Aavali mboka ya tulila po oyana oshiholelwa oshiwanawa ohaya ningi shoka haye ya lombwele ya ninge. Pashiholelwa, ino tegelela omwanamati gwoye a kale ha popi oshili, ngele oho mu lombwele to ti: “Tya kandi mo,” uuna pwe ya omuntu ngoka inoo hala okupopya naye.

Tate David okwa ti: “Aantu oyendji ohaya ti: ‘Ningeni shoka taye mu lombwele, ihe inamu landula iilonga yawo.’ Omupopyo ngoka ihagu longo kaanona. Yo oya fa omafulafula ngoka haga nina kehe shoka hatu popi naashoka hatu ningi. Otaye ke tu lombwela kutya ihatu ningi shoka hatu ya lombwele, uuna tatu kambadhala oku ya longa.”

SHOKA OMBIIMBELI TAYI TI: “Oho uvithile aantu yaa yake, ngoye iho yaka?” — Aaroma 2:21.

Aanona nosho wo aagundjuka yomimvo omulongo nasha ohaya nwethwa mo unene kaavali yawo, shi vulithe kaantu yalwe, mwa kwatelwa oomakula yawo. Shoka osha hala okutya ongoye wu na okulonga aamwoye ondjila yu uka. Otaya vulu owala oku shi ninga ngele nangoye oho ningi shoka ho ya lombwele ya ninge.

Meme Nicole okwa ti: “Ohashi vulika tu lombwele aana yetu oshinima shontumba iikando niikando, nokupula ngele oyu uva ko ngaa. Ihe ngele tse itatu ningi ngaashi hatu ya lombwele, nena otaye ke tu pula. Aanona ohaya kala taya tala kehe shoka tatu ningi, nuuna tu wete kutya kaye tu wete.”

SHOKA OMBIIMBELI TAYI TI: ‘Uunongo wokombanda kau na uufudhime.’ — Jakob 3:17.

Konakona eihumbato lyoye. Omainyanyudho ga tya ngiini ho tala? Oho ihumbatele ngiini kuume koye kopandjokana nosho wo aamwoye? Ookuume koye aantu ya tya ngiini? Mbela owu na ko nasha nayalwe? Oho ihumbata ngaa momukalo moka wa hala aamwoye yi ihumbate?

Meme Christine okwa ti: “Ngame nomusamane gwandje ihatu lombwele aanona yetu ya ninge iinima mbyoka ihaatu ningi.”

Gandja ombili uuna wa ninga epuko. Aamwoye oye shi wo kutya oho ningi omapuko. Ngele owa kala ho gandja ombili kukuume koye kopandjokana nokaamwoye uuna wa ninga epuko, oto ya tulile po oshiholelwa oshiwanawa shokukala aanashili naaifupipiki.

Meme Robin okwa ti: “Oyana yetu oya pumbwa okuuva tatu zimine omapuko getu notatu gandja ombili. Ngele ihatu shi ningi, otayi ilongo okukala haya holoke omapuko gawo.”