Juan 6:1-71
6 Satepan ke mochiuak nejin, Jesús yajki oksekopa den ueyiat Galilea, oso Tiberíades.
2 Uan tel miakej kitojtokatiayaj porin kiitayaj milagros tein kichiuaya keman kinpajtiaya akin mokokouayaj.
3 Yejua ika Jesús pankisak itech se tepet uan ompa motalij iniuan imomachtijkauan.
4 Amo uejkaua, judíos yaya kichiuatij iluit tein monotsa Pascua.
5 Keman Jesús moixajokuik uan kiitak ke tel miakej yaya kiajsitij, kitajtanij* Felipe: “¿Kani tikouaskej pantsin para maj nochin takuakan?”.
6 Kijtoj nejin porin kinekia kimatis toni kinemiliaya Felipe, porin yejua kimattoyaya tein yaya kichiuati.
7 Felipe kinankilij: “Maski tikpiaskiaj 200 denarios* para tikouaskej pantsin uan tikinmajmakaskiaj tejtepitsitsin, ipa amo ajsiskia”.
8 Semej imomachtijkauan, akin monotsa Andrés, iikniuj Simón Pedro, kiluij:
9 “Nikan yetok se okichpiltsin akin kipia makuil pantsin tachijchiuj ika cebada uan ome pescadojtsitsin.* Sayoj ke amo kinajsis nochin”.
10 Jesús kijtoj: “Xikiniluikan nochin maj motalikan”. Kemej kampa yetoyaj semi xiujtaj katka, ompa motajtalijkej. Katkaj kemej makuil mil takamej.
11 Jesús kikuik pantsin, kitasojkamatilij Dios uan kinxejxelouilij akin ompa tokotsyetoyaj; no ijkon kichiuak ika pescadojtsitsin,* uan takuajkej hasta ixuikej.
12 Keman ixuikej, kiniluij imomachtijkauan: “Xiksentilikan tein mokauak, para maj amo teyi moauilo”.
13 Yejua ika kisejsentilijkej uan kipexontijkej* 12 chikiujmej ika pankojkotol tein kikaujkej akin kikuajkaj nejon makuil pantsin.
14 Keman akin ompa yetoyaj kiitakej milagro tein kichiuak, peuak kijtouaj: “Moyekita ke yejua nejin Tanauatijkej* akin monekia ualas nikan taltikpak”.
15 Uan kemej Jesús kimatia ke yaya ualatij para kichikaujkauikaskej uan kiixtaliskej kemej inintekiuaj, yajki oksepa itech tepet, yejua iselti.
16 Keman peuak tapoyaui, imomachtijkauan temokej ueyiatenoj,
17 tejkokej* itech se barco uan peujkej kipanauiaj ueyiat para ajsiskej Capernaúm. Youakya katka uan Jesús ayamo yaya kinajsiti.
18 Uan ueyiat peuak moajkotatamota porin chikauak taejekaya.
19 Satepan ke kiuikakej barco kemej makuil mil oso chikuasen mil metros,* kiitakej Jesús nejnentoya aixko uan kinajsitiayaya, uan momoujtijkej.
20 Sayoj ke yejua kiniluij: “¡Nejua niJesús! ¡Amo ximouikan!”.
21 Uan yejuan semi yolpakkej uan kiluijkej maj tejko itech barco, uan tepitsin satepan ajsikej kampa yayaj.
22 Mostika, akin yetoyaj oksekopa den ueyiat kiitakej ke ompa amo yetoyaok nion se barco. Achto yetoya se barco tsikitsin, sayoj ke Jesús amo tejkoka* itech nejon barco iniuan imomachtijkauan, ta yejuan yajkej ininselti.
23 Uan seki barcos tein ualeuayaj Tiberíades ajsikej kampa ika toTekotsin kitasojkamatilij Dios uan kintamakak tel miakej.
24 Yejua ika, keman yejuan kiitakej ke nion Jesús nion imomachtijkauan ompa yetoyaj, tejkokej* itech barcos uan yajkej Capernaúm kitemotoj Jesús.
