Ijkuak okintlajtlanijkej sekimej telpochmej uan ichpochmej tlen chantij ompa Estados Unidos kox motlatlaujtiaj, miakej okijtojkej motlatlaujtiaj, pero san sekimej nochipa ijkon kichiuaj. Sekimej motlajtlaniaj: “¿Moneki nimotlatlaujtis san para kuali nimomachilis uan nimoyolseuis?”.

•  ¿Tlen kijtosneki timotlatlaujtiskej?

•  ¿Melauak nechkaki toTajtsin Dios?

•  ¿Tlen uelis nikijtos ijkuak nimotlatlaujtis?

•  Tlen mokuayejyekouaj sekimej telpochmej uan ichpochmej

 Timotlatlaujtiskej kijtosneki timotlapouiskej iuan Jehová, akin okichijchi nochi tlen onka. Ximokuayejyeko, maski toTajtsin Dios ueyititok, “amo wejka kajki de [...] tinochteh” (Hechos 17:27). Biblia techiluia ma timotokikan inauak Dios uan ye motokis tonauak (Santiago 4:8).

 ¿Tlen moneki tikchiuas para kuali timouikas iuan toTajtsin Dios?

•   Ijkuak timotlatlaujtia, timotlapouia iuan toTajtsin Dios.

•   Ijkuak timomachtia Biblia, yetoskia ken Jehová “mitstlapouia”.

   Tla nochipa timotlatlaujtis uan timomachtis Biblia, okachi kuali timouikas iuan toTajtsin Dios.

 Se telpochtli tlen itoka Jeremy okijto: “Timotlapouiskej iuan Jehová se ueyi tlateochiualistli”.

 Se ichpochtli tlen itoka Miranda okijto: “Ijkuak nikiluia Jehová ken nimomachilia okachi kuali iuan nimouika”.

 Maski tiktlatlaujtia toTajtsin Dios, xamo ualeua timotlajtlania kox melauak mitskaki. Biblia kijtoua Jehová kinkaki akinmej kitlatlaujtiaj (Salmo 65:2). Jehová kineki xikilui nochi tlen mitstekipachoua. ¿Tleka? Porque ye kitekipachoua tlen mitspanoua (1 Pedro 5:7).

 Ximokuayejyeko: ¿Mitspaktia timotlapouis inmiuan moyolikniuan? Noijki uelis timotlapouis iuan toTajtsin Dios. Nochipa iuan ximotlapoui uan xiknotsa ika itoka, Jehová (Salmo 86:5-7; 88:9). Biblia mitsyoleua nochipa xiktlatlaujti toTajtsin Dios (1 Tesalonicenses 5:17).

 Se telpochtli tlen itoka Moises okijto: “Ijkuak niktlatlaujtia toTajtsin Dios iuan nimotlapouia uan nikiluia nochi tlen nikmachilia”.

 Se ichpochtli tlen itoka Karen okijto: “Nikiluia Jehová tlen nechtekipachoua uan tlen nechpaktia, ijkon ken nikiluiskia nonantsin uan akinmej inmiuan nimouika”.

 Biblia kijtoua: “Amitla manomechtekipacho, yej nochipa xikilikah n Toteko [toTajtsin Dios] tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah” (Filipenses 4:6).

 ¿Uelis tikiluis tlen mitstekipachoua? ¡Kema! Biblia techiluia: “Xikmaka Jehová motlamamal uan ye mitspaleuis” (Salmo 55:22).

 Pero amo san xikilui tlen mitstekipachoua, se ichpochtli tlen itoka Chantelle okijto: “Amo kuali nikchiuas tla san niktlatlaujtis Jehová ijkuak nikneki ma nechpaleui”. Noijki okijto: “Ne nimokuayejyekoua achto moneki tiktlasojkamatiliskej uan onka miak tlamantli tlen uelis tiktlasojkamatiliskej toTajtsin Dios”.

 Ximokuayejyeko: ¿Tlen uelis tiktlasojkamatilis toTajtsin Dios? Itech nin tonal ximokuayejyeko eyi tlamantli tlen uelis tiktlasojkamatilis.

 Se ichpochtli tlen itoka Anita okijto: “Noijki uelis tiktlatlaujtiskej Jehová para tiktlasojkamatiliskej ijkuak tikitaj se xochitl”.

 Se telpochtli tlen itoka Brian okijto: “Ximokuayejyeko itech se texto tlen mitspaktia noso itech itlaj tlen Jehová okichijchi uan mitstlajtlachialtia. Satepan xiktlasojkamatili”.