1. ¿Toni nechikol tein kipiak xolal Israel ika timomachtitij, uan toni netajtanilmej tiknankiliskej?

“XIMOAJOKUIKAN, xiktiochiuakan Jiova nanmoDios itech tonalmej tein panouanij uan nochipaya.” Ika nejin tajtolmej tein teyololinia, levitas kisentilijkej xolal Israel uan ijkon iixpan Jiova kichiuaskiaj semej netataujtilmej tein okachi ueyak tein ixnesi itech Biblia (Neh. 9:4, 5). Nechikol mochiuak ompa Jerusalén itech tonal 24, chikometika metsti judío tein itokay tisri, itech xiuit 455 achto itech totonaluan. Maj achto tikitakan toni kinuikak maj mosentilianij nejon tonal tein semi moelnamiki, uan maj tiktemokan itanankilil nejin netajtanilmej: ¿Toni tein kuali momattoyaj kichiuaskej israelitas tein kinpaleuij maj kuali kisani tein kichiujkej nejon tonal? ¿Toni uelis techmachtis netataujtil tein kuali kinemilijkej ijkuak kichiujkej iixpan Jiova? (Sal. 141:2.)

2. ¿Toni neskayot techkauilijkej israelitas ijkuak mosentilijkej satepan ke matankej tepamit tein kiyoualouaya Jerusalén?

² Se metsti achto, judíos oksepa kitamichijchiujkaj tepamit tein kiyoualouaya Jerusalén (Neh. 6:15). Kitamijkej tekit itech sayoj 52 tonalmej uan axkan kinekiaj kichikauaskej ininkuali uikalis iuan Dios. Yejua ika, itech iyekinika tonal metsti tisri, mosentilijkej kampa nochin ajsiaj uan ijkon kikakiskiaj Esdras uan okseki levitas keman kiixtajtoltiskiaj uan kimelauaskiaj iTanauatil Dios . Miakej kemej kalyetouanij hasta konemej akin ueliskiajya takakiskej, ompa ijkatoyaj uan takaktoyaj “ijkuak tanesik hasta tajko tonal”. ¡Se kuali neskayot techkauilijkej! Axkan miakkan timonechikouaj itech Kalmej kampa tiMosentiliaj tein nochi kipia, maski ijkon, kemansa peua titanemiliaj itech okseki taman tein amo semi moneki. ¿Mitsonpanouani nejon? Komo ijkon, semi techpaleuis komo tikitaj tein kichiujkej israelitas. Yejuan amo sayoj kikakkej, ta kikaujkej maj tajtolmej ajsi itech ininyolo hasta peujkej chokaj porin  kiitakej ke amo kitakamatiaj Tanauatil (Neh. 8:1-9).

3. ¿Toni kichiujkej israelitas ijkon kemej kinnauatijkej?

³ Sayoj ke amo katka tonal keman ixyetoya kijtoskej sentaixpan inintajtakoluan. Katka se tonal keman monekia iluichiuaskej oso kiueyichiuaskej Jiova ika yolpakilis (Núm. 29:1; . Yejua ika Nehemías kiiluij xolal: “Xiyakan uan xikuakan tein chiauak uan xitayikan tein tsopek, uan xiktitanilikan tepitsin akin amo teyi kichijchiuak; porin nejin tonal semi yektik iixpan toTajtsin, uan amo ximoyolkokokan, porin iyolpakilis Jiova yejua nanmoaltepeuj chikauak tein kiyoualojtok tepamit”. ¿Keniuj tanankilijkej israelitas? Tatakamatkej, tamik tayokol uan “kipiakej se ueyi yolpakilis” (Neh. 8:10-12).

4. 1) ¿Toni kichiujkej akin kinixyekanayaj ininchankauan uan toni kiajsikej? 2) ¿Toni okachi monekia kichiuaskej itech iluit tein kipiayaj itech Sakakaltsitsin?

