Silvia, akin tekiti itech tapajtilis kijtoua: “Nimomachtij itech se ueyi kaltamachtiloyan iniuan akin kijtouayaj ke katkaj taneltokanij, sayoj ke takajkayauayaj itech exámen uan kikuiaj droga. Taneltokalis amo teyi kinpaleuiaya itech ininnemilis”.

Lionel no kijtoua: “Akin iniuan nitekiti amo youij tekititij porin tanauatiaj ke mokokouaj maski amo melauak. Yejuan kiitaj taneltokalis kemej se teisa tein kipiaj kalijtik tein amo mokui, ta sayoj kinextiaj ke kipiaj”.

Taneltokalis semi tepitsin kinpaleuia taltikpakneminij maj chipaujkanemikan. Miakej ‘mopoutinemij no keme taneltokani’ sayoj ke amo nesi ke kinpaleuia (2 Timoteo 3:5). Akin taixyekanaj itech taneltokalis, amo kinkauiliaj se kuali neskayot nion kinmachtiaj ika Biblia tein kinpaleuis maj chipaujkanemikan. Yejua ika miakej kinemiliaj ke Dios amo kitekipachoua keniuj monejnemiltiaj.

Biblia kinextia ke Dios kimachilia miak taman, uan kemej timonejnemiltiaj, uelis kiyolpaktis oso kiyolkokos. Keman israelitas taixnamikiaj “kiyolxokoliayaj” (Salmo 78:40). Sayoj ke “kachi ok moyolpaktiaj” ne iluikak nochipa keman aksa yekmelauj moyolnonotsa uan mopata (Lucas 15:7). Keman aksa kiixmati Dios, okachi kitasojta toTajtsin uan kiolinia maj kitasojta tein yejuatsin kitasojta, uan maj kitauelita tein kitauelita (Amós 5:15).

Itaixpantijkauan Jiova “tapaleuiaj maj kuali mouikakan kalyetouanij uan maj taltikpakneminij mochiuakan tekitinij uan maj melaujkanemikan”, ijkon kijtoj periódico The Deseret News, de Salt Lake City (Utah, Estados Unidos). Uan no kinextij: “Akin pouij ompa kitakamatij tamachtilis tein tel kuali kinpaleuia maj chipaujkanemikan. Kineltokaj ke tachichinalis, tauanalis, kikuiskej droga, neauiltilis ika tomin, auilnemilis tein no uelis yeskij takamej iuan takamej oso siuamej iuan siuamej, kichiua maj amo uelikan motokikan iuan Dios”.

Keman itaixpantijkauan Jiova kiixmatij yejuatsin, ¿keniuj kinpaleuiani nejon? Silvia kijtoua: “Semi moita takajkayaualis itech tapajtilis. Semi amo ouij maj no ijkon se monejnemilti. Sayoj ke nikmatis keniuj kiita Jiova * nejon, nechpaleuia maj amo nitakajkayaua. Ueli nikijtoua ke niyolpaki uan nikpia yolseuilis”. Yejua kiyekmati ke tein kineltoka kipaleuiani maj okachi kuali nemi.