ISAHLUKO 35

Ngingenzani ukuze ngibe ngumngane kaNkulunkulu?

Inhlupho ezehlela uJeremy zamenza wananzelela ukuqakatheka kokuba ngumngane kaNkulunkulu. Uthi: “Ngathi ngileminyaka engu-12, ubaba wasibalekela. Ngikhumbula ngobunye ubusuku ngithandaza ngincenga uJehova ukuthi enze ubaba aphenduke ngekhaya.”

Ngenxa yobuhlungu ayebuzwa, uJeremy waqalisa ukubala iBhayibhili. Wathinteka kakhulu ngesikhathi ebala iHubo 10:14. Ivesi le ithi ngoJehova: “Ongelamandla uzilahla kuwe; wena ungumsizi wezintandane.” UJeremy uthi: “Ngakubona ukuthi uJehova wayengitshela ukuthi ungumsizi wami lokuthi unguBaba wami. Akula omunye ubaba ongcono kuloJehova!”

KUNGELANI lokuthi usesimeni esinjengesikaJeremy loba hatshi, iBhayibhili lithi uJehova uyafuna ukuthi ube ngumngane wakhe. Nanku elikutshoyo: “Sondelani kuNkulunkulu, laye uzasondela kini.” (UJakhobe 4:8) Cabanga ngokuthi ivesi le itshoni: Lanxa uJehova uNkulunkulu ephakeme futhi singenelisi ukumbona, uyakucela ukuthi ube ngumngane wakhe!

Kodwa kuzamele ukusebenzele ukuba ngumngane kaNkulunkulu. Ngokwesibonelo, nxa ufuna iluba likhule lilihle kuzamele ulihlanyele emhlabathini ovundileyo, uhlale ulithelela futhi ulihlakulela. Manje ungenzani ukuze uqhubeke uqinisa ubungane bakho loJehova?

Taditsha IBhayibhili

Ubungane buqiniswa yikuba lesikhathi sokuxoxa lesokulalela nxa omunye ekhuluma. Yikho lawe okumele ukwenze nxa ufuna ukuba ngumngane kaNkulunkulu. Mvumele akhulume lawe ngokubala iBhayibhili langokulitaditsha.—IHubo 1:2, 3.

Kodwa kungenzakala ukuthi awukuthandi kangako ukubala. Abasakhulayo abanengi bakubona kungcono ukuthi babukele i-TV, badlale imidlalo loba bazikwejisele labangane kulokuthi bafunde ngoNkulunkulu. Kodwa nxa ufuna ukuqinisa ubungane bakho loNkulunkulu, kuzamele umvumele akhulume lawe ngokutaditsha iLizwi lakhe.

Ukubala iBhayibhili akumelanga kube ngumthwalo onzima. Ungenelisa ukukukholisa lanxa ungabe ungakuthandi kangako ukubala. Okokuqala okumele ukwenze yikuhlela ukuba lesikhathi sokutaditsha iBhayibhili. Intombazana okuthiwa nguLais ithi: “Ngilohlelo lokubala isahluko esisodwa seBhayibhili nxa ngisanda kuvuka.” UMaria oleminyaka engu-15 yena uthi: “Ngilohlelo lokubala amavesi amalutshwana ngingakalali.”

Khangela ibhokisi elithi, “ Ongakwenza Ukuze Uzwisise OkuseBhayibhilini” ukuze ubone ukuthi kuyini okungakunceda ukuthi ukholise ukubala iBhayibhili. Bhala phansi isikhathi ohlele ukubala ngaso iLizwi likaNkulunkulu futhi uzame ukulibala okwemizuzu engaba ngu-30.

․․․․․

Zama ukulandela uhlelo lwakho lokubala iBhayibhili. Kodwa ekubaleni kwakho uzananzelela ukuthi ezinye izingxenye zeBhayibhili azilula ukuzwisisa. Uzavumelana loJezreel oleminyaka engu-11 owathi: “Amanye amavesi eBhayibhilini anzima ukuzwisisa njalo kawachazi.” Kodwa lokhu akutsho ukuthi sekumele ukhalale ukulibala. Okungakunceda ukuthi ukholise ukubala iBhayibhili yikukhumbula ukuthi uyabe ulalele umngane wakho uJehova uNkulunkulu ekhuluma lawe. Ungenza njalo uzabona ukuthi ukubala iBhayibhili kumnandi lokuthi kuyanceda kakhulu.