⁴ Mostika, akin kinixyekanayaj ininchankauan mosentilijkej uan ijkon momachtiskiaj Tanauatil uan kiitaskiaj keniuj ueliskia okachi kuali kitakamatiskej . Keman kiitakej ke itech nejon metsti, itech tonal 15 hasta 22, monekia kichiuaskej iluit tein kipiayaj itech Sakakaltsitsin tein tamia ika se ueyi nechikol, niman kichiujkej tein monekia . Nejon iluit tel okachi kuali katka ke tein kipiakej itech itonaluan Josué hasta nejon tonal, uan xolal kipiak “yolpakilis tein semi ueyi”. Itech nejon iluit, motelnekia moixtajtoltis ika tajtol chikauak iTanauatil Dios, uan yejua nejon kichiujkej itech “yekinika tonal hasta tonal tein ika tamik” (Neh. 8:13-18).

5. ¿Toni kichiuak xolal Israel tepitsin achto ke levitas kichiuaskiaj netataujtil iixpan Jiova?

⁵ Ome tonal satepan ke tamik iluit, tonal 24 metsti tisri, ueliskiajya kijtoskej sentaixpan ke kitapanauilijkaj Tanauatil. Ijkuak amo ixyetoya maj iluichiuakan. Nejon tonal, israelitas mosaujkej uan motakentijkej ika tojmit tein teajuayotia tein ika kinextijkej ke moyolnonotsayaj. Kualkan oksepa kiixtajtoltijkej iTanauatil Dios kemej eyi hora, uan tiotakpa “kijtojtoyaj inintajtakoluan uan moixpilojtoyaj iixpan Jiova ininDios” . Ijkuakya keman levitas akin tajtojkej itenkopa xolal, kichiujkej iixpan Jiova kualtsin netataujtil tein tikijtojkej yekinika (Neh. 9:1-4; .

6. 1) ¿Toni kinpaleuij levitas maj kichiuakan netataujtil tein kisaya itech ininyolo? 2) ¿Toni techmachtia tein kichiujkej levitas?

⁶ Tiknemiliaj ke levitas kiixtajtoltiayaj iTanauatil Dios uan yejua nejon kinpaleuij maj kuali kinemilianij tein kijtoskiaj itech netataujtil tein kichiujkej ika nochi ininyolo. Keman kipeualtijkej netataujtil sayoj ika tajtojkej itachijchiualis uan ikualneskayouan Jiova. Satepan, kijtojkej inintajtakoluan israelitas, sayoj ke miakpa ika tajtojkej “[i]ueyi teiknelilis” Dios tein kimachiliayaj ke amo kinnamikia kiseliskej (Neh. 9:19, 27, 28, 31). Tejuan no uelis tikijtoskej  itech tonetataujtiluan tein tikpiaj toyolijtik uan kuali tiknemiliskej tein tikijtoskej, komo mojmostaj titanemiliaj itech iTajtol Dios ijkon kemej kichiuayaj levitas. Ijkon tikauaskej maj achto technojnotsa Jiova uan tikpiaskej miak taman tein tikiluiskej (Sal. 1:1, 2).

7. 1) ¿Toni tajtankej levitas? 2) ¿Toni techmachtia tein kichiujkej levitas?

⁷ Levitas ika yolyemanilis sayoj se taman kitajtanijkej Jiova. Itamiampa netataujtil tein kichiujkej tajtankej: “Uan axkan, toDios, Dios tein tiueyi, tichikauak uan semi se mitsmoujkatoka, akin tikchiua monetenkaualis uan moueyi netasojtalis tein amo tami, amo xikita ke amo ueyi tajyouilis tein techejkok tejuan, totekiuajkauan, totekiuajkoneuan uan totiopixkauan, totanauatijkauan, touejkaujtatuan uan nochi moxolal, itech inintonaluan tekiuanij ompa Asiria hasta nejin tonal” (Neh. 9:32). ¿Toni techmachtia tein kichiujkej levitas? Technextilia ke itech tonetataujtiluan achto moneki tiktasojkamatiliskej uan tikueyitaliskej Jiova uan satepan tiktajtaniskej tein tejuan techpoloua.

8, 9. 1) ¿Keniuj levitas kinextijkej yolyemanilis keman peujkej kichiuaj netataujtil? 2) ¿Toni ome taman oloch tateuianij tein moajsij iluikak xa ika tajtojkej levitas?

⁸ Maski kuali kinemilijkaj levitas tein yayaj kijtotij, itech nochi netataujtil tein kichiujkej, ika yolyemanilis kiyekijtojkej ke amo kinajsiskia inintajtoluan tein ika kiueyitaliskiaj Jiova kemej kinamiki. Keman kitajtanijkej maj kikauani xolal maj kiueyichiuani, kijtojkej ke itokay Dios tein semi ueyi, moajsi okachi ajko ke “nochi tatiochiualis uan taueyichiualis” (Neh. 9:5).

