DU NA KPENGBA LƐ!
Gbingɔ ndo ti bo kpengbani nvɛ̃ni na ndo lɛ gigi—Tɛnɛ mɛ Ngbangɔ tɛnɛ nɛ?
Na ya nzɛ ti Mbalambala bulu ti 2022 ko, gbingɔ ama mbalasi kpengbani na ndo lɛ gigi zu:
“Bo na ya nzɛ olo, agbia ti Chine apa hɛ̃ azi fãni sɛ ya, gbingɔ na dungɔ kpengbani nvɛ̃ni na ya akɔdɔrɔ ɔngɔ 70.”—25/07/2022, CNN Wire Service.
“Na lo mɛ ya, gbingɔ ndo du kpengbani nvɛ̃ni ka Europe ko, wá ndo ti ya akɔdɔrɔ gba.”—17/07/2022, The Guardian.
“Na lá yenga, gbingɔ ati mbalasi kpengbani na ya akɔdɔrɔ ti État-unis na ndenge mɛ aɔ ti uzu, wa ka Sud ti Midwest ko, gbingɔ ti kpengbani aya na ndenge ti siɔ̃ni nvɛ̃ni.”—24/07/2022, The New York Times.
Akpale niko zu afa nɛ? Na gwengɔ gbanda ngbĩi ta kɔdɛ ti dungɔ ge lɛ sese na dungɔ da ma? Tɛnɛ mɛ Ngbangɔ tɛnɛ nɛ?
Ngbangɔ piandó tɛnɛ tɛnɛ na lo ti aye ti ngaso?
Ĩi. Gbingɔ mɛ ndo mu ndo ge lɛ sese amangbi na tɛnɛ mɛndó Ngbangɔ pia tɛnɛ na lo ti ngoi tɛ e. Na ndakisa, Yezo tɛnɛndó ya, ‘asiɔ aye’ bere ‘aye ti kpɛ̃nɛ mɛ ando hɛ̃ mbɛtɔ’ na singɔ gbanda. (Luka 21:11) Se mɛ gbingɔ ndo ma bo mangɔ na ndo lɛ sese ndo hɛ̃ azi gba mbɛtɔ, ala ndo hũ ya, aye mɛ azi ndo li, na lingɔ ya, ta kɔdɛ ti dungɔ ge lɛ sese adu da ma.
Sese na gbɛ̃ngɔ gbanda nvɛ̃ni, wa ta kɔdɛ ti dungɔ da na dungɔ da ma?
Ipɔ. Nzapa lindó sese ya, azi du da bwai na bwai. (Nzembo 115:16; Mosakoli 1:4) Ta lo na ziangɔ ya, azi gbɛ̃ sese bwai na bwai ma, lo ko kapa ya, ni na ‘gbɛ̃ngɔ azi mɛ ndo gbɛ̃ lɛ sese.’—Suma 11:18.
Zia e ba aprɔfesi sɛ mɛ akambisa aye mɛ Nzapa ko kapa ti lingɔ na lo ti lɛ sese:
“Bɛ nyama ná ndo mɛ ngu ahulɛ da zu na dungɔ na dengɔ bɛ gba nvɛ̃ni, wa kpɛngbɛlɛ [ndo kpakpa] mɛ ka bɛ nyama na dungɔ na dengɔ bɛ wa ni na singɔ afɛlɛlɛ gba nvɛ̃ni.” (Yisaya 35:1) Ta Nzapa na ziangɔ ya, lɛ sese agbɛ̃ wa ati nga ma bɛ nyama ma, kanda lo na lɛkɛngɔ ando ti lɛ sese mɛ agbɛ̃.
“Mɔ kpã lɛ mɔ na ndo sese, mɔ ndo li ya ni dũ alé tɛ mawoma, wa adu nga ndo ti nzɔ̃ni nvɛ̃ni.” (Nzembo 65:9) Na lége ti nzɔ̃ sulu tɛ Nzapa, lɛ sese na diringɔ paradizo.
Ti nɛngɔ ya, mɔ hĩnga se mɛ gbingɔ mɛ ndo ma na ndo lɛ gigi zu ando li ya, aprɔfesi ti ya Ngbangɔ ati na seni ko, di tɛnɛ mɛ: “Les changements climatiques et notre avenir: qu’en dit la Bible?”
Ti nɛngɔ ya, mɔ hĩnga akpale gba ti aprɔfesi mɛ aba se mɛ Nzapa na lɛkɛngɔ na lɛ sese ko, ba bɛli tɛnɛ mɛ: “Qui sauvera la terre?”
Ba nga atɛnɛ mɛ
AYE MƐNDƐ̃
Gbɛ̃ngɔ ti klima na aye mɛ ge lɛ gigi: Ngbangɔ lengbi ti zangɔ mɔ ngasia?
Awangɔ ti ya Ngbangɔ lengbi ti zangɔ mɔ uzu ya akpale ni li tɛrɛ lo, na ngoi mɛ ni ndo li tɛrɛ lo, nga na pɛko akpale mɛ ndo si na lo ti gbɛ̃ngɔ ti klima.
AYE MƐNDƐ̃
Na lo mɛ ya klima ndo gbinyangbi bo gbinyangbingɔ, dungɔ lɛ ngɛ̃́ na dungɔ ngasia na bi mɛ na gangɔ nɛ?—Tɛnɛ mɛ Ngbangɔ tɛnɛ nɛ?
Nzapa ndo bata lɛ sese nga azi mɛ ka da?
