Ombiimbeli otayi holola kutya Jesus ka li a hokana, nonando inayi shi popya kondandalunde. * Tala komatompelo taga landula.

1. Iikando oyindji Ombiimbeli oya popi kombinga yaanegumbo lyaJesus nosho wo kombinga yaakiintu mboka ya li yu uvitha pamwe naye noya li ya thikama puye sho ta dhipagwa. Ihe inayi popya nando kutya Jesus okwa li e na omukulukadhi. (Mateus 12:46, 47; Markus 3:31, 32; 15:40; Lukas 8:2, 3, 19, 20; Johannes 19:25) Sho Ombiimbeli inaayi popya kombinga yomukulukadhi gwaJesus, osha yela nale kutya Jesus ke na siku a hokanene.

2. Jesus okwa popi kombinga yaamboka inaaya ya mondjokana netompelo lyokugandja eitulomo koshilonga shaKalunga, a ti: “Oongoka ta vulu oku dhi taamba [oohapu ndhoka dhi na ko nasha nokwiikalela], ne dhi taambe.” (Mateus 19:10-12) Jesus okwa tulile po mboka ya hogolola okwiikalela opo ya gandje eitulomo kiilonga yaKalunga oshiholelwa. — Johannes 13:15; 1 Aakorinto 7:32-38.

3. Jesus okwa li a longekidha manga inaa sa, opo yina a silwe oshimpwiyu. (Johannes 19:25-27) Ngele Jesus okwa li a hokana nenge e na aanona, nena ando okwa shilipaleke wo kutya nayo otaya ka silwa oshimpwiyu.

4. Ombiimbeli oya popi kutya aasamane oye na okuholela Jesus mokuungaunga naakulukadhi yawo, ihe inayi popya omukalo moka Jesus a li hu ungaunga andola nomukulukadhi gwe. Pehala lyaashono, oya ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Aaefeso 5:25) Ngele ando Jesus okwa li a hokana sho a li kombanda yevi, mbela ando ovelise ndjono inayi longitha oshiholelwa shankene a li u ungaunga nomukulukadhi gwe?

Eeno, Jesus okwa li e na aamwayina yahamano lwaampo. Aamwayinamati ye, oJakob, Josef, Simon naJuda nosho wo aamwayinakadhona yaali lwaampo. (Mateus 13:54-56; Markus 6:3) Aanona mbaka, oyana lela yayina yaJesus, Maria, nomusamane gwe Josef. (Mateus 1:25) Ombiimbeli oya ti Jesus oye “osheeli” shaMaria, shoka tashi ti kutya Maria okwa li e na aanona yalwe. — Lukas 2:7.

Yamwe oya longitha oshitya “aamwayina” papuko, opo ya yambidhidhe elongo ndyoka kutya Maria okwa kala okakadhona sigo eso. Oshiholelwa shimwe osho shono kutya aantu yamwe oyi itaala kutya aamwayinamati yaJesus, aanona yaJosef ya za mondjokana ye yotango. Ihe Ombiimbeli oya ti kutya Jesus oye e na uuthemba wokukuutumba koshipangelapundi shaDavid. (2 Samuel 7:12, 13; Lukas 1:32) Ngele oyanamati yaJosef oya li ye vule Jesus, ando ngoka omukuluntu kuyakwawo oye a vulu okuthigulula uukwaniilwa.

Mbela oshitya shoka otashi popi kombinga yaalongwa yaJesus nenge kombinga yaamwayina yopambepo? Aawe, shoka itashi tsu kumwe naashoka Ombiimbeli tayi ti, oshoka oya ti kutya ‘aamwayina aalumentu wo oya li inaaye mu itaala.’ (Johannes 7:5) Ombiimbeli otayi yoolola ko aalongwa yaJesus kaamwayina aalumentu. — Johannes 2:12.

Aantu yalwe oya dhiladhila wo kutya aamwayina yaJesus, oogwaantsezi ye. Ihe Omanyolo gOshigreka oga longitha iitya ya yoolokathana sho taga popi kombinga yiitya “omumwayina omulumentu,” “omukwanezimo” nenge “gwaantsezi.” (Lukas 21:16; Aakolossa 4:10) Aalongwantu oyendji yOmbiimbeli oyi itaala kutya aamwayinamati yaJesus naamwayinakadhona, oya valwa kuyina yimwe. Pashiholelwa, embo The Expositor’s Bible Commentary olya ti: “Omukalo gwomondjila okuuva ko oohapu ‘aamwayina aalumentu’ . . . ogwo kutya oshitya shika otashi ulike lela koyanamati yaMaria naJosef nenge kaamwayinamati yaJesus muyina.” *