Marzo 2020, Organización Mundial de la Salud okijto opejki kokolistli COVID-19. Amo omokuayejyekojkej non kokolistli miakej kinmajsiskia. Miakej iTlaixpantijkauan Jehová uan akinmej amo tlajyouiaj, moyolkokouaj uan amo kipia miak tomin. ¿Tlen yokichijkej miakej iTlaixpantijkauan Jehová para kinpaleuiskej tokniuan?

 Itech nochi tlaltikpak katej kanaj 950 grupos akinmej tlapaleuiaj ijkuak tlaxixini, kinpaleuiaj tokniuan tlen tlajyouiaj ika COVID-19 uan tokniuan tlen pouij itech Cuerpo Gobernante tlen kinyekanaj iTlaixpantijkauan Jehová kitaj ken tlapaleuia. Itech seki altepemej kinpaleuia tokniuan tlen tlajyouiaj uan itech okseki altepemej tekiuajkej kinpaleuiaj. Akinmej tlapaleuiaj ijkuak tlaxixini sapanoua yotlapaleuijkej.

 Matikitakan tlen opanok Paraguay. Se periódico kijtoua, ika COVID-19 miakej amo kipiaj tlen kikuaj. Pero tokniuan akinmej tlapaleuiaj ijkuak tlaxixini ompa Paraguay opejki kinuikilia tokniuan tlen moneki, okinmakayaj seki tlamantli para ome semanas, yetoskia ken okinmakayaj tokniuan kanaj 600 pesos (30 dólares). Okinmakayaj tlen kikuaskej, seki tlamantli para maltiskej uan tlachipauaskej, tlen okinmakayaj okinpaleuiayaj naui tlen opouiayaj itech se familia.

 ¿Ken momaluiaj tokniuan akinmej tlapaleuiaj ijkuak tlaxixini? Kimotlaliliaj mascarillas uan amo sapanoua motokiaj innauak oksekimej. Noijki kitaj matlachipauakan kanin tekipanouaj akinmej kinnemakiltiaj tlen ika tlakualchiuaskej. Noijki kitaj makichipauakan incarros uan makipiakan nochi tlen moneki para amo makinmajsi COVID-19. Ijkuak kinmakaj tokniuan tlen okinemakiltijkej amo sapanoua innauak motokiaj.

 Enero 2021, Comité de Coordinadores okinkauilijkej makitekitiltikan kanaj 500 millones de pesos mexicanos (25 millones de dólares) para kinpaleuiskej tokniuan tlen omokokojkej ika COVID-19. Kalmej Betel uan tokniuan tlen tlayekanaj ijkuak tlaxixini kuali kitekitiltiaj tomin tlen kitemakaj tokniuan uan kikouaj seki tlamantli tlen amo okachi patio. Ompa Chile tokniuan tlen kinyekanaj akinmej tlapaleuiaj ijkuak tlaxixini, okinekiaya kikouaskej kanaj 750 kilos lentejas. Pero san itech se metstli lentejas opejki kinemakaj okachi patio, ik non, tokniuan ayakmo okikojkej. Opanok ome hora uan okinmiluijkej se tlakatl okikopato lentejas tlen yokikojka. Satepan okinnemakiltijkej tokniuan tlen okikopato tlakatl, okitlaxtlajkej ken achto okinmiluijka.

 Ijkuak tokniuan okitemoto lentejas, tlakatl ayakmo okinekiaya kinemakiltis, okijto okichijkej ken okseki religiones porque amo okinxexeliliaya oksekimej ken moneki. Se tokni san niman omotlatlaujti, satepan okilui tlakatl okinpojkej tokniuan tlen okachi omonekiaya makinpaleuikan. Noijki okilui tokniuan tlatlamantli inmialtepe, ik non, ijkuak okiyektlalijkej tlen kinuikiliskia, okitlalijkej tlen okachi kinpaleuiskia. Satepan okilui nochtin tokniuan kitemakaj tomin uan tlapaleuiaj ika nochi inyolo. Tlakatl sapanoua omotlajtlachialti ijkuak okimatki. Ik non, okinkauili tokniuan makitlaxtlauilikan ken yokinmiluijka, noijki satepan ye okitetliokoli kanaj 400 kilos lentejas.

 Se tokni tlen yikipia miak xiuitl, itoka Lusu oixpoliuik inamik uan chanti Liberia iuan makuili ifamiliares. Se tonal ijkuak otlakuajtokaj uan omomachtijtokaj amochtli: “Nochipa ma timomachtikan iTlajtol toTajtsin Dios”, ixui Lusu tlen okipiaya chikome xiuitl okitak ayakmo okipiayaj tlen kikuaskej, ye okijto: “¿Axkan tlen tikkuaskej?”. Lusu okilui amo mamotekipacho porque yokitlatlaujtijka Jehová uan okineltokaya ye kinpaleuiskia makipiakan tlen kikuaskej. Non tiotlak tlayekankej okinotskej uan okiluijkej kimakaskia tlakuali. Ye okijto: “Axkan noxui okachi kineltoka Jehová techkaki ijkuak tiktlatlaujtiaj porque okitak ken onechnankili”.

 Se siuatl tlen chanti innauak tokniuan ompa República Democrática del Congo. Ijkuak okitak ken tokniuan okiseliaya tlakuali tlen oksekimej tokniuan okinmakayaj, ye okijto: “Ijkuak matlami kokolistli COVID-19 timochiuaskej iTlaixpantijkauan Jehová”. Inamik okilui: “¿Timochiuas iTlaixpantijka Jehová san porque techtliokoliskej tlen tikkuaskej?”. Siuatl okijto: “Amo, yejuan kitetliokoliaj porque melauak tetlasojtlaj”.

 Ijkuak namejuan nankitemakaj namotomin ika nochi namoyolo, iTlaixpantijkauan Jehová ueli kinpaleuiaj oksekimej, axkan ijkuak panotok kokolistli COVID-19. Timechtlasojkamatiliaj miak porque nankitemakaj namotomin itech donate.isa4310.com.