Onda li owala ndi na oomvula omulongo mo 1985 sho aanona yokoCambodia ye ya kosikola yetu moColumbus, Ohio, U.S.A. Okamati kamwe komuyo oka li ke shi Oshiingilisa kashona, onkee oka tameke okulombwela ndje omahokololo omatilithi gaantu taya hepekwa, taya dhipagwa notaya fadhuka po, taka longitha omathano. Uusiku onda li handi lili sho tandi dhiladhila kombinga yaanona mbaka. Onda li handi kala nda hala oku ya lombwela kombinga yoParadisa neyumuko, ihe kaya li yu uvite ko elaka lyandje. Nonando onda li owala okamatyona, onda li nda tokola ndi ilonge Oshicambodia opo ndi lombwele aanasikola ooyakwetu kombinga yaJehova. Pethimbo mpoka kanda li ndi wete nkene ehogololo ndyoka tali ka guma onakuyiwa yandje.

Kasha li oshipu okwiilonga Oshicambodia. Onda li nda tokola okweetha po okwiilonga iikando ayihe iyali, ihe Jehova okwa li a ladhipike ndje okupitila maavali yandje. Mokweendela ko kwethimbo, aalongisikola yandje nosho wo aalongwa ooyakwetu oya tameke okuladhipika ndje ndi lalakanene iilonga hayi futu nawa. Ihe onda li nda hala okuninga omukokolindjila, nomoongundu dhahugunina onda li nda hogolola iilongwa mbyoka ya li tayi ka kwathela ndje ndi mone iilonga yokwiikongela omboloto yetatasiku, opo ndi vule okwaadha elalakano lyandje. Ngele osikola ya zimbuka, onda li handi ka tsakanena naakokolindjila yontumba nokulonga pamwe nayo muukalele. Onda li wo ndi iyamba okulonga aalongwa mboka ya li tayi ilongo Oshiingilisa osho elaka etiyali, etokolo ndyoka lye ke etela ndje uuwanawa noonkondo konima.

Sho nda li ndi na oomvula 16, onda li ndu uvu kombinga yongundu yOshicambodia ndjoka ya li koLong Beach, California, U.S.A. Onda li nde yi talele po nonda li ndi ilongo okulesha Oshicambodia. Nziya sho nda mana osikola, onda ningi omukokolindjila nonda tsikile oku uvithila Aacambodia mboka ya li puushinda. Sho nda li ndi na oomvula 18, onda li handi dhiladhila kombinga yokutembukila koCambodia. Okwa li natango kwa nika oshiponga, ihe onda li ndi shi shi kutya aantu owala aashona yomoomiliyona omulongo mboka ya kala muCambodia yu uva onkundana ombwanawa yUukwaniilwa. Pethimbo mpoka, moshilongo ashihe omwa li mu na owala egongalo limwe lyaauvithi 13. Onda li nda yi koCambodia oshikando shotango sho nda li ndi na oomvula 19. Konima yoomvula mbali, onda li nda tokola ndi tembukile hoka. Onda li nda mono iilonga yetatasiku yokutoloka nokulonga Oshiingilisa, opo ndi iyambidhidhe muukalele wandje. Konima, onda li nda mono omukulukadhi e na omalalakano ga fa gandje. Atuhe, otwa kala nokunyanyukilwa pamwe okukwathela Aacambodia oyendji yi iyapulile Kalunga.

Jehova okwa pa ndje ‘shoka nda kala nda yuulukwa.’ (Eps. 37:4) Okuninga aantu aalongwa oku li eithano ndyoka hali etele omuntu enyanyu kaaku na we. Muule woomvula 16 ndhoka nda kala moCambodia, okangundu hoka okashona kaapiya yaJehova 13 oka tamunuka mo noka ninga omagongalo 12 nopu na oongundu dhi li ne ndhoka dhi lyaathane komakule! — Ngaashi sha popiwa kuJason Blackwell.