Thandaza

Nxa sithandaza siyabe sikhuluma loNkulunkulu. Umthandazo yisipho esihle kakhulu esisiphiwe nguNkulunkulu. Ungakhuluma loJehova uNkulunkulu ngaloba yisiphi isikhathi ngoba uhlala ezimisele ukukulalela nxa ukhuluma laye. IBhayibhili lithi: “Lingakhathazeki ngaloba yini, kodwa kukho konke bekani izicelo zenu kuNkulunkulu ngomthandazo langokumncenga kanye lokumbonga.”—KwabaseFiliphi 4:6.

Ivesi le ikwenza kucace ukuthi zinengi izinto ongazitshela uJehova. Ungamtshela inhlupho olazo, izinto ezikukhathazayo kumbe umbonge ngalokho akwenzele khona. Angithi labangane bakho uyababonga ngezinto ezinhle abakwenzela zona! Yikho ungakhohlwa lokubonga uJehova ngoba ukwenzele izinto ezinengi kakhulu ukwedlula loba nguphi umngane.—IHubo 106:1.

Bhala phansi ezinye izinto ofuna ukumbonga ngazo uJehova.

․․․․․

Akuthandabuzwa ukuthi ngezinye izikhathi uyake ukhathazeke. Nxa kungaba njalo khumbula amazwi akuHubo 55:22 athi: “Yethula iziswelo zakho kuJehova yena uzakusekela; akazukuyekela abalungileyo bawe.”

Bhala phansi loba yiziphi izinto ezikukhathazayo ofuna ukuziqamba emithandazweni yakho.

․․․․․

Nanzelela Izinto Ozenzelwa NguJehova

Kukhona okunye okungamelanga ukukhohlwe ngobungane bakho loNkulunkulu. Umhubi uDavida wathi: “Nambithani libone ukuthi uJehova ulungile.” (IHubo 34:8) Ngesikhathi uDavida ebhala ihubo leli wayephakathi kobunzima. Wayebalekela iNkosi uSawuli ngoba yayifuna ukumbulala futhi kwakungela eyinye indawo ayengacatsha kuyo ngaphandle kokuyacatsha phakathi kwezitha zakhe amaFilisti. UDavida wayesekhangelane lokufa sibili. Yikho wazenza umuntu ophambeneyo futhi lokho kwamnceda ukuthi angabulawa.—1 USamuyeli 21:10-15.

UDavida kazange enze angani ukusinda kwakhe kwakungenxa yenhlakanipho yakhe kodwa wanika uJehova udumo. Kuhubo elifananayo wathi: “Ngamdinga uJehova wangiphendula; wangikhulula kukho konke engangikwesaba.” (IHubo 34:4) Okwenzakala empilweni yakhe yikho okwamenza wathi “nambithani libone ukuthi uJehova ulungile.”

Kukhona yini okwake kwenzakala empilweni yakho okwakutshiya ungathandabuzi ukuthi uJehova ulendaba lawe? Kubhale emzileni ongaphansi lapha. Ozakubhala phansi akulandaba ukuthi yinto emangalisa kakhulu loba hatshi. Bhala lezinto ezingakhanya zizincane ozithola nsuku zonke.

․․․․․

Mhlawumbe wafunda iBhayibhili labazali bakho. Nxa kunjalo, kuqakathekise owakufundayo. Kodwa kumele wena ngokwakho ube ngumngane kaNkulunkulu. Amacebo esikhulume ngawo esihlokweni lesi azakunceda ukuthi ube ngumngane kaJehova njalo nxa ungawasebenzisa uzakubusisa. IBhayibhili lithi: “Qhubekani licela, lizaphiwa; qhubekani lidinga, lizathola.”—UMathewu 7:7.

 UMBHALO OKHOKHELAYO

“Bayathokoza abakunanzelelayo ukuthi kumele bakhokhelwe nguNkulunkulu.”—UMathewu 5:3

 ONGAKWENZA

Zama ukubala amakhasi amane eBhayibhili ilanga ngalinye. Umnyaka uyathi uphela uyabe usulibale waliqeda.

