Omukadhona gwedhina Briana, ngoka e na omimvo 15, okwa ti: “Onda kambadhala okulesha Ombiimbeli, ihe ohandi si uunye, oshoka oyi na omapandja ogendji noonkondo!”

Mbela nangoye osho ho kala wu uvite ngawo? Oshitopolwa shika otashi vulu oku ku kwathela!

•  Omolwashike ndi na okulesha Ombiimbeli?

•  Ongiini ndi na okulesha Ombiimbeli?

•  Shoka oomakula haya ti

Otashi vulika wu kale wu uvite kutya okulesha Ombiimbeli kashi shi oshinima oshiwanawa. Ngele osho wu uvite ngawo, oshi shi okuuviwa ko. Otashi vulika wa tala ko Ombiimbeli yi li owala embo li na omapandja ogendjigendji nokali na nando omathano, noho kala wu wete shi li hwepo wu tale otiivii nenge uuvidio.

Ipula to ti: Ngele owi itsu oshiketha oshinene shomaliko gondilo shi li pehala lyontumba, mbela ito ka kala wa hala okutala shoka shi li mo?

Ombiimbeli oya fa oshiketha shoka. Oyi na omaliko ogendji gondilo nenge uunongo mboka tawu vulu oku ku kwathela:

• Wu ninge omatokolo omawanawa

• Wu kale wu na ekwatathano ewanawa naavali yoye

• Wu mone ookuume aawanawa

• Wu idhidhimike uuna wa gwililwa po

Omolwashike Ombiimbeli tayi vulu oku tu kwathela kunena, nonando oyi li embo ekulukulu? Omolwaashoka “enyolo kehe olya nyolithwa kOmbepo yaKalunga.” (2 Timoteus 3:16) Shoka otashi ulike kutya omayele ngoka ge li mOmbiimbeli, oga za kOnzo yi na uunongo wa shiga ko.

Omukalo gwotango, oku yi lesha okuza petameko sigo opehulilo. Otashi ke ku kwathela wu uve ko kutya Ombiimbeli otayi popi lela kombinga yashike. Oto vulu oku yi lesha momikalo ndhika mbali:

•  Oto vulu okulesha omambo agehe 66 gOmbiimbeli melandulathano, okuza kuGenesis sigo okEhololo.

•  Oto vulu okulesha iiningwanima mbyoka ya popiwa mOmbiimbeli, melandulathano moka ya ningwa.

Eetopo: Mokambo, Ekwatho kungoye wi ilonge Oohapu dhaKalunga, mOshitopolwa 4 omu na omusholondondo gwiiningwanima ya simana monkalamwenyo yaJesus sho a li kombanda yevi, yi li melandulathano ngaashi ya ningwa.

Omukalo omutiyali, okulesha omahokololo gOmbiimbeli ngoka ga pamba unene onkalo yoye. Pashiholelwa:

• Mbela owa hala okutseya nkene to vulu okumona ookuume ye shi okwiinekelwa? Lesha ehokololo lyaJonatan naDavid. (1 Samuel, ontopolwa 18-20) Konima yaashono, longitha ombapila yomapulo yi na oshipalanyolo: “Nkene tandi vulu okumona ookuume aainekelwa” [“How to Find Loyal Friends”], wu mone kutya oshike to vulu okwiilonga mehokololo ndyoka.

• Mbela owa hala okutseya nkene to vulu okusinda omamakelo nomupondo? Lesha ehokololo lyaJosef nkene a li a sindi emakelo. (Genesis, ontopolwa 39) Konima yaashono, longitha ombapila yomapulo yi na oshipalanyolo: “Nkene tandi vulu okusinda omamakelo . . . Josef — Oshitopolwa 1” nosho wo “Okwa li a lundilwa . . . Josef — Oshitopolwa 2 [“How to Resist Temptation . . . Joseph—Part 1” and “Falsely Accused! Joseph—Part 2”], wu mone kutya oshike to vulu okwiilonga mehokololo lye.

• Mbela owa hala okutseya nkene egalikano tali vulu oku ku kwathela? Lesha ehokololo lyaNehemia. (Nehemia, ontopolwa 2) Konima yaashono, longitha ombapila yomapulo yi na oshipalanyolo: “Kalunga okwa yamukula egalikano lye” [“God Answered His Prayer”], wu mone shoka to vulu okwiilonga mehokololo lye.

Eetopo: Uuna to lesha Ombiimbeli, shi ninga wu li pehala lya mwena nawa, opo wu vule okugandja eitulomo.

Omukalo omutitatu gwokulesha Ombiimbeli, okuhogolola mo ehokololo nenge episalomi lyontumba, to li lesha e to ipula kutya oshike wi ilongo mo. Oto vulu okwiipula omapulo ngaashi:

•  Omolwashike Jehova a nyolitha ehokololo nenge episalomi ndika mOmbiimbeli?

•  Otandi ilongo mo shike kombinga yomaukwatya gaJehova nenge yomukalo gwe gwokuninga iinima?

•  Uuyelele mbuka otandi vulu ngiini oku wu longitha mokukalamwenyo kwandje?

Eetopo: Longitha Ombiimbeli yokukonakona yo-New World Translation, oshoka oyi na uuvidio, uualita niinima yilwe mbyoka tayi ke ku kwathela wu ilonge oshindji sho to lesha Ombiimbeli.