25 Keman kiajsikej oksekopa den ueyiat, kitajtanijkej: “Tamachtijkej,* ¿kemanian tiejkok?”.
26 Jesús kinnankilij: “Yekmelauj namechyekiluia ke namejuan amo nanechtemouaj porin nankiitakej milagros, ta porin nankikuajkej pantsin hasta nanixuikej.
27 Amo xitekitikan para nankipiaskej takual tein uejueliui, ta para nankipiaskej takual tein amo uejueliui uan kichiua maj se nemi nochipaya, tein nejua akin niyolik kemej takat namechmakas. Porin toTajtsin Dios kiyolpaktia maj nikchiua nejon”.*
28 Yejua ika kitajtanijkej: “¿Toni tekit moneki tikchiuaskej para tikyolpaktiskej Dios?”.
29 Uan Jesús kinnankilij: “Dios kiyolpaktia nouan xitakuaujtamatikan porin yejua nechualtitanik”.
30 Yejuan kiluijkej: “¿Toni milagro tikchiuati para maj tikitakan uan maj timitsneltokilikan? ¿Toni tikchiuati?
31 Touejkaujtatuan kikuajkej maná ompa taluakyan, ijkon kemej ijkuiliujtok: ‘Kintamakak ika takual tein ualeua ne iluikak’”.
32 Uan Jesús kiniluij: “Yekmelauj namechyekiluia ke Moisés amo namechmakak takual tein ualeua ne iluikak, ta toTajtsin namechmaka yekmelauj takual tein ualeua ne iluikak.
33 Porin takual tein Dios kitemaka yejua ne tein ualpantemok de ne iluikak uan akin kikuas nemis nochipaya”.
34 Yejua ika kiluijkej: “ToTekotsin, nochipa xitechmaka nejon takual”.
35 Jesús kiniluij: “Nejua nitakual tein kichiuas xinemikan nochipaya. Akin nechtojtokas amo kemanok mayanas, uan akin notech takuaujtamatis amo kemanok amikis.
36 Sayoj ke kemej namechiluijya, namejuan nanechitanij uan maski ijkon amo nantaneltokaj.
37 Nochin akin noTajtsin nechinmaktilia nechtojtokaskej, uan akin nechtojtokas amo keman nikixtopeuas.
38 Porin amo niualpantemok de ne iluikak para nikchiuas tein nejua nikneki, ta para nikchiuas tein kineki akin nechualtitanik.
39 Yejua nejin tein kineki akin nechualtitanik: maj amo nikpolo nion se akin yejua nechinmaktiliani, ta maj nikchiua maj oksepa nemikan keman ejkos tonal.
40 Porin yejua nejin tein kineki noTajtsin: maj nemikan nochipaya nochin akin kiitaj iKoneuj Dios uan itech takuaujtamatij, uan nejua nikchiuas maj oksepa nemikan keman ejkos tonal”.
41 Uan judíos peujkej kiichtakaijijtouaj porin yejua kijtojka “Nejua nitakual tein ualpantemok de ne iluikak”.
42 Uan peujkej kijtouaj: “¿Amo yejua nejin Jesús ikoneuj José? Tejuan tikixmatij itat uan inan. ¿Keniuj axkan kijtoua ‘Nejua niualpantemok de ne iluikak’?”.
43 Keman Jesús kiitak nejin, kiniluij: “Amo ximoichtakanojnotstokan.
44 Amo akin uelis nechtojtokas komo amo nechualkuilia noTajtsin akin nechualtitanik; uan nejua nikchiuas maj oksepa nemi keman ejkos tonal.
45 Tanauatianij kijkuilojkej: ‘Nochin yejuan Jehová* kinmachtis’. Akin kikakis noTajtsin uan kineltokas tein tamachtia, nechtojtokas.
46 Nejin amo kijtosneki ke aksa* kiitani noTajtsin, ta sayoj nejua akin niualeua imako Dios; nejua kemaj nikitani noTajtsin.