⁹ Netataujtil kisentoka kijtoua: “Tejua tiJiova, sayoj tejua; tejua tikchijchiuak iluikak, uan iluikak tein moajsi okachi ajko ke iluikak, uan nochi itateuijkauan, taltikpak uan nochi tein onkak ompa, ueyiamej uan nochi tein onkak ompa; tejua tikchiujtok maj kisentokakan nemikan nochin yejuan; uan itateuijkauan iluikak moixpilojtokej moixpan” (Neh. 9:6). Kemaj, Jiova kichijchiuak nochi tein onkak, kemej iluikak ika tel miak sitalimej uan galaxias tein tamati kemej miakej tateuianij. No kichijchiuak nochi tein onkak nikan taltikpak kampa semi takualtsinkan. Onkak miak taman tein yoltok tein semi se kimoujkaita uan tein ueli momiakilia ijkon kemej chijchiujtokej. Uan no yetokej “tateuianij tein moajsij iluikak”, iángeluan Dios tein yektikej akin kiitakej keniuj tachijchiuak (1 Rey. 22:19; Job 38:4, 7). Ika yolyemanilis yejuan kichiuaj itanejnekilis Dios uan kinpaleuiaj taltikpakneminij tajtakouanij akin kiselitij “nemakixtilis” (Heb. 1:14). Maj no ijkon tiknextikan yolyemanilis uan maj tiktekitilikan Jiova senolochmej kemej yeskiaj tateuianij tein kuali tamachtilmej (1 Cor. 14:33, 40).

10. ¿Toni techmachtia ijkon kemej Jiova mouikak iuan Abrahán?

¹⁰ Satepan levitas ika tajtojkej keniuj Dios mouikak iuan Abrán. Inamik Sarai amo uelia  kinpiaya konemej. Maski ijkon ijkuak kipiaya 99 xiujmej, Jiova kipatilij itokay uan kitokaytij Abrahán tein kijtosneki “ininpopaj miakej taltikpakneminij” (Gén. 17:1-6, 15, 16). Uan no, Dios motenkauak ke ikoneuan kiseliskiaj tal tein pouia Canaán. Miakpa, tejuan tikelkauaj tein timotenkauaj sayoj ke Jiova amo keman. Yejua ika levitas kijtojkej: “Tejua tiJiova Dios tein melauak, akin tikixpejpenak Abrán uan tikixtij Ur tein ininaxka caldeos uan tikpatilij itokay ika Abrahán. Uan tikitak ke iyolo amo mitskauaya; yejua ika timotenkauak iuan ke tikmakaskia inintal cananeos, [...] uan ijkon kinmakaskia ikoneuan; uan peuak tikchiua motajtoluan, porin tiyolmelauak” (Neh. 9:7, 8). Maj nochipa tikchiuakan ijkon kemej toDios akin yolmelauak uan maj tikchiuakan kemej timotenkauaj (Mat. 5:37).

11, 12. 1) ¿Toni kijtosneki tokayit Jiova? 2) ¿Keniuj kinextij Dios ke kinamikia kipias nejon tokayit?

¹¹ Tokayit Jiova kijtosneki “Yejua Kichiua Maj Mochiua”. Nejin kijtosneki ke kisentoka tekiti uan ijkon kichiua kemej motenkaua. Tikitaj ke melauak nejon ijkuak kinpaleuij ikoneuan Abrahán keman moajsiaj Egipto kampa kinteltekitiltiayaj. Nejon tonalmej moitaya ke amo ueliskiaj kisaskej uan yaskej itech Tal tein Dios motenkaujka kinmakas. Sayoj ke, ika seki taman tein mototojtokatiyajkej, Jiova kichiuak kemej motenkaujka. Ijkon kinextij ke kinamikia kipias nejon tokayit tein amo onkak okse ijkon uan tein semi ueyi.

