INqabayokulinda kaJune 1, 1912 yathi: “Kungenzakala ukuthi abantu abanengi ababala amabhuku ethu balabantu ababaziyo abayiziphofu. Abantu abangaboniyo bangenelisa ukuthola amabhuku okubala mahala . . . . Amabhuku la atholakala nge-braille.” INqabayokulinda le yaqhubeka isithi: “Abantu abanengi abangaboniyo bayathokoza nxa besizwa izindaba ezinhle zalokho okuzakwenzakala esikhathini esizayo.”

 Ngesikhathi kubhalwa amazwi la, amazwe ayesebenzisa ulimi lwesiNgisi ayebhala i-braille ngezindlela ezitshiyeneyo. Kodwa oFakazi bakaJehova basebevele besebenzisa i-braille ukuze bafundise abantu iqiniso eliseBhayibhilini. Lakhathesi lokhe sisenza njalo! Sesilamabhuku e-braille atholakala ngezindimi ezedlula 50. Amabhuku la enziwa njani?

 Nxa kusenziwa amabhuku e-braille, kuqala ngokufakwa inhlamvu zakhona. UMichael Millen osebenza le-Text Processing Services ePatterson, eNew York uthi: “Kudala sasisebenzisa ama-software enziwe ngabanye ukuze sibhale i-braille kodwa sasingenelisi ukuwasebenzisa ekwenzeni amabhuku ngezinye izindimi. Khathesi sisebenzisa i-Watchtower Translation System, futhi iyavuma ukuthi sibhale amabhuku e-braille ngezindimi ezinengi. Angiboni ukuthi lukhona olunye uhlelo olufanana layo loba ngaphi.”

 Amabhuku e-Braille aphinda achasise lemifanekiso eyabe ifakwe lapho. Ngokwesibonelo, umfanekiso ophandle kwebhuku elithi Ungathokoza Kuze Kube Nini Lanini! uchasiswe ngamabala athi: “Indoda ehamba endleleni elamaluba lezihlahla lamaqaqa lezintaba.” Omunye ongaboniyo oncedwe yilokhu nguJamshed oyinceku ekhonzayo futhi oliphayona. Uthi, “Amabala achasisa imifanekiso efakiweyo ayanginceda kakhulu.”

 Ngemva kokuthi amabhuku la esebhaliwe ngenhlamvu ze-braille, athunyelwa emagatsheni adinda amabhuku e-braille. I-braille idindwa emaphepheni aqatha futhi ahlala isikhathi eside okokuthi angasetshenziswa okweminyaka eminengi. Ngemva kwalokho amaphepha la ayahlanganiswa abe libhuku abesethunyelwa emabandleni lamanye amabhuku kumbe nge-post. Kwesinye isikhathi amagatsha angathumela amabhuku la ngezindlela eziphangisayo ukuze abafowethu abangaboniyo bawathole ngesikhathi, besebesenelisa ukuwasebenzisa emihlanganweni yebandla.

 Kufuneka isikhathi lemali ukuze umsebenzi wonke lo wenziwe. Ngokwesibonelo, ukudinda amaBhayibhili e-braille amabili kuthatha isikhathi esilingana lesokudinda amaBhayibhili angayisiwo e-braille angu-50 000 ngomtshina wethu wokudinda oseWallkill, eNew York. IBhayibhili lesiNgisi le-braille elitholakala nge-grade-two lilama-volume angu-25, futhi intengo yokwenza ama-volume la ayiphinda ka-123 imali esetshenziswa ekwenzeni iBhayibhili elilodwa elingayisilo le-braille. a Amagwaliba e-volume eyodwa yeBhayibhili le-braille angaba yi-$150. (U.S.)!

 Labo abasebenza ekwenzeni amabhuku e-braille bezwa njani ngomsebenzi wabo? UNadia osebenza egatsheni leSouth Africa uthi: “Abafowethu labodadewethu abangaboniyo bathwele nzima, yikho ngiyathokoza ngoba kukhona engingakwenza ukuze ngibancedise. Kuyazikhanyela ukuthi uJehova uyabathanda kakhulu.”

 Kwenziwani nxa umuntu ongaboniyo engenelisi ukubala i-braille? Eminyakeni esanda kudlula, sikhiphe ibhuku elithi Funda Ukusebenzisa I-braille. Ibhuku leli lile-braille kanye lamabala asetshenziswa ngabantu ababonayo. Lenzelwe ukuthi umuntu obonayo alisebenzise ndawonye lomuntu ongaboniyo. Kulamathuluzi angasetshenziswa ngumuntu ongaboniyo ukuthi azibhalele i-braille futhi lokhu kuyamnceda ukuthi akhumbule izinto azibhalileyo lokuthi zitshoni.

 Amabhuku la abancede njani abafowethu labodadewethu abangaboniyo? U-Ernst, ohlala eHaiti wayejayele ukuya emihlanganweni yebandla kodwa wayengelawo amabhuku e-braille. Yikho kwakumele asebenze nzima ukuze abambe ngekhanda lokho ayefuna ukukutsho nxa esenza inkulumo loba ephendula. Uthi: “Khathesi sengisenelisa ukuphendula loba nini. Ngizizwa ngimanyene labafowethu labodadewethu ngoba sonke sithola ukudla okufananayo okuqinisa ukholo!”

 UJan ongabonisisiyo ongumdala e-Austria futhi oqhuba isifundo seNqabayokulinda leSifundo seBhayibhili Sebandla uthi: “Amabhuku ethu alula ukusebenzisa ukwedlula amanye amabhuku engake ngawabala. Ngokwesibonelo, ipheji ngayinye ilenamba, futhi amabhuku la aphinde abe lamabala angaphansi kanye lamabala achasisa imifanekiso.”

 USeon-ok oliphayona ohlala eSouth Korea kaboni futhi kezwa endlebeni. Wayechasiselwa okwenzakala emihlanganweni yebandla kusetshenziswa ulimi lwezandla lokuthintwa esandleni (tactile signing), kodwa khathesi usesenelisa ukubala iBhayibhili lamabhuku atshiyeneyo esebenzisa i-braille. Uthi: “Kunzima ukubala amanye amabhuku e-braille ngoba ezinye inhlamvu ziyabe zingekho futhi amanye amabala ayabe engahlalanga emzileni, kanti futhi lephepha lakhona liyabe lilula kakhulu. Kodwa oFakazi bakaJehova basebenzisa iphepha eliqatha lenhlamvu ezisetshenzisiweyo kaziphici. Lokhu kwenza ngingathwali nzima nxa ngibala.” Uqhubeka esithi: “Kuqala kwakumele ngincediswe ngomunye umuntu nxa ngibala iBhayibhili kumbe amanye amabhuku kodwa khathesi sengizibalela ngingedwa. Ngiyathokoza kakhulu ngoba sengisenelisa ukulungiselela imihlangano yethu yebandla kanye lokuphendula. Ngiwabala wonke amabhuku ethu atholakala nge-braille. Ngingathi “kuyala lokuthi ngiwabeke phansi.”

 Njengawo wonke amabhuku ethu aphrintwayo, amabhuku ethu e-braille lawo alamabala la alandelayo: “Ibhuku leli kalithengiswa. Lisetshenziswa emsebenzini wokufundisa iBhayibhili owenziwa emhlabeni wonke njalo osekelwa ngeminikelo yokuzithandela.” Siyalibonga ngeminikelo eliyenza ku-donate.isa4310.com. Iminikelo eliyenzayo isetshenziswa ekwenzeni amabhuku asincedayo ekukhonzeni, okugoqela lawe-braille asetshenziswa ngabangaboniyo.