Se kiajsikamatis aksa kijtosneki se kimachilis tein yejua kimachilia uan tein kipanoua. Tapajtijkej Rick Hanson, akin kiita keniuj tekiti se itanemilil, kijtoua ke “totech moajsi se kinajsikamatis oksekin”.

XIONTANEMILI ITECH NEJIN: ¿Keyej tejuan ueli tikajsikamatij tein kipanouaj oksekin sayoj ke tapialmej amo? Biblia kimelaua ke Dios techchijchiuak kemej yejuatsin tamati (Génesis 1:26). Nejon kijtosneki ke uelis tiknextiskej seki taman tein yejuatsin kinextia. Yejua ika, keman tikmachiliaj tein aksa kipanotok, tiknextiaj keniuj momachilia toTachijchiujkauj akin teiknelia, Jiova (Proverbios 14:31).

Dios kiajsikamati tein tikpanouaj uan amo kiuelita techitas maj titajyouikan. Keman Biblia ika tajtoua ijkuak israelitas kintajyouiltiayaj ompa Egipto uan keman yajtinenkej cuarenta xiujmej itech taluakyan, kijtoua: “Keman yejuan tajyouijtoyaj yejua no tajyouiaya” (Isaías 63:9). Tikitaj ke Dios amo sayoj kimatia ke itekitikauan tajyouijtoyaj, ta no kimachiliaya tein kijyouijtoyaj. Yejuatsin kijtoj: “Kuali nikmati tekokojkayot tein kijyouijtokej” (Éxodo 3:7). Dios kijtoua: “Akin namechmatoka kimatoka noixtololo” (Zacarías 2:8). Yejua ika, keman techchiuiliaj tein amo kuali, kemej yeskia yejuatsin kichiuiliaj.

Biblia techyekiluia ke maski amo kuali timomachiliskej oso tiknemiliskej ke amo technamiki maj Dios techikneli, yejuatsin “ojkachi ok ueyi uan ke ne teluililis den toyolo porin Yejuatsin nochi kimati” (1 Juan 3:19, 20). Dios okachi techixmati ke tein tejuan timoixmatij. Kuali kimati nochi tein techpanoua, tein tiknemiliaj uan tein tikmachiliaj uan kiajsikamati tein tikpanotokej.

 Biblia techyekiluia:

• “Titanotsas, uan Jiova tanankilis; tiktataujtis maj mitspaleui, uan yejua kijtos: ‘¡Nikan niyetok!’” (ISAÍAS 58:9).

• “Porin nejua kuali nikixmati tanemililmej tein niknemilijtok namoka, ijkon kijtoua Jiova, tanemililmej ika yolseuilis, uan amo ika tajyouilis, ijkon namechmakas satepan tein kuali uan se nechialis. Uan namejuan nanechnotsaskej uan nanualaskej uan nanechtataujtiskej, uan nejua namechkakis” (JEREMÍAS 29:11, 12).

• “Xiksentili noixayo itech mokuetaxtekomat. ¿Amo yetokej itech moamatajkuilol?” (SALMO 56:8).

¿Uelis techpaleuis maj tikixnamikikan ouijkayomej tikmatiskej ke Dios techajsikamati? Maj tikitakan tein kipanok María:

“Semi nechtajyouiltij nikitas maj nokonetsin akin kipiaya 18 xiujmej tajyouiani ome xiuit porin kipiaya cáncer hasta keman momikilij. ¿Keyej techpanouaya nejon tein amo kuali? Nikualantoya iuan Jiova porin kikauak maj pano nejon.

”Nikmachiliaya ke Jiova amo nechtasojtaya. Chikuasen xiuit satepan, niktapouij tein nikmachiliaya se siuat akin kuali iuan nimouika akin tetasojta uan teajsikamati uan no poui itech notaneltokalis. Satepan ke miak horas nechkakik, nechelnamiktij se tajkuilol tein nechyololinij: 1 Juan 3:19, 20, kampa kijtoua ke ‘Dios ojkachi ok ueyi uan ke ne teluililis den toyolo porin Yejuatsin nochi kimati’. Uan satepan, nechmelauilij ke Jiova kiajsikamati tein tikijyouiaj.

”Maski ijkon, niksentokaya nikualantoya. Ijkuak, nikixtajtoltij Salmo 94:19, tein kijtoua: ‘Keman nonetekipacholuan motelmiakilijkej, tinechyolchikauak uan tinechyolseuij’. Yejua nejon tein niknekia nikakis. Uelik nikiluij Jiova tayokol tein nikmachiliaya uan senkis nikmatia ke nechkakia uan nechajsikamatia. Nejon semi nechyolseuij”.

¡Semi techyolseuia tikmatiskej ke Dios techajsikamati uan ke kimachilia tein tikpanouaj! Sayoj ke ¿keyej semi titajyouiaj? ¿Techtatsakuiltijtok Dios porin tikchiujkej se tajtakol? ¿Ejkos tonal keman kitamis tajyouilis? Nejin netajtanilmej monankiliskej itech okseki tamachtilismej.