“Akin tetakachiuaj, kinyekitaj oksekin” (UNESCO Declaration of Principles on Tolerance, 1995).

 Akin amo tetakachiuaj, amo kinyekitaj oksekin uan uelis kinchikoitaskej. Akin ijkon kiyolmachilia uelis teijtouilis tein teyolkokoj uan tetauelitas.

 Sayoj ke tataman tein kinemiliaj ke kijtosneki se tetakachiuas. Sekin kinemiliaj ke akin tetakachiua moneki kiitas ke kuali yetok tein kichiua aksa oso ke kuali yetok kemej monejnemiltia. Oksekin kinemiliaj ke moneki se kichiuas kemej kijtoua Biblia: ke akin tetakachiua kimati ke sejsemej kiixpejpenaj toni kineltokas uan toni kitayekanaltis, maski kiitas ke amo kuali yetok tein kiixpejpena aksa.

 ¿Uelis axkan techpaleuis Biblia maj yekmelauj tikintakachiuakan akin yeski?

Tein kijtoua Biblia

 Biblia kijtoua maj titetakachiuakan. Kijtoua: “Maj nochin kimatikan ke namejuan amo nankitemouaj maj nochipa mochiua tein nankinemiliaj” (Filipenses 4:5). Biblia techiluia maj tikinyekitakan oksekin, maj tikualtakamej iniuan uan maj amo tikinchikoitakan. Akin kitakamatij nejin tajtolmej xa amo kitayekanaltiaj tein yejuan kitayekanaltiaj sayoj ke amo kintsakuilia maj kiixpejpenakan tein kinekiskej.

 Yejua Dios techiluia itech Biblia keniuj moneki timonejnemiltiskej. Kijtoua: “[Dios] mitsiluij, tejua takat, tein kuali” (Miqueas 6:8). Dios techiluia tein techpaleuis maj kuali tietokan (Isaías 48:17, 18).

 Dios amo techmaka tanauatil para tikijtoskej ke kuali oso amo kuali yetok tein kichiuaj oksekin. Biblia kijtoua ke “Dios kiixtalia tanauatilmej uan sayoj yejua Juez [...]. ¿Toni tichiujkej tejua para tikijijtos mokniuj?” (Santiago 4:12). Dios techkaua maj tosejselti tikixtalikan keniuj timonejnemiltiskej uan tisejsemej titanankiliskej iixpan ika tein tikchiuaskej (Deuteronomio 30:19).

Biblia techiluia maj titetakachiuakan

 Biblia techiluia: “Xikintakachiuakan nochin” (1 Pedro 2:17). Yejua ika akin kichiuaj tein Biblia tayolmajxitia kintakachiuaj akin yeski, maski taman tein kineltokaskej oso taman kemej nemiskej (Lucas 6:31). Akin tetakachiuaj kemej Biblia techiluia, amo kijtosneki ke kiitaj ke kuali yetok nochi tein kineltokaj oso kinemiliaj oksekin oso ke kinpaleuitij itech nochi taman tein kiixtaliskej kichiuaskej. Maski ijkon, amo kinchikoitaj, ta mochikauaj kichiuaskej kemej Jesús mouikak iniuan nochin.

 Kemej neskayot, se tonal Jesús moajsik iuan se siuat akin kipiaya se taneltokalis tein yejua kiluiskia ke amo kuali yetoya. Nejin siuat no nemia iuan se takat akin amo katka itakauj, se taman tein yejua amo no kiluiskia ke kuali yetoya. Maski ijkon, kinextij ke kitakachiuak keman tajtoj iuan (Juan 4:9, 17-24).

 Akin kichiuaj kemej Jesús, no kinmelauiliaj akin kinekij kimatiskej keyej ijkon taneltokaj, sayoj ke kimelauaj kemej kinextis ke kintakachiuaj (1 Pedro 3:15). Biblia kiniluia maj amo kinchiualtikan oksekin maj kineltokakan tein yejuan kineltokaj. Ta kijtoua ke se akin kichiua kemej Cristo “amo moneki moteuis, ta moneki yeski kualtakat iniuan nochin” maski taman tein kineltokaskej (2 Timoteo 2:24).

Biblia amo kijtoua maj titetauelitakan

 Biblia techiluia: “Xiktemokan kuali namouikaskej iniuan nochin” (Hebreos 12:14). Akin kitemoua kuali mouikas iniuan oksekin, amo tetauelita. Maski amo kiitas ke kuali yetok tein oksekin kiixpejpenaj, kitemoua kuali mouikas iniuan nochin (Mateo 5:9). Tein melauj, Biblia no techiluia maj tikintasojtakan akin techtauelitaj, tein kijtosneki ke kualtakamej iniuan maski techchiuiliskej tein amo kuali (Mateo 5:44).

 Semi melauak ke Biblia kijtoua ke Dios kitauelita akin kichiua tein amo kuali oso kichiua tein kintajyouiltia oksekin (Proverbios 6:16-19). Sayoj ke tajtol tein nikan mokui itech Biblia, kiteajsikamatiltia ke kitauelita oso amo kiyolpaktia tein amo kuali tein kichiua. Biblia kijtoua ke Dios kinejneki kitapojpoluis akin moyolpata uan kipaleuis maj kipata inemilis kemej kijtoua itanauatiluan (Isaías 55:7).

Okseki tajkuilolmej tein no kijtoua maj se tetakachiua uan maj se kinyekita nochin

 Tito 3:2: “Maj amo kitemokan maj nochipa mochiua tein kinemiliaj uan maj nochipa yolnejmachmej iniuan nochin”.

 Mateo 7:12: “Xikinchiuilikan oksekin nochi tein nankiuelitaskiaj maj namechchiuilikan”.

 Josué 24:15: “Axkanya xikixtalikan akoni nankitekitiliskej”.

 Hechos 10:34: “Dios amo techichikotasojta”.

 Habacuc 1:12, 13: ‘[Dios] amo kixikoua maj mochiua tein amo kuali’.

 Romanos 12:19: “Xikauakan maj Dios kinexti iueyi kualanyo. Porin ijkuiliujtok: ‘Jehová a kijtoua: “Nejua nimomakepas; nejua nikinmakas tein kinnamiki”’”.

 Jehová amo techmaka tanauatil para timomakepaskej. ToDios kiitas maj momelaua kemej kinamikis tein amo kuali tein techchiuilianij. Para tikonmatis okachi, xikonlero tamachtilis “¿Alguna vez se hará justicia en el mundo?”.