UNkulunkulu nguye ozakwenza kube lokuthula emhlabeni hatshi abantu. Uzasebenzisa uMbuso wakhe oleNkosi enguJesu Khristu. Nanzelela ukuthi iBhayibhili lithini ngethemba leli elihle kangaka.

1.   UNkulunkulu “uzathulisa izimpi kuze kube semikhawulweni yomhlaba,” agcwalise isithembiso sakhe sokuthi kube ‘lokuthula emhlabeni ebantwini abathokozelwa nguye.’—IHubo 46:9; ULukha 2:14, The Holy Bible in Ndebele.

2.   UMbuso kaNkulunkulu osezulwini uzabusa umhlaba wonke. (UDanyeli 7:14) Uzaqeda ubandlululo ngoba yilo olubangela ukuthi kube lokungazwanani emhlabeni.

3.   UJesu oyiNkosi yoMbuso kaNkulunkulu ubizwa langokuthi “yiNkosana yokuThula” njalo uzakuba leqiniso lokuthi ‘ukuthula akuyikuba lomkhawulo.’—U-Isaya 9:6, 7.

4.   Abantu abathanda ukulwa abasoze bavunyelwe eMbusweni kaNkulunkulu ngoba “labo abathanda udlakela [uNkulunkulu] uyabazonda.”—IHubo 11:5; Izaga 2:22.

5.   UNkulunkulu ufundisa abantu abazahlala eMbusweni wakhe ukuthi bathande ukuthula. Yikho iBhayibhili lisithi: “Bazakhanda izinkemba zabo zibe yimihlathi yamakhuba kuthi imikhonto yabo ibe zingqamu zokuthena izihlahla. Isizwe asiyikuhlomela isizwe ngezinkemba loba sifundele ukulwa izimpi futhi.”—U-Isaya 2:3, 4.

 Khathesi amamiliyoni oFakazi bakaJehova emhlabeni wonke afundiswa nguNkulunkulu ukuthi angaphila njani ngokuthula labanye abantu. (UMathewu 5:9) Lanxa siyimhlobo etshiyeneyo etholakala emazweni adlula 230, kasivumi ukuya empini.