“Ndakamboeja kuverenga Bhaibheri, asi ngo kuvona manera orakakura, zvinondirembesa”—Bhriyana ano makore anokwana15.

 Imwimwi munojizwavo kudaro? Kudari ndizvona, cijijo ici cinozomubesera.

•  Ngenyi zvaushoni kuverenga Bhaibheri?

•  Ndingaitenyi kuti ndiverenge Bhaibheri?

•  Majaha amweni anonangenyi?

 Imwimwi munojizwa makaremba basi ngo kurangarira kuverenga Bhaibheri? Kudari ndizvona, zvinozwisisika. Kangaije mungarangarira kuti Bhaibheri rino mapheji akawandisisa cimwenizve arina mafoto—azvikwanisiki kuezanisa Bhaibheri no terevhisori no mavhidhiyo.

 Amborangariranyi basi: Ngatiti muri kufamba, mowana kasha yokare, kureva kuti amucaizova no cido co kuifunungura kuti muvone zvirimo?

 Bhaibheri rakadarivo inga kasha iyi, irona rakazara ngo upfumi. Irona rino maperora angamubesera kuti:

•   Muteme zvivaringo zvaushoni

•   Muzwane no majibaba enyu

•   Muwane shamwari jokadi

•   Muhwisane no kuthimwa-thimwa

 Kuitisa kudini bhuku ro kare ringatibesera mazuva ano? Irona rinotibesera ngokuti “Matahwa ese akafemehwa ndi Mwari.” (2 Timoti 3:16) Izvi zvinoda kureva kuti mazano atinowana mu Bhaibheri anovha kuna Mwari ano uzivi.

 Cokutanga: Verenganyi Bhaibheri kapa ngo kapa. Izvi zvinozomubesera kuti muvone zviri kudaro kunangwa mu bhukumo. Pano njira jakawanda jamungaverenga Bhaibheri ramutero. Vonanyi muezaniso muviri:

•    Mungaverenga mabhuku anokwana 66 o Bhaibheri mecitevera munda-nda-nda unoviyepo waro kutangira Genesi mbhera Apokalipsi.

•    Mungasana kuverenga ngo zviitiko zviri mu Bhaibheri no nguva yozvakaitika.

 Mazano: Apendice A7 yo Sandujo yo Nyika Ipsa munowana munda-nda-nda o zviitiko zvo upenyu hwa Jesu paainga pasi pano.

 Cocipiri: mungakheta kuverenga ciitiko co Bhaibheri cinozwirana no mugariro wenyu. Inga muezaniso:

•   Munoda kuva no shamwari jokadi? Mungaverenga ngo ciitiko ca Dhavhidhi na Jonatani. (1 Samueli, cipauko 18-20) Perapo jijanyi ciri cese, “mungawanisa kudini shamwari jokadi” mungapsaka manera okuzvishandisa.

•   Munoda simba kuti muhwisane no kuvangirijwa? Mungaverenga ngo ciitiko ca Josefa no kuvona zvaakaita. (Genesi, cipauko 39) Perapo jijanyi ciri cese. “Mungaitenyi kuti muhwisane no kuvangirijwa.  . . Josefa—Divi 1 “no” kupumbwa naacikazivi kuita ciri cese. Josefa—Divi 2” mungapsaka manera okuzvishandisa.

•   Maidakarira kuziva manera amungabesereka ngo mukumbiro? Verenganyi ngo ciitiko ca Nehemia.(Neemia, cipauko 2) “Mwari wakadavira mukumbiro wake” Perapo jijanyi ciri cese muvone zvamungaita kuti mutevejere Nehemia.

 Mazano: Pamunoda kuverenga Bhaibheri, psakanyi ndau yaushoni kuti mukwanise kugara makagajana.

 Cocitatu: kuverenga cimwe co ciitiko kana nduyo perapo movona manera amungazwishandisa mu upenyu. Inga muezaniso, mungajivhunjisa kudari:

•    Ngenyi Jehovha wakaita kuti izvi zvitahwe mu Bhaibheri?

•    Izvi zvinondijijisenyi ngo pamusoro po mugariro ja Jehovha no manera ake o kuita zviro?

•    Ndingazvishandisa kudini mu upenyu hwangu?

 Mazano: Ivanyi no urongwa. Sananyi njiku yamuri kuda kutanga kuverenga Bhaibheri.