¹² Netataujtil tein kijkuiloj Nehemías kimelaua tein Jiova kichiuak: “Tikitak inintajyouilis touejkaujtatuan ompa Egipto, uan tikakik keman mitstsajtsilijkej ompa ueyiatenoj Chichiltik. Satepan tikinmakak neskayomej uan uejueyi tachiualismej Faraón uan nochi itekitikauan uan nochin tein nemiaj itech ialtepeuj, porin tikmatia ke ininueyinekilis kinolinij maj kinijtakouanij yejuan; uan peuak tikchiua moixpan se tokayit, kemej nejin tonal. Uan ininixpan peuak tikxeloua ueyiat, uan ijkon kipanauijkej itajkotiampa ueyiat itech tal uakik; uan akin kinikantokayaj tikinpankajkauak ueyiaijtik kemej se tet itech amej tein semi chikaujkej”. Satepan levitas kisentokakej kijtojkej okseki taman tein kichiuak Jiova tein ika kinpaleuij israelitas: “Tejua ininixpan yejuan peuak tikintani taltikpakneminij, cananeos [...]. Uan peujkej kikuij altepemej tein kiyoualojtoya tepamit uan tal kampa tel tataki, uan moaxkatilijkej kalmej tein pexontoya ika nochi taman tein kuali, ameyaltekochmej tein yekchijchiujtoyaj, uvajtalmej uan olivojtalmej uan koujmej tein tel miak takilot kitemakaya, uan peujkej takuaj uan ixuij uan motomauaj uan motelyolpaktiaj itech moueyi kualtakayo” (Neh. 9:9-11, 24, 25).

13. 1) ¿Toni Jiova kinmakak israelitas tein kinpaleuiskia maj kiueyichiuakan? 2) ¿Keniuj tanankilijkej yejuan?

¹³ Dios no kichiuak okseki taman tein tapaleuiskia maj mochiua tein motenkaujka. Kemej neskayot, tepitsin satepan keman israelitas kiskej Egipto, Jiova kinmakak tanauatilmej uan ijkon kimatiskiaj keniuj kiueyichiuaskiaj. Levitas kijtojkej: “Itech tepet Sinaí tiualpantemok, uan tiualtajtoj ne iluikak iniuan, uan tikinmakak tajtolmej tein kinextia tatsakuiltilis tein melauak uan tanauatilmej tein melauak, tajtolmej tein kinextia keniuj mochiuas teisa uan tanauatilmej” (Neh. 9:13). Dios kimachtij ixolal akin kiselijkaj Tal tein motenkauak kinmakas, maj nemikan kemej kiueyitaliskiaj itokay tein chipauak. Sayoj ke yejuan niman kielkaujkej tein kinmachtijka (xikonixtajtolti Nehemías 9:16-18).

14, 15. 1) ¿Keniuj Jiova kinyekpiak israelitas maski tajtakojkej? 2) ¿Toni techmachtia keman tikitaj keniuj Jiova mouikak iuan ixolal?

¹⁴ Itech netataujtil tein kichiujkej levitas kijtojkej ome tajtakolmej tein israelitas kichiujkej tepitsin satepan ke motenkaujkej iuan Dios itech tepet Sinaí ke kitakamatiskiaj iTanauatil. Maski kinnamikia mikiskej ompa taluakyan, Jiova kisentokak kinyekpiak. Yejua ika  levitas kiueyichiujkej keman kijtojkej: “Ika moueyi teiknelilis amo tikinkauak taluakyan. [...] Uan ome poual xiujmej tikinmakak takual [...]. Amo teyi kinpoloj. Taken tein motaliliayaj amo keman soltiak, uan ininmetsuan amo keman posauayak” (Neh. 9:19, 21). Axkan Jiova no techmaka nochi tein techpaleuis maj amo tikauakan. Maj amo keman timochiuakan kemej tel miakej israelitas tein momikilijkej taluakyan porin amo tatakamatkej nion takuaujtamatkej. Maj tikelnamikikan ke tein kinpanok “ijkuiliutok nochi [...] para technejmachtis [...] ten axkan tinentinemij tech nijin tonalme” (1 Cor. 10:1-11).

