Amo, amo tikneltokaj nejon. Maski tiitaixpantijkauan Jiova senkis tikneltokaj ke Dios kichijchiuak nochi, amo tikneltokaj ke tachijchiuak itech chikuasen tonalmej. ¿Keyej? Porin akin kineltokaj nejon kinemiliaj seki taman tein amo mouika iuan tein tamachtia Biblia. Maj tikitakan ome taman.

1.   ¿Kanachi uejkauak chikuasen tonalmej keman Dios tachijchiuak? Sekin akin kipiaj nejon taneltokalis kijtouaj ke chikuasen tonal keman Dios tachijchiuak sejse uejkauak 24 horas. Sayoj ke itech Biblia, tajtol tonal uelis kijtosnekis okachi miak tiempo (Génesis 2:4; Salmo 90:4).

2.   Xiujmej tein kipia taltikpak. Okse taman tein kineltokaj yejua ke taltikpak kipia sayoj seki miles xiujmej keman Dios kichijchiuak. Sayoj ke, Biblia kijtoua ke taltikpak uan nochi iluikak moajsiajya achto ke peuaskiaj chikuasen tonal keman Dios tachijchiuak (Génesis 1:1). Yejua ika, tiitaixpantijkauan Jiova tikneltokaj tein kiajsinij tamatinij tein kinextia ke taltikpak uelis kipias tel miak millones xiujmej keman Dios kichijchiuak.

 Maski tiitaixpantijkauan Jiova tikneltokaj ke Dios tachijchiuak, amo tikixnamikij tein kiajsinij tamatinij. Ta, tikyekmatij ke tein Biblia tamachtia mouika iuan tein kiajsinij tamatinij.