¿Katka taixejekol maj David kineltokani ke Dios ika motekipachouaya? ¿Moka motekipachoua Dios? Miakej kintelouijmaka kineltokaskej ke Dios, akin nochi ueli kichiua, ininka motekipachoua. ¿Keyej?

Se taman, porin kijtouaj ke Dios okachi ueyichiujkej ke taltikpakneminij. Yejuatsin semi ueyichiujkej, yejua ika iixpan “altepemej tamatij kemej sentachalan at itech se atakuiloni; uan kemej kanauak talnex itech balanza” (Isaías 40:15). Yejua ika, se tajkuilojkej akin amo kineltoka ke Dios nemi senkis kijtoj: “Se kinextijtoskia ke se motelueyineki komo se kineltoka ke moajsi se dios akin kitekipachoua tein tikchiuaj”.

Uan no, sekin kimachiliaj ke ika tein kichiuaj amo kinnamiki maj Dios kinpaleui. Kemej neskayot, se takat akin monotsa Jim kijtoua: “Nochipa niktajtaniaya Dios maj nechpaleuiskia maj niktsakuiliskia nokualanyo, sayoj ke satepan oksepa niman nitelkualania. Yejua ika niknemilij ke tel amo niyolkuali katka uan nion Dios ueliskia nechpaleuis”.

¿Tel uejka moajsi Dios uan amo ueli techita? ¿Keniuj kinita taltikpakneminij tajtakouanij? Ika inepaleuil Dios uelis tikajsiskej tanankililmej. Itech Biblia, iTajtol Dios tein moijkuiloj ika ichikaualis, yejuatsin techyekiluia ke amo uejka moajsi uan ke toka motekipachoua. Hechos 17:27 kijtoua: “[Dios] amo uejka yetika de cada senme de tejuan”. Itech nejin naui tamachtilismej, tikitaskej toni tamachtia Biblia ika nejin taman uan keniuj Dios kinextia ke ininka motekipachoua taltikpakneminij, tein no kijtosneki ke moka motekipachoua.