¹⁵ Tetayokoltij tikmatiskej ke ijkuak israelitas ajsikej itech Tal tein Dios motenkaujka kinmakas, peujkej kichiuaj kemej cananeos ijkuak kinueyichiuayaj inintiotsitsin tein maneliujtoya ika auilnemilis uan temiktilis. Yejua ika Jiova kinkauak maj altepemej tein ompakauin moajsiaj kintajyouiltianij. Sayoj ke ijkuak moyolnonotsayaj, ika miak pakilis kintapojpoluiaya uan kinpaleuiaya maj amo kinijtakouanij taixnamikinij. Ijkon panouaya “miakpa” (xikonixtajtolti Nehemías 9:26-28, 31). Levitas kiyekijtojkej ke Jiova “miak xiujmej” kinnextilij teiknelilis uan kinextijkej: “Tiksentokak tikinpaleuij maj mokepakan, ika moespíritu, ika motanauatijkauan uan yejuan amo takakkej. Ika tamik, tikintemaktij ininmako xolalmej itech talmej” (Neh. 9:30).

16, 17. 1) Satepan ke israelitas mokepkej inintal, ¿toni kinpanok keman oksepa peujkej amo tatakamatij? 2) ¿Akoni kijtojkej ke kipiaya tajtakol maj israelitas kinpanouani nejon uan toni motenkaujkej kichiuaskej?

¹⁶ Satepan ke israelitas kiskej Babilonia uan mokepkej inintal, oksepa peujkej amo tatakamatij. ¿Toni kinpanok? Netataujtil tein kichiujkej levitas kisentoka kijtoua: “Tejuan axkan titakeualmej; uan itech tal tein tikinmakak touejkaujtatuan maj kikuakan itakilo uan nochi tein kuali, ¡xikita!, tejuan titakeualmej ompa, uan itakilo tein motelchiua kikuij tekiuanij akin tikinixtalij toixpan porin tikchiujkej tajtakolmej, [...] uan timoajsij itech ueyi tajyouilis” (Neh. 9:36, 37).

¹⁷ ¿Kiteajsikamatiltijkej ke Jiova amo katka yolmelauak keman kinkauak maj tel tajyouikan? Amo. Kiyekijtojkej ke kinnamikia maj kinmelaua: “Tejua tiyolmelauak ika nochi tein techejkok, porin tikchiua ika melaujkayot, sayoj ke tejuan tikchiuanij tein amo kuali” (Neh. 9:33). Yejuan kitamiltijkej netataujtil ika se netenkaualis tein senkis kinextiaya ke xolal kitakamatiskia iTanauatil Dios (xikonixtajtolti Nehemías 9:38; 10:29). Nejon tein motenkaujkej kijkuilojkej itech se amat kampa kitalijkej ininfirma 84 tayekananij judíos tein ika monextiaya ke kijtojtoyaj tein melauak (Neh. 10:1-27).

18, 19. 1) ¿Toni techpaleuis maj tipanokan itech yankuik taltikpak? 2) ¿Toni moneki tiksentokaskej titajtaniskej uan keyej?

¹⁸ Moneki maj Jiova techyekana uan maj techmelaua, ta sayoj ijkon uelis tipanoskej itech yankuik taltikpak. Tatitanil Pablo kiyeknextij nejon ijkuak kijtoj: “Kuali nankimatij ke amo ongak se tetat ke amo kinmejmelautinemi ikoneuan” (Heb. 12:7). Tiknextiaj ke timokauaj maj Dios techyekana komo tiksentokaj tiktekitiliaj uan tikauaj maj iespíritu techpata. Uan komo tikchiuaj se ueyi tajtakol, uelis tikyekmatiskej ke Jiova techtapojpoluis komo ika nochi toyolo timoyolnonotsaj uan ika yolyemanilis tikseliaj keman techmelaua.

¹⁹ Amo uejkaua Jiova okachi kiueyitalis itokay ke ijkuak kinmakixtij israelitas akin moajsiaj Egipto kampa kinteltekitiltiayaj (Ezeq. 38:23). Uan ijkon kemej ixolal Israel kiselij Tal tein Dios motenkaujka kinmakas, nochi itekitikauan akin amo kikauaskej, kiseliskej nemilis itech yankuik taltikpak kampa onkas melaujkayot (2 Ped. 3:13). ¡Se tel kualtsin nechialis! Moneki maj amo keman tikelkauakan titajtaniskej itech netataujtil maj mochipaua itokay Dios. Itech okse tamachtilis ika motajtos okse netataujtil tein uelis techpaleuis maj tikpiakan itatiochiualis Jiova axkan uan nochipaya.