Ngomnyaka wenkonzo ka-2021, a umkhuhlane weCOVID-19 ubulokhu usithwalise nzima. Njengoba kwachasiswa esihlokweni esithi “Ukuncedisa Abafowethu Labodadewethu Emhlabeni Wonke Ngesikhathi Se-Covid 19,” sesisebenzise izigidi zamadola b ekuncedeni abafowethu ngesikhathi lesi seCovid futhi sabumba amakhomithi okusiza abehlelwe ngumonakalo adlula 950.

 Ngesikhathi somkhuhlane lo weCovid, abafowethu labodadewethu baphinde behlelwa ngumonakalo wemvelo kanye lezinye izingozi ezibangelwe ngabantu. Phezu kwemali esetshenziswe ukunceda abafowethu labodadewethu ngesikhathi lesi seCovid, iKhomithi Yabahleli yeQula Elikhokhelayo iphe imvumo yokuthi kusetshenziswe imali engange $8 miliyoni ukuze kuncedwe labo abahlelwe yimonakalo leyo. Kube lemonakalo leyo eyedlula 200. Ake sibone ukuthi iminikelo yenu isetshenziswe njani ekuncedeni labo abahlelwe ngumonakalo wemvelo kanye labathwele nzima ngenxa yezomnotho.

 Mhlaka 22 May 2021, kwaba le-volcano entabeni iNyiragongo eDemocratic Republic of the Congo. Izikhukhula ze-volcano leyo zadiliza izindlu, izikolo lezindawo zamanzi. Kodwa izikhukhula lezo ayisizo zodwa ezaziyingozi. Ngemva kokudubuka lokho, kwahlala amalanga amanengi kulothuli oluyingozi olwaluvela ekudubukeni lokho edolobheni leGoma futhi kwaba lokuzamazama komhlaba. Abantu abanengi kakhulu batshelwa ukuthi basuke endaweni leyo. Izinkulungwane zabantu zabaleka futhi abanye baze bachapha lomngcele bangena eRwanda.

 OFakazi bakaJehova abasuka endaweni leyo babengaba ngu-5 000. Izindlu zabanye zabhidlizwa yi-volcano, ikanti abanye batshontshelwa yonke impahla yabo ngesikhathi sebebalekele i-volcano. Amakhomithi okunceda abehlelwe ngumonakalo eRwanda laseDemocratic Republic of the Congo alungisa izinto zokunceda abafowethu labodadewethu labo. Igatsha leCongo (Kinshasa) lakhuluma ngenye yamakhomithi lawo lathi: “Lanxa kwakulesiphithiphithi edolobheni lelo, futhi langesikhathi abantu bengakatshelwa ukuthi basuke, ikhomithi leyo yayisiqalisile ukupha abafowethu labodadewethu ukudla, amanzi, ingubo lezigqoko.” Kwelinye idolobho lapho abafowethu abedlula 2 000 ababebalekele khona, ikhomithi yokusiza abehlelwe ngumonakalo yafaka amatende, yapha abafowethu ama-mask, futhi yabatshela lokuthi bangenzani ukuze bangabanjwa yiCOVID-19 le-cholera.

 Ngezinyanga ezintathu nje kuphela kwenzakale umonakalo lowo, abafowethu basebephe abanye bethu i-6 000kg zerayisi, i-6 000kg zeflawa yomumbu, lamalitha edlula 3 000 amafutha okupheka, lamalitha amanzi angedlula 3 000. Ukuze longe imali, igatsha lahlela ukuthi ukudla kuhle kuthengwe ngobunengi elizweni lelo kulokuthi kuwodwe ukudla okudulayo okuvela phandle kwelizwe.

 Omunye olendlu eyabhidlika isanda kwakhiwa uthi: “Sasidanile futhi sisizwa ubuhlungu.” Kodwa imuli yakhe yaphiwa ukudla lokunye ababekudinga njalo bathola lesikhuthazo ukuze baqhubeke beqinile ekukhonzeni. Khathesi uthi: “UJehova usincede ukuthi sibe lalokho esikudingayo. Sibonile ukuthi uJehova uyasithwalela imithwalo yethu futhi enze kube lula ukuthi lathi siyithwale.”

 Sekuleminyaka eminengi ezomnotho eVenezuela zingamanga kuhle. Abafowethu ezweni lelo bathwele nzima kakhulu, kulokuswelakala kokudla kanye lokwanda kobugebenga. Kodwa inhlanganiso kaJehova ayibatshiyanga.

 Emnyakeni wenkonzo odlulileyo, kusetshenziswe imali eyedlula $1.5 miliyoni ekuthengeni ukudla lesepa kanye lasekukuhambiseni kubafowethu ababedinga uncedo lolo. Igatsha leVenezuela lithi: “Akulula ukuthwala ukudla okungamakhilogramu angu-117 934, ukukuhambisa ezindaweni ezitshiyeneyo zelizwe inyanga ngayinye futhi ube leqiniso lokuthi kufikile kubafowethu labodadewethu abakudingayo.” Abafowethu bandise ukuthumeza ukudla okungaphangisi ukonakala. Igatsha liqhubeka lisithi: “Sizama ukuthenga ukudla okunengi ngasikhathi sinye futhi okuyabe kuyisikhathi okutholakala ngaso ngoba kuyabe kutshiphile ngalesosikhathi. Ngemva kwalokho sisebenzisa izindlela ezingaduliyo zokukuthwala.”

 ULeonel, olilunga leKhomithi Yokusiza Abehlelwe Ngumonakalo eVenezuela uyawuthanda umsebenzi lo. Uthi: “Umsebenzi lo uqakatheke kakhulu. Ukwenza umsebenzi lo kungikhuthaze kakhulu kusukela umkami etshona ngenxa yeCOVID-19. Ngihlala ngizimisele ukwenza okunengi kuwo futhi ngizizwa ngiluncedo kakhulu kubafowethu abadinga usizo. Ngizibonele mathupha uJehova egcwalisa isithembiso sakhe sokuthi kasoze abatshiye abantu bakhe.”

 Omunye umfowethu owathola usizo lolu laye wayeke waba kukhomithi esiza abehlelwe ngumonakalo. Wathi: “Khathesi yimi engasengidinga uncedo. Asiphiwanga ukudla kuphela, kodwa abafowethu basinceda mina lomkami ukuthi singakhathazeki. Basinakekela, basiduduza futhi basikhuthaza.”

 Eminye imonakalo yenzakala kungakhangelelwanga. Kodwa izikhathi ezinengi inhlanganiso kaJehova iyenelisa ukuthola lokuhambisa izinto zokuncedisa abafowethu labodadewethu. Iminikelo yenu yiyo eyenza inhlanganiso yenelise ukwenza njalo. Ezinye izindlela zokunikela zibhalwe ku-donate.isa4310.com. Siyabonga kakhulu ngokuphana kwenu.