Jiova motenkauak iuan Jacob ke kimatampauiskia, kemej kichiujkaya iuan Abrahán uan Isaac. Jacob mokaltalij itech se tal tein motokaytiaya Harán. Ompa monamiktij, kinpiak miakej konemej uan motomintij.

Satepan, Jiova kiluij Jacob: “Ximokepa ininchan motatuan”. Yejua ika Jacob uan ichankauan peuak ojtokaj. Itech ojti, seki itakeualuan kiluikoj: “Mokniuj Esaú technamikiki iniuan 400 takamej”. Jacob mouia maj Esaú kinekini kinijtakos yejua uan ichankauan. Yejua ika kitataujtij Jiova: “Ika kualtakayot, xinechmakixti maj amo teyi nechchiuili nokniuj”. Mostika, Jacob kititanilij Esaú se netetayokolil: miakej ichkamej, cabras, kuakuejmej, camellos uan burros.

Nejon youak, keman Jacob mokauak iselti, kiitak se ángel. Nejon ángel peuak iuan mochijchikaua. Mochijchikaujtoyaj hasta keman tanesik. Maski Jacob moxokolij, amo kikajkauak. Ángel kiluij: “Xinechkaua maj niyouj”. Sayoj ke Jacob kinankilij: “Amo, hasta xinechtiochiua”.

Yejua ika, ángel kitiochiuak Jacob. Axkan Jacob kimatia ke Jiova amo kikauaskia maj Esaú kijtakouani.

Nejon kualkan, Jacob kiuejkaitak Esaú uan 400 takamej. Achto yejua kinamikito Esaú, uan keman ajsik kampa yetoya iikniuj,  moixpiloj chikojpa. Esaú ijsiujka kiajsito Jacob uan kinauaj. Omen peuak chokaj uan kiyektalijkej kuejmol tein kipiayaj. ¿Tiknemilia ke Jiova kiuelitak tein kichiuak Jacob?

Satepan ke panok nejon, Esaú mokepak ichan, uan Jacob kisentokak ojtokak. Jacob kipiaya 12 okichpipil: Rubén, Simeón, Leví, Judá, Dan, Neftalí, Gad, Aser, Isacar, Zabulón, José uan Benjamín. Satepan, Jiova kimakixtiskia ixolal itechkopa José, semej ikoneuan Jacob. ¿Tikneki tikmatis keniuj? Maj tikitakan.