Naamwi muupuwelaka wi munniilipixerya okhalano othela ni echoko yoohakalala, ichu soohiwehererya inanwerya wookacamihaani okhapelela ohakalala wanyu. (Eklesiyaste 9:11) Moosivela, Muluku onnanivaha nikhaviheryo vaavaa nnakumanahuno makacamiho. Wakhala wi moopharihela malakiheryo a Soorempwa anacharela, nyuwaano ni echoko anyu munanwerya ovilela makacamiho, naamwi etempe.

TIHEENI PIIPILIYA ONALOCEIYE: “Oriha wa yowo wipa murima wanyu wothene, ntakhara Yowo tanothokororyiyeni nyuwo.” (1 Petro 5:7) Ikwaha soothene muupuwelele wi Muluku haanono nthowa wa makacamiho anyu. (Yakopo 1:13) Vaavaa munamwaacamelaanyu, owo onahaala wookhaviheryaani mmukhalelo onaweryeya. (Yesaya 41:10) “Minelani mirimányu va mithoni vawe.”—Salmo 62:8

Nyuwaano munahaala ophwanya olipiheya vaavaa munamwaalakhanyaanyu ni omuhuserya Piipiliya anyu mahiku oothene. Ntoko yookhumelela, nyuwaano munahaala olawiha mukhalelo Yehova onakhaleiye “ónihakararya hiyo mu ohóshiwa wahu wothene.” (2 Akorinto 1:3, 4; Aroma 15:4) Owo onnalaiherya woovahaani “murechele wa Muluku wopwaha osuwelasha wothene.”—Afilipi 4:6, 7, 13.

TIHEENI MUNAPHWANELAANYU WEERA:

• Mvekele wa Yehova wi ookhaviheryeni okhala oomaaleleya ni wuupuwela phaama.

• Mwaalikhele soothanla sanyu soothene nave muthanle yaphaama wa nyuwaano.

TIHEENI PIIPILIYA ONALOCEIYE: “Mutxhu a miruku, onasya osuwela; ori òsuwela, onanvira ahuseryaka.” (Masiposipo 18:15, BNM.) Musuwele saweereya soothene. Mwaavye osuwela soothowa sa muchu ti muchu a echoko anyu. Muloce ni yaawo. Mwaawiriyane yaawo.—Masiposipo 20:5.

Hanka wakhala wi ookhwa osiveliwa? Muhoove wooniha othanana wanyu. Muupuwele wi naamwi “Yesu áhinla.” (Yohane 11:35; Eklesiyaste 3:4) Wiichuuwa phaama ni okona ti woochuneya tho. (Eklesiyaste 4:6) Ela enahaala okhaviherya ovilela othanana.

TIHEENI MUNAPHWANELAANYU WEERA:

• Ehakumve okhumelela epahu, mpake yookhovelela oloca ni echoko anyu. Vaavaa anakhumelelaaya makacamiho, awo anahaala olipiheya oloca ni nyuwaano.

• Muloce ni akina yaawo yaakumanne ni nikacamiho nimohamoha.

TIHEENI PIIPILIYA ONALOCEIYE: “Nthamwene onamukhwela nthamwen’awe mahiku othene, onnakhala munnawe, elukuluku y’epahu.” (Masiposipo 17:17, BNM.) Asinthamwene anyu annachuna wookhaviheryaani, nyenya awo hanasuwela echu yaweera. Muhoove waaleela yeeyo munachunaanyu chiryene. (Masiposipo 12:25) Navetho, mwaavye nikhaviheryo noomunepani wa yaale anamwiiwexexa Piipiliya. Soohoolela awo anahaalaaya woovahaani orweela mu Piipiliya inamookhaviheryaani.—Yakopo 5:14.

Nyuwaano munahaala ophwanya nikhaviheryo munachunaanyu mwatitelela othukumana ni achu yaawo anamuroromela Muluku ni soolaiherya sawe. Munahaala tho olipiheya vancipale vaavaa munaakhaviheryaanyu akina anachuna olipihiwa. Muuke nroromelo nanyu wa Yehova ni soolaiherya sawe. Mukhale ooweiwa ni waakhaviherya achu akina oothoiwa, nave muhiivale mukhatinyu wa yaale anoosivelaani ni anoopwachaani.—Masiposipo 18:1; 1 Akorinto 15:58.

TIHEENI MUNAPHWANELAANYU WEERA:

• Muloce ni nthamwene avamurimani nave mweemererye wi ookhaviheryeni.

• Mukhale ookwakwaleya ni eeparipari vooloca sa soochuna sanyu.