Mochixkej Jerusalén
Tanojnots 105
Mochixkej Jerusalén
NEJIN taltikpakneminij, itatojtokakauan Jesús. Kitakamatkej uan mokaujkej Jerusalén. Uan ompa kalijtik kampa mochixtoyaj, peuak tel takakisti. Taijkoyokaya kemej se chikauak ejekat. Uan ompa peuak nesi titsitsin kemej nenepilmej itech sejse imin tsontekoj. ¿Ueli tikinita titsitsin tein kipiaj sejse imomachtijkauan Jesús? ¿Toni kijtosnekia?
¡Katka se mouiskatekit! Jesús yajki iluikak uan oksepa moajsiaya iuan iPopaj. Nejon tonal keman tel takakistik kintitanilij itatojtokakauan iyektikatsin espíritu Dios. ¿Tikmati toni kinchiualtij espíritu? Nochin peuak tajtouaj tataman tajtolmej.
Miakej taltikpakneminij tein nemiaj Jerusalén kikakkej kemej taijkoyokaya kemej se chikauak ejekat, uan kiitatoj toni mochiuaya. Sekin taltikpakneminij tein nemiaj itech okseki uejueyi altepemej, teuantitoj itech imin iluiuj israelitas tein motokaytiaya Pentecostés. Keman takalpanouanij kinkakkej imomachtijkauan Jesús, ika kintapouiayaj kuali tachiualismej tein Dios kichiuak itech imin tajtolkopa, ¡semi kimojkakakkej!
Kijtojkej takalpanouanij: ‘Nochin nejin taltikpakneminij kayomej Galilea. ¿Uan keniuj uelij tanojnotsaj kemej titajtouaj itech uejueyi altepemej kampa tiualeujkej?’
Ompa, Pedro moajokuik uan kinimelauilij. Ika chikauak tajtol, kintapouij taltikpakneminij keniuj kimiktijkaj Jesús, uan no kiniluij ika Jiova kiajokuik. Pedro kiniluij: ‘Axkan Jesús yetok iluikak iyekmakopa Dios. Uan yejua kititanik yektikatsin espíritu tein motenkaujka. Uan yejika mochiuak nejin mouiskatekimej’.
Keman Pedro kijtoj nejon, miakej tein takaktoyaj, moyolkokojkej ika tein kichiuilijkej Jesús. Yejika tajtankej: ‘¿Toni moneki tikchiuaskej?’ Pedro kiniluij: ‘Moneki nankipataskej namonemilis uan namoauiskej’. Nejon tonal kemej 3,000 moauijkej uan mochiujkej itatojtokakauan Jesús.
