Ukwazi UMdali Kwenza Sibe Ngabangane Bakhe
UMdali wethu kalamandla kuphela kodwa uphinda abe lobuntu obuhle. Kanti njalo ufuna sifunde ngaye futhi sibe ngabangane bakhe. (UJohane 17:3; UJakhobe 4:8) Yikho esitshela okunengi ngaye.
UMdali Wethu Ulebizo
“Yenza bakwazi ukuthi wena, obizo lakho unguJehova—ukuthi wena wedwa ungoPhezukonke emhlabeni wonke.”—IHUBO 83:18.
IBhayibhili lisifundisa ukuthi uJehova nguye yedwa uNkulunkulu weqiniso. Nguye uMdali wezulu lomhlaba lakho konke okuphilayo. Kumele sikhonze yena yedwa.—ISambulo 4:11.
UJehova UnguNkulunkulu Olothando
“UNkulunkulu uluthando.”—1 UJOHANE 4:8.
UJehova usifundisa ukuthi ulobuntu obunjani esebenzisa iBhayibhili lezinto azidalileyo. Ubuntu bakhe obukhanya kakhulu luthando. Ufuqwa luthando kukho konke akwenzayo. Nxa singafunda okunengi ngoJehova sizamthanda kakhulu.
UJehova NguNkulunkulu Othethelelayo
“UnguNkulunkulu oxolelayo.”—UNEHEMIYA 9:17.
UJehova uyakwazi ukuthi singabantu abalesono yikho ezimisele ‘ukusixolela.’ Nxa singaxolisa kuye njalo sizame ngamandla ethu wonke ukuyekela ukwenza izinto ezimbi uzasithethelela futhi kasoze asijezisele izono esazenza kudala.—IHubo 103:12, 13.
UJehova Ufuna Sithandaze Kuye
‘UJehova useduze kulabo abacela kuye, uyezwa ukukhala kwabo.’—IHUBO 145:18, 19.
UJehova kafuni ukuthi silandele imikhuba ethile kumbe sisebenzise izithombe loba ezinye izinto ukuthi simkhonze. Uyayilalela imithandazo yethu njengomzali olothando olalela abantwabakhe abathandayo nxa bekhuluma laye.
