TLAMACHTIL TLEN IKA PEUA
¿Akinmej iTlaixpantijkauan Jehová?
“Yiuejkika nikixmati Mike. Ye iTlaixpantijka Jehová, amo nikmati miak tlamantli itech itlaneltokilis. ¿Akin Jehová? ¿Tleka yejuan amo iluichiuaj? Onechtekipachoaya miak pampa Mike okatka itech se secta.” (Becky, de California, Estados Unidos)
“Akinmej chantij ik nokalijtik opejkej momachtiaj iuan iTlaixpantijkauan Jehová uan onimokuayejyeko: ‘¡Nin tlaneltokilistli amo kualtsin itoka! ¿Tlen kijtosneki?’” (Zenon, de Ontario, Canadá)
“Nosiua uan ne otikneltokayaj iTlaixpantijkauan Jehová san otechualtlajpaloayaj pampa amo kuali otimomachiliayaj pampa amo otiayaj teopan. Uan noijki otikneltokayaj tla itech okseki tlaneltokalismej tlen okachi moixmatij amo otikajsikej tlen otiktemoayaj, amo tikajsiskiaj itech se secta tlen amo okachi moixmati, ken iTlaixpantijkauan Jehová.” (Kent, de Washington, Estados Unidos)
“Ne nion onikmatiaya akinmej yejuan nion tlen okineltokayaj.” (Cecilie, de Esbjerg, Dinamarca)
Uelis yotikinmitak tetlapouiaj itech inkalijtik tlaltikpaktlakamej uan itech ojtli, kintemakaj amatlajkuilolmej tlen techtlapouiaj itech Biblia uan kinmachtiaj tlaltikpaktlakamej pero amo kintlaxtlauiaj. Uelis revista tlen tikpia omitsmakak se iTlaixpantijka Jehová. Pero uelis noijki timokuayejyekoa ken tlaltikpaktlakamej tlen moijtoa tlakpak, uan uelis timotlajtlania: “¿Akinmej iTlaixpantijkauan Jehová?”.
Tla amo tikmati akinmej iTlaixpantijkauan Jehová, ¿tlen uelis tikchiuas? ¿Kanin uelis tiktemos tlen kineltokaj? ¿Kanin kisa tomin tlen ika tetlapouiaj uan kinchijchiuaj kalmej kanin monechikoaj? ¿Uan tleka tetlapouiaj itech ojtli uan itech inkalijtik tlaltikpaktlakamej?
Cecilie, tlen itech otimotlapouijkej kijtoa: “Itech Internet oniktlajtolti miak tlamantli itech iTlaixpantijkauan Jehová. Onikak miak tlamantli tlen amo melauak, non okichi amo kuali ma nimokuayejyeko itech yejuan”. Pero ijkuak omotlapoui iuan iTlaixpantijkauan Jehová, okimatki tlen melauak itech yejuan.
Tla tikneki tikmatis okachi itech iTlaixpantijkauan Jehová, ¿tleka amo tikintlajtlania yejuan? Yejuan kichijchiuaj nin revista uan yejuan mitsiluiskej tlen melauak itech nochi tlen tikintlajtlanis (Proverbios 14:15). Tikneltokaj tlen axkan tiktlajtoltis mitspaleuis xikmati akinmej yejuan, tlen kineltokaj uan tlen kichiuaj.