UBUKWAZI YINI . . .

Khona nje ukuthi ubala ibhuku leli elilamacebo athethwe eBhayibhilini lokuthi uyazama ukuwasebenzisa kutshengisa ukuthi uJehova ulendaba lawe.—UJohane 6:44.

ENGIFUNA UKUKWENZA!

Ukuze ngifunde okunengi eBhayibhilini ngiza ․․․․․

Ukuze ngithandaze zikhathi zonke ngiza ․․․․․

Engingathanda ukukubuza abazali bami ngendaba le yilokhu ․․․․․

UBONA NJANI?

● Ungenzani ukuze ukukholise ukubala iBhayibhili?

● Yindaba uJehova elalela imithandazo yethu lanxa silesono?

● Ungenzani ukuze uthuthukise imithandazo yakho?

[Umfanekiso osekhasini 291]

Ngisesemncane, ngangiphindaphinda izinto ezifananayo nxa ngithandaza. Kodwa khathesi sengisenelisa ukuthandaza ngezinto ezitshiyeneyo usuku ngalunye.’’—U-Eve

 [Bhokisi/​Umfanekiso osekhasini 292]

ongakwenza ukuze uzwisise okuseBhayibhilini

1. Khetha indaba eseBhayibhilini ofuna ukuyibala. Thandaza kuJehova umcele akuncedise uzwisise ozakubala.

2. Bala ungajahanga. Zama ukukubona ngelihlo lengqondo okubalayo. Zifake endabeni yakhona, uzwe abantu abakhulumayo, uhogele umoya olapho futhi unambithe ukudla abakudlayo. Yenza indaba oyibalayo iphile engqondweni yakho!

3. Cabangisisa ngalokho okubalileyo. Zibuze imibuzo enjengale:

 ● UJehova wayifakelani indaba le eLizwini lakhe?

● Yibaphi abantu engingafuna ukubalingisela njalo yibaphi abayizibonelo ezimbi?

● Yiziphi izifundo ezisendabeni le engingazisebenzisa?

● Indaba le ingifundisani ngoJehova langendlela enza ngayo izinto?

4. Thandaza kuJehova. Mtshele okufundileyo lokuthi ufisa ukukusebenzisa njani empilweni yakho. Mbonge ngaso sonke isikhathi uJehova ngenxa yeLizwi lakhe iBhayibhili.

[Umfanekiso]

“Ilizwi lakho liyisibane ezinyaweni zami liyikukhanya kwendlela yami.”—IHubo 119:105.

 [Bhokisi/​Umfanekiso osekhasini 294]

Izinto eziqakathekileyo kazize kuqala

Ubhizi kakhulu okokuthi kawusatholi isikhathi sokukhuleka lesokubala iBhayibhili yini? Izikhathi ezinengi uhlupho lolu lubangelwa yikwehluleka ukwenza izinto eziqakathekileyo kuqala.

Zama lokhu: Thatha ibhakede ufake amatshe amakhulu ubusuligcwalisa ngetshebetshebe. Kokubili kukwanile ebhakedeni lelo.

Thulula obekusebhakedeni ubusuphinda ukubuyisele. Kodwa khathesi qalisa ngokufaka itshebetshebe ucine ngamatshe. Yindaba amanye amatshe engasakwani? Lokhu kungenxa yokuthi khathesi uqale ngokufaka itshebetshebe ebhakedeni.

Ufundeni? IBhayibhili lithi: “Libe leqiniso lokuthi yiziphi izinto eziqakatheke kakhulu.” (KwabaseFiliphi 1:10) Nxa ungafaka kuqala izinto ezincane ezinjengokuzilibazisa kawusoze ube lesikhathi sokwenza izinto ezinkulu okutsho izinto eziphathelane lokukhonza. Kodwa ungenza okutshiwo liBhayibhili, uzathola isikhathi sokwenza izinto eziphathelane lokukhonza uphinde usale lesokuzilibazisa. Kuya ngokuthi uzaqala ngokufakani ebhakedeni lakho!

 [Umfanekiso osekhasini 290]

Njengeluba okumele liqhubeke linakekelwa, ubungane bakho loNkulunkulu kumele ubusebenzele