¿Tlen itoka toTajtsin Dios? Ye kijtoua: “Ne niJehová. Ijkon notoka” (Isaías 42:8). Itech Biblia itoka toTajtsin Dios ijkuilitok kanaj siete mil veces. Pero miakej akinmej kitlajtolkopaj Biblia san kijkuilouaj toTeko. ToTajtsin Dios kineki iuan ximouika uan xiknotsa ika itoka (Salmo 105:1).

Kinotsaj ika okseki tlajtolmej. Biblia kijtoua Jehová noijki kinotsaj ika ninmej tlajtolmej: “toTajtsin Dios”, “akin kipia sapanoua miak chikaualistli”, “akin otlachijchi”, “toTajtsin”, “toTeko” uan “san ye ueyi tekiua”. Noijki Biblia kijtoua itekipanojkauan ijkuak okitlatlaujtiayaj okiluiayaj se tlajtoli tlen yotikijtojkej uan noijki okinotsayaj ika itoka (Daniel 9:4).

 ¿Ken iyelis toTajtsin Dios? ToTajtsin Dios ye se espíritu (Juan 4:24). Biblia kijtoua: “Amaka tlakatl yokitak Totajtsi Dios” (Juan 1:18). Noijki kijtoua ye nochi kimachilia. Uelis kiyolpaktis tlen tikchiuaj noso uelis kiyolkokos (Proverbios 11:20; Salmo 78:40, 41).

Kipia kualtsin iyelis. ToTajtsin Dios amo techchikoita maski tlatlamantli toaltepe uan maski tlatlamantli otechiskaltijkej (Hechos 10:34, 35). Noijki teiknomati, kimati mochias, tetlasojtla uan nochipa kijtoua tlen melauak (Éxodo 34:6, 7). Pero kipia naui tlamantli tlen okachi kiteititia sapanoua kualtsin iyelis.

Kipia chikaualistli. Ye kipia sapanoua miak chikaualistli. Kijtosneki amo kipoloua chikaualistli para kichiuas tlen ye kineki (Génesis 17:1).

Ixtlamatki. Amikaj okachi ixtlamatki ken toTajtsin Dios. Ik non, Biblia kijtoua san ye “saikpanoa ixtlamati” (Romanos 16:27).

Kichiua nochi ika melajkayotl. Ye nochipa kichiua tlen kuali. “Melauak nochi kuali tlen kichiua” uan “amo keman kichiua tlen amo melauak” (Deuteronomio 32:4).

Tetlasojtla. Biblia kijtoua toTajtsin Dios ye “tlasojtlálistli” (1 Juan 4:8). Ye ijkon iyelis uan amo san kiteititia tetlasojtla. Sapanoua tetlasojtla uan mota itech nochi tlen kichiua uan non sapanoua techpaleuia.

ToTajtsin Dios kineki touan mouikas. Ye ‘Totajtsi Dios non moitstika ilwikak’ (Mateo 6:9). Tla tikneltokaj tlen techiluia, uelis iuan timouikaskej (Salmo 25:14). Kitekipachoua tlen techpanoua uan kineki iuan ma timouikakan. Ik non, kineki ma tiktlatlaujtikan uan ma tikiluikan nochi tlen techtekipachoua (1 Pedro 5:7; Santiago 4:8).

Jesús amo toTajtsin Dios. ToTajtsin Dios iselti okichijchi Jesús. Ik non, Biblia kijtoua Jesús “Ye ikone n Totajtsi Dios” (Juan 1:14). Jehová okichijchi Jesús uan moixmati ken itlayekankone. Satepan okijto okatka “kuali itekipanojka”. Okilui iKone ma kipaleui ma kichijchiuakan semanauak uan nochi tlen yoltok (Proverbios 8:30, 31; Colosenses 1:15, 16).

 Jesús amo keman okijto ye toTajtsin Dios. Ye okijto: “Inawak oniwala, iwa Ye onechaltítlanki” (Juan 7:29). Se tonal ijkuak omotlapouijtoka iuan se siuatl okilui, Jehová “notajtsi, Akin noiwa Nomotata, íwa Nodios, akin noiwa Nomodios” (Juan 20:17). Ijkuak omikik Jesús, Jehová okiyoliti uan oyajki iluikak. Okinauati ma motlali iyekma uan okilui ma tlanauati (Mateo 28:18; Hechos 2:32, 33).

Jesucristo mitspaleuis ximouika iuan toTajtsin Dios

Ye ouala tlaltikpak otechititiko ken iyelis iTajtsin. Jehová okijto: “Ye ni Nokone non niktlasojtla, xikkakikah” (Marcos 9:7). Jesús ye okachi kixmati toTajtsin Dios. Okijto: “Amaka kimati Akin Notajtsi, sanwel n Tekone kimati iwa akimeh Ye kinekis kinmixmatiltis” (Lucas 10:22).

Jesús kiteititia ken iyelis toTajtsin Dios. Kuali okiteititi ken iyelis iTajtsin ijkuak okijto: “Akin yonechitak kijtosneki yokitak Notajtsi” (Juan 14:9). Jesús miakej okinpaleui ma mouikakan iuan toTajtsin Dios porque kualtsin okintlapouiaya uan ijkon okiteititi toTajtsin Dios okintlasojtlaya. Ye okijto: “Ne Ni ojtli nontewika inawak Dios, Ne nomechnonotsa ika milák tlájtoli, iwa Ne Akin kichiwa xiyolitokah. Sanwel akin nechtlakita weletis kalakiti inawak Notajtsi” (Juan 14:6). Noijki okijto: “Akinmej melauak kiueyichiuaj toTajtsin, kiueyichiuaskej ika espíritu uan ika melauak. Porque toTajtsin kintemoua akinmej ijkon kichiuaj para ma kiueyichiuakan” (Juan 4:23, TNM). ¡Ximokuayejyeko! Jehová kintemoua akinmej kinekij kixmatiskej ijkon ken tejuatsin.