¿Akin itlajtlakol tla toTajtsin Dios amo techtlajyouiltia? ¿Tleka miakej apismiki noso tleka amo itlaj kipiaj? ¿Tleka sapanoa onka guerras, kokolistli uan tlaxixini? ITlajtol toTajtsin Dios kiyekijtoa eyi tlamantli tleka titlajyouiaj:

1. Sekimej san intech motekipachoaj, tlaixnekij uan tekokoliaj. “Nochtin san nochipa motlajyouiltiaj ijkuak san yejuan monauatiaj” (Eclesiastés 8:9). Miakej san intech motekipachoaj, ik non, sapanoa kintlajyouiltiaj oksekimej.

2. Ualeua techpanoa itlaj tlen amo tikchiaj. Biblia kijtoa titlajyouiaj porque “tlamantli tlen amo tikchiaj, nochtin uelis techpanos” (Eclesiastés 9:11). Uelis itlaj techpanos porque xamo tikatej kanin amo tikmatij tlen panos, amo kuali titlachiaj kanin tiauij noso ualeua tikchiuaj tlen amo kuali, ik non, itlaj techpanoa.

3. Satanás tlanauatia. Biblia kijtoa Satanás kichiua ma titlajyouikan. Kijtoa: “Nochteh n tlaltikpaktlakah non amo kineltokah Dios kinnawatijtok n satanás” (1 Juan 5:19). Satanás noijki moixmati ken Diablo uan kipia chikaualistli uan noijki okatka se ángel pero “amo kixmati tlan milák” (Juan 8:44). Oksekimej ángeles tlen noijki san intech omotekipachoayaj okipaleuijkej Satanás uan ijkon omochijkej amo kuali ejekamej (Génesis 6:1-5). Ijkuak Satanás uan amo kuali ejekamej okixnamikej Jehová, opejkej kichiuaj miak tlamantli para ma kintlakamatikan tlaltikpaktlakamej uan axkan okachi mota tlen amo kuali kichiuaj. Diablo sapanoa kualani uan “kinkajkayawa nochteh n tlaltikpaktlakah”. Ik non, Biblia kijtoa: “¡Miálmasteh akimeh chantitokeh ipan tlaltíkpaktli iwa itech weyi atl!” (Apocalipsis 12:9, 12). Satanás amo kuali iyelis uan kipaktia techtlajyouiltis. Amo itlajtlakol toTajtsin Dios.

XIMOKUAYEJYEKO: Akin amo kuali iyelis uan amo tetlasojtla kintlajyouiltia akinmej amo itlaj intlajtlakol. Pero toTajtsin Dios “Ye n tlasojtlálistli” (1 Juan 4:8). Ik non, toTajtsin Dios amo kichiua tlen amo kuali (Job 34:10).

Pero xamo timotlajtlania: “¿Kox ajsis tonal toTajtsin Dios kipojpolos Satanás uan nochtin tlen kipaleuiaj?”. Yotimomachtijkej toTajtsin Dios amo kipaktia tlen amo kuali uan sapanoa moyolkokoa ijkuak kita titlajyouiaj. Uan Biblia techiluia ma tikiluikan toTajtsin Dios nochi tlen techpanoa porque ye totech motekipachoa (1 Pedro 5:7). Itech okse tlamachtil tikitaskej seki tlamantli tlen kiteititia toTajtsin Dios techtlasojtla uan noijki kipia chikaualistli para kitlajtlamis nochi tlen techtlajyouiltia. *