Itech Biblia, tlajtoli alma ika hebreo motlajtolkopa néfesch uan ika griego psykjé. Ika tlajtoli hebreo kijtosneki “itlaj tlen mijyotia” uan ika griego kijtosneki “ikaj yoltok”, noso “se tlakatl”. a Ik non, tlajtoli alma kijtosneki ijkuak ikaj yoltok uan amo kijtosneki itlaj kisa ijkuak ikaj ixpoliui. Ma tikitakan seki textos tlen ijkon kiteititiaj.

•   Ijkuak Jehová okichijchi achto tlakatl, Adán, Biblia kijtoua: “Tlakatl omochi se yolilistli” (Génesis 2:7). Nin kijtosneki Adán amo okiseli se alma, ye omochi se alma noso se tlakatl tlen yoltok.

•   Biblia kijtoua se alma uelis kikitskis se mikatl (Levítico 5:2, Jünemann), tlakuas (Levítico 7:20, Katznelson), tekipanos (Levítico 23:30, Huerin), kileuis nakatl (Deuteronomio 12:20, Nácar-Colunga, 1974) uan kintlakamatis tlanauatilmej (Romanos 13:1, Reina-Valera, 1909). San se tlakatl uelis kichiuas nochi nin tlamantli.

¿Alma nochipa yoltok?

 Amo. Alma, kema miki. Miakej textos ijkon kiteititiaj, ma tikitakan.

•   Biblia kijtoua: “Alma tlen tlajtlakolchiuas ye mikis” (Ezequiel 18:4, 20, La Biblia de las Americas).

•   Ijkuak se israelita okichiuaya se ueyi tlajtlakoli, tlanauatil okijtouaya “non alma moneki kixpoloskej” (Éxodo 12:15, 19; 31:14, Reina-Valera, 1909; Levítico 7:20, 21, 27, Biblia de Ferrara). Levítico 19:8, itech versión La Biblia de las familias católicas noijki kijtoua: “Non alma mikis”.

•   Itech seki versículos tlen ijkuilitok itech Biblia kijtoua: “Alma yoixpoliuik” (Levítico 21:11; Números 6:6). Maski itech seki Biblias kitlajtolkopa ken “tlalnakayo tlen omikik” noso “ikaj yoixpoliuik”, itech textos tlen ijkuilitok ika hebreo kijtoua néfesch uan nin tlajtoli kijtosneki “alma”.

Alma uan yolilistli

 Itech Biblia, alma kijtosneki ijkuak ikaj yoltok. Itech Job 33:22 ika tlajtoli hebreo “alma” (néfesch), kijtosneki “yolilistli” uan ijkuak ikaj yiixpoliuiskia, Biblia kijtoua “alma” yiixpoliuiskia (Éxodo 4:19; Jueces 9:17; Filipenses 2:30).

 Tla tikajsikamatij tlen kijtosneki tlajtoli alma, techpaleuis ma tikajsikamatikan okseki versículos. Itech Génesis 35:18 kijtoua ialma se siuatl “yokistoka”, noso ken kijtoua Biblia Torres Amat, siuatl “yokikixtijtoka ialma”. Tlen ompa kijtoua techpaleuia ma tikajsikamatikan siuatl yiixpoliuiskia. Ik non, itech nin versículo seki Biblias kitlajtolkopaj, siuatl “saiktlami omijyoti” (La Biblia Latinoamérica, 2011).

¿Ken opejki kineltokaj alma nochipa yoltok?

 Miakej religiones kineltokaj alma amo miki, pero amo ijkon tlamachtia Biblia, nin tlamantli otlamachtijkej griegos tlen yiuejkika okatkaj. Diccionario enciclopédico del Cristianismo kijtoua: “Yiuejkika griegos okineltokayaj tlakatl okipiaya itlalnakayo (sōma) uan noijki okipiaya se alma (psyché). Pero Biblia amo ijkon tlamachtia amo kijtoua tikpiaj ome tlamantli, ompa kijtoua tlakatl ye alma”.

 ToTajtsin Dios amo kipaktia ma kinelokan tlen tlamachtia Biblia ika tlen kineltokaj sekimej, ken ijkuak kijtouaj alma amo miki. Biblia kijtoua: “Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati, porke yejwah amo kitemachtiah itlajtol Cristo, yej san tlan kiyejyekoliah n tlaltikpaktlakah” (Colosenses 2:8).