yejon tlen kijtoua Biblia: “Yejuan iminuan nouika on yejuan xkuajli nouikaj, kijtlakouiliaj ikuajli nemilis” (1 Corintios 15:33). Ipan universidad nochiua tlen toTajtsin xkuelita, miyekej tlauanij, kinkuij drogas noso temachtiaj ika xtlaj panoua tla se noteka iuan yakaj maski xnonamiktiaj (1 Corintios 6:9, 10; 2 Corintios 7:1).

•   Tla timomachtia ipan universidad uelis titlapaleuis kuajli matinemikan niman maka sa manochiua tlen xkuajli

   Miyekej akin nomachtiaj ipan universidad xkichiuaj san pampa kinekij melak notomintiskej, makintlakaitakan noso para xtlaj kinpolos. Miyekej melak nomachtiaj pampa kinekij kichiuaskej tlen kuajli niman tlapaleuiskej maka sa manochiua tlen xkuajli ipan tlaltikpaktli. Melak kuajli akin ijkon tlanemiliaj, san ika, akin tiiteixpantijkauan Jehová xijkon titlanemiliaj pampa ijkon ken Jesús, tejuamej tikneltokaj ika san iTekiuajyo toTajtsin uelis kichiuas maka sa manochiua tlen xkuajli ipan tlaltikpaktli (Mateo 6:9, 10). San ika, yejon xkijtosneki ika san tikchiatokej matlayektlali iTekiuajyo toTajtsin ipan tlaltikpaktli niman ika xtlaj tikchiuaj. Yej tikchiuaj ijkon ken okichiuj Jesús, chikauak titenojnotsaj itech tlen kualtsin kichiuas iTekiuajyo toTajtsin ipan nochi tlaltikpaktli niman melak miyekej tikinpaleuiyaj más kuajli manemikan (Mateo 24:14). i