¿Tleka titlajyouiyaj, tiueuentsintiaj niman timikij?
ToTajtsin melak techtlasojtla, ika yejon, xkineki matitlajyouikan. Kuakon, ¿tleka titlajyouiyaj?
Ipampa kachtopa tlakatl niman kachtopa siuatl
“On achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej” (ROMANOS 5:12).
Ijkuak toTajtsin okinchijchiuj Adán niman Eva, intlamachilis niman intlalnakayo xkipiaya tlajtlakojli. Niman okintlali ipan se xochitlalpan tlen itoka katka jardín de Edén. Noijki, okimijli ika ueliskiaj kikuaskiaj nochi tlakilyomej, san ika, okimijli ika onkatka se tlakilyotl tlen xnonekiya kikuaskej. Maski ijkon, Adán niman Eva okikuajkej yejon tlakilyotl, niman ijkon otlajtlakojkej (Génesis 2:15-17; 3:1-19). Pampa Adán niman Eva xotetlakamatkej, toTajtsin okinkixti itech yejon xochitlalpan. Desde ijkuakon, yejuamej opeuj melak tlajyouiyaj. Sakin okinpixkej inkoneuan, niman yejuamej noijki otlajyouijkej. Nochimej oueuentsintiakej niman omijkej (Génesis 3:23; 5:5). Kuakon, pampa tiikoneuan Adán niman Eva tinochimej tikualoj, tiueuentsintiaj niman timikij.
Ipampa xkuajkualtin espíritus
“On diablo ipan ima kimpiya nochimej on tlakamej de in tlaltikpaktli” (1 JUAN 5:19).
Diablo noso Satanás, katka se ángel akin xokitlakamat toTajtsin (Juan 8:44; Apocalipsis 12:9). Sakin, okseki ángeles okipaleuijkej Satanás, niman onokuepkej xkuajkualtin espíritus noso demonios. Yejuin xkuajkualtin espíritus kinkajkayauaj tlaltikpakchanejkej niman ijkon makitlalkauikan toTajtsin. Noijki, kichiuaj ika tlaltikpakchanejkej makinekikan kichiuaskej tlen xkuajli (Salmo 106:35-38; 1 Timoteo 4:1). Satanás niman idemonios melak kuelitaj matitlajyouikan.
Ipampa tlen xkuajli tiktlapejpeniaj tikchiuaskej
“Tlen kitokas sen tlakatl, sano yejua kipixkas” (GÁLATAS 6:7).
Kemantika titlajyouiyaj pampa titlajtlakolejkej niman ipampa tlen kichiua Satanás. San ika, kemantika san no tejuamej totlajyouiltiaj ipampa tlen xkuajli tikchiuaj. Ijkuak tiktlapejpeniaj tikchiuaskej tlen kuajli, kuajli tonkisaj, niman ijkuak tiktlapejpeniaj tikchiuaskej tlen xkuajli, titlajyouiyaj. Xnemili yejuin, se tajtli akin xtekajkayaua, chikauak tekiti niman kitlasojtla ifamilia, kichiuas ika ifamilia mayolpaki. San ika, tla nauiltia ika tomin, tlauani noso xkineki tekitis, kichiuas ika ifamilia matlajyoui. Ika yejon, melak kuajli tla tiktlakamatij toTajtsin, pampa yejua kineki matiyolpakikan niman matikpiyakan “yolseuilistli” (Salmo 119:165).
Pampa itlapopoliuis
“Ijkuak nisiu tlatlalpoliuis [noso tlapopoliuis] [...] tlakamej ijkin nouikaskej: sanoyej notlajsojtlaskej sano yejuamej, sanoyej tominnekiskej [...], xkintlakamatiskej intajuan [...], xkiteltiskej iminxkuajlieleuilis, sanoyej xipanteitaskej niman xitlaj kuelitaskej tlen kuajli” (2 TIMOTEO 3:1-5).
Ipan yejuin tonaltin miyekej kichiuaj ijkon ken kijtoua yejuin texto, yejon techititia ika itlapopoliuis. Biblia noijki yokijtojka ika ipan yejuin tonaltin oniaskiaj guerras, miyekan tlaloliniskia, miyekej xkipiyaskiaj tlen kikuaskiaj niman kualoskiaj (Mateo 24:3, 7, 8; Lucas 21:10, 11). Ipampa yejon, miyekej tlajyouiyaj niman mikij.
