Ombiimbeli otayi tu ladhipike tu kale tu na ehalo lyokugandja notu shi ninge neinyengotompelo li li mondjila. Otayi popi kutya okugandja kwa tya ngaaka ohaku nyanyudha nakugandja nosho wo nakupewa. (Omayeletumbulo 11:25; Lukas 6:38) Jesus okwa ti: “Okugandja oku na elago ku vule okutaamba.” — Iilonga 20:35.

•  Uunake okugandja haku nyanyudha Kalunga?

•  Uunake okugandja ihaaku nyanyudha Kalunga?

•  Omanyolo gopaMbiimbeli taga popi kombinga yokugandja

Okugandja ohaku nyanyudha Kalunga uuna taku ningwa tashi zi komutima. Ombiimbeli oya ti: “Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.” — 2 Aakorinto 9:7.

Okugandja tashi zi komutima oku li oshitopolwa ‘shelongelokalunga’ ndyoka Kalunga a hokwa. (Jakob 1:27) Omuntu ngoka ha kwathele yalwe moku ya pa shoka ya pumbwa oha kala a hokiwa kuKalunga, na Kalunga ohe mu tala ko a fa a pungula kuye. (Omayeletumbulo 19:17) Ombiimbeli otayi ti kutya Kalunga ote ke mu futa. — Lukas 14:12-14.

Ongele itaashi ningwa tashi zi komutima. Iiholelwa oya kwatela mo:

• Okufuula aantu. — Mateus 6:2.

• Okugandja nelalakano lyokugalulilwa sha. — Lukas 14:12-14.

• Okugandja nelalakano lyoku ka hupithwa. — Episalomi 49:6, 7.

Ongele shoka to gandja tashi ka longithwa miinima mbyoka inaayi hokiwa kuKalunga. Pashiholelwa, otashi ka kala sha puka ngele omuntu to gandja iimaliwa kugumwe a ka ndombole nenge a ka lande iikolitha. (1 Aakorinto 6:9, 10; 2 Aakorinto 7:1) Sha faathana, inashu uka okugandja iimaliwa kwaangoka ta vulu okwiikwathela mwene pashimaliwa, ihe ina hala okulonga sha. — 2 Aatessalonika 3:10.

Ongele to gandja kuyalwe, omanga yaandjeni kaapu na ngoka te ya kwathele. Ombiimbeli otayi ti kutya omitse dhomaukwanegumbo odhi na okusila oshimpwiyu omaukwanegumbo gadho. (1 Timoteus 5:8) Itashi ka kala shi li mondjila ngele omutse gwegumbo tagu gandja kuyalwe, omanga yaandjawo taya mono iihuna. Jesus okwa li a pangula mboka haya tindi okukwathela aavali yawo mboka ya kulupa, taya ti kutya iiniwe yawo ayihe oye yi ‘pa Kalunga.’ — Markus 7:9-13.