Azi gba ndo da bɛ la ya Atɛmwɛ tɛ Yehova adu ili sambela ti fanani. Kanda a ɔ na olo buru 2 700, Nzapa ti mbili mbili ndo ilindó awa kwa tɛ lo ya “atɛmwɛ.” (Yisaya 43:10-12) Ando ilindó e ya Awa Kalasi ti Ngbangɔ ngbii na 1931. Wa e mundó ili ti Atɛmwɛ tɛ Yehova lo nɛ?

Ili ni ndo fa Nzapa tɛ e. Se egwe ka ya ngbina Ngbangɔ ko, e na tãngɔ ili Nzapa, Yehova, fani koto na koto. Ka ya Ngbangɔ gba mɛ agbinyangbi ko, ahãna ili Yehova a zi, a su atitrɛ ti Gbia bere Nzapa na ndoni. Kanda bɛta Nzapa afandó tɛrɛ lo ka tɛ Mɔzɛsi la lo dinga bɛta ili lo nvɛ̃ni, Yehova, lo pandó ya, “Ba ili mbi ti bwaí na bwaí la.” (Kobima 3:15) Na lége ni la, lo fandó ɔngbi mɛ ka popo tɛ lo na a nzapa ti nvɛ̃nɛ. E na gwalo na lo mɛ ya e yu ili Nzapa mɛ santo ge tɛrɛ e.

Ili ni ndo fa kwa tɛ e. Se e tondani ka ndo Abɛlɛ zo ti mbili mbili ko, ni na yɔngɔrɔ longa tɛ azi ti gã mɛ ala fandó ya ani na loyengɔ ka tɛ Yehova. Na ya buru ngbangbo ngbangbo ko, Noa, Abrahama, Sara, Mɔzɛsi, Davidi nga na ambɛni mɛ ndɛ alindó ka ya longa ni mɛ ndo ili ya “kota da baba tɛ atɛmwɛ.” (Aebreo 11:4–12:1, NW) Ma se ko la mbɛni zo kɔi lo lengbi ti dungɔ tɛmwɛ tɛ zo mɛ nyɔ̃ lo didi ko, e nga e ye ya e ngbã bo so lɛ kwa ti fangɔ azi na bɛta lo tɛ Nzapa tɛ e.

E ndo landa pa gɛrɛ Yezo. Ngbangɔ ili lo ya “bɛta tɛmwɛ tɛ Nzapa lo nga bɛta wa pangɔ tɛnɛ.” (Suma 3:14) Yezo nvɛ̃ni pandó ya ni ‘fandó azi na bɛta ili Nzapa’ ni nga na ‘tɔndɔngɔ nda bɛta lo’ tɛ Nzapa. (Yoanɛ 17:26; 18:37, NW) Abɛta ava Kristo ayu ili niko, ala ndo li nga kpengbani ya azi ahĩnga ili Yehova. Ye mɛ Atɛmwɛ tɛ Yehova ndo ho tɛrɛ la ti lingɔ ni la.

• Awa Kalasi ti Ngbangɔ amundó ili ti Atɛmwɛ tɛ Yehova lo nɛ?

• Yehova bandandó dungɔ na Atɛmwɛ ge lɛ sese na ngoi mɛ wa?

• Zo mɛ ɔ Atɛmwɛ tɛ Yehova zu la na?