UJesu watshela abafundi bakhe wathi: ‘Lizakuba ngofakazi bami kuze kuyefika emaphethelweni omhlaba.’ (ImiSebenzi 1:8) Lamuhla oFakazi bakaJehova bakhuthele emsebenzini wokutshumayela. Lanxa kunjalo, kwezinye indawo okugoqela lalezo ezilabantu abanengi akukatshunyelwa kangako. Kanti njalo kwamanye amazwe kulaboFakazi abalutshwana. (UMathewu 9:37, 38) Pho senzani ukuze sitshumayeze abantu abanengi?

 IKhomithi Yenkonzo yeQula Elibusayo ithumela abanali ezindaweni ezitshiyeneyo emhlabeni wonke ukuze bancedise ukwenza umsebenzi esawulaywa nguJesu. Sikhuluma nje kulabanali abangu-3 090. a Abanengi babo baqeqetshwa ezikolo zenhlanganiso ngokwesibonelo, eSikolo Sabavangeli BoMbuso. Abanali laba bazimisele ukutshiya amakhaya abo besiyahlala kwezinye indawo. Siyathokoza ukuba lamaKhristu la aqinileyo ekukhonzeni, aqeqetshiweyo futhi athembekileyo ngoba azimisele ukutshumayela izindaba ezinhle njalo ayisibonelo esihle kubafundi abatsha.

 Egatsheni ngalinye, iwofisi ebona ngokunakekelwa kwabanali engaphansi koHlangothi lweNkonzo isebenza leKhomithi Yegatsha ukuze incedise abanali bathole abakudingayo, kungaba yindawo yokuhlala kumbe ukubancedisa endabeni zokwelatshwa njalo ibanika imadlana yokuthi bathenge abakudingayo. Lokhu kubasiza ukuthi benelise ukwenza okunengi ekutshumayeleni lokuthi baqinise amabandla. Ngomnyaka wenkonzo ka-2020, oFakazi bakaJehova basebenzisa imali ephose ifike 27 miliyoni dolazi benakekela abanali (US$27 000 000).

 Abanali bancede okungakanani emsebenzini wokutshumayela? UFrank Madsen, olilunga leKhomithi Yegatsha eMalawi, uthi: “Isibindi sabanali lobungcitshi babo ekutshumayeleni kuncede amabandla ukuthi aqalise ukutshumayela ezindaweni ezisebenzisa olunye ulimi kumbe ezinzima ukutshumayela kuzo. Kanti njalo ukubabona bezama ukufunda ulimi lwendawo abakuyo lamasiko kuyabakhuthaza abanye. Bakhuthaza abasakhulayo ukuthi babe senkonzweni yesikhathi sonke. Siyambonga uJehova ngokusinika abanali.”

 Ilunga leKhomithi Yegatsha yelinye ilizwe lithi: “Abanali benza sibone ukuthi abantu bakaJehova bamanyene emhlabeni wonke. Labantu abangasiboFakazi labo bayazibonela ukuthi asehlukaniswa yikutshiyana kwamasiko, kodwa simanyaniswa ngesikufunda eBhayibhilini.”

 Abanali babanceda njani abamemezeli abasemabandleni abakuwo? UPaulo ohlala eTimor-Leste, uyabonga kakhulu ngokwenziwa ngabanali abasebandleni lakhe. Uthi: “Indawo esihlala kuyo iyatshisa okuzwayo. Lanxa abanali bethu bevela endaweni eqandayo abakaze bayekele ukutshumayela ngenxa yokutshisa. Bahlala bekhona emhlanganweni wokuya ekutshumayeleni. Ngijayele ukubabona besiya empindelweni zabo emini litshisa bhe lantambama. Sebencedise abantu abanengi ukuthi bafunde iqiniso futhi babhabhathizwe, kuhlanganisa lami. Bakhuthele sibili ekukhonzeni uJehova futhi bayatshiseka. Lokhu kwenza ibandla lizimisele ukwenza okunengi ekukhonzeni.”

 UKetti oliphayona lesikhathi sonke eMalawi usitshela ngendlela abanali abanceda ngayo imuli yangakibo. Uthi: “Kwathi kufika abanali ebandleni lethu, kwakuyimi ngedwa uFakazi ngakithi. Kodwa bangincedisa kakhulu bacina sebezwanana lemuli yangakithi. Banceda abantwabami babona ukuthi ukukhonza uJehova kwenza umuntu athole intokozo yeqiniso. Sikhuluma nje amadodakazi ami amathathu asengamaphayona esikhathi sonke futhi umkami sewaqalisa ukungena imihlangano yebandla.”

 Imali esetshenziswa ukunakekela abanali ithathwa ngaphi? Ivela eminikelweni eyenziwa ngabafowethu emhlabeni wonke ngezindlela ezitshiyeneyo, okuhlanganisa eyenziwa ku-donate.isa4310.com. Siyalibonga kakhulu ngeminikelo yenu.