47 Yekmelauj namechyekiluia ke akin taneltoka, nemis nochipaya.
48 ”Nejua nitakual tein kichiuas xinemikan nochipaya.
49 Namouejkaujtatuan kikuajkej maná ompa taluakyan, uan maski ijkon momikilijkej.
50 Sayoj ke akin kikuas nejin takual tein ualeua ne iluikak, amo mikis.
51 Nejua nitakual tein yoltok tein ualpantemok de ne iluikak. Komo aksa kikua, nemis nochipaya. Tein melauj, nejon takual yejua nonakayo tein niktemakati para maj akin nemij nikan taltikpak yoltokan”.
52 Uan judíos peujkej motajtolteuiaj uan kijtouaj: “¿Keyej nejin takat techiluia maj tikuakan inakayo?”.
53 Yejua ika Jesús kiniluij: “Yekmelauj namechyekiluia ke komo amo nankikuaj nonakayo uan amo nantayij noesyo nejua akin niyolik kemej takat, amo nanemiskej.*
54 Akin ika motamaka nonakayo uan tayi noesyo nemis nochipaya, uan nejua nikchiuas maj oksepa nemi keman ejkos tonal;
55 porin nonakayo yekmelauj takual, uan noesyo yekmelauj tayil.
56 Akin ika motamaka nonakayo uan tayi noesyo kisentoka nouan yetok, uan nejua niksentoka iuan nietok.
57 NoTajtsin, akin nochipa yoltok, nechualtitanik uan nejua ninemi porin noTajtsin kichiuak maj ninemi. No ijkon, akin ika motamakas nonakayo nemis porin nejua nikchiuas maj nemi.
58 Yejua nejin takual tein ualeuak ne iluikak. Amo kemej tein kikuajkej namouejkaujtatuan, akin momikilijkej. Akin motamakas ika nejin takual, nemis nochipaya”.
59 Kijtoj nochi nejin keman tamachtiaya kampa taueyichiuaj judíos* ompa Capernaúm.
60 Keman miakej imomachtijkauan kikakkej nejin, kijtojkej: “Nejin tamachtilis techkuejmoloua. Amo tiknekij tikaktoskejok”.
61 Sayoj ke Jesús, akin kimatia ke imomachtijkauan kijijtojtoyaj porin kijtojka nejon, kiniluij: “¿Nejin namechkuejmoloua?
62 Komo ijkon, ¿toni panoskia komo nanechitaskiaj ke nejua akin niyolik kemej takat nipankisa kampa nietoya achto?
63 Dios ika ichikaualis kichiua maj se nemi; tein uelis kichiuaskej akin nemij nikan taltikpak amo tapaleuia. Dios ika ichikaualis nechpaleuij maj nikijto nochi tein namechiluij uan nejon tein nikijtoj kichiua maj se nemi.
64 Sayoj ke nansekimej amo nantaneltokaj”. Porin Jesús ipa* kimatiaya akonimej amo taneltokayaj uan akoni yaya kitemaktiti.
65 Uan no kijtoj: “Yejua ika namechiluij ke amo akin uelis nechtojtokas komo amo noTajtsin kikaua”.
66 Yejua ika, miakej imomachtijkauan oksepa peuak kichiuaj tein achto kikaujkaj uan amo kitojtokayajok.
67 Yejua ika Jesús kintajtanij 12 tatitanilmej: “¿Namejuan no nankinekij nanyaskej?”.
68 Simón Pedro kinankilij: “NoTekotsin, ¿akoni tiktojtokaskej? Tein titamachtia kichiua maj se nemi nochipaya.
69 Tejuan titaneltokakej uan tikmatij ke Dios mitsualtitanik”.*
70 Jesús kinnankilij: “Nejua namechijitak* nandocejmej, ¿melauj? Sayoj ke nansemej tetakajkayauilia”.*
71 Ika tajtojtoya Judas ikoneuj Simón Iscariote, porin maski pouia iniuan 12 tatitanilmej, yaya kitemaktiti.
Tajtolmelaualismej
^ Oso “kitajtoltij”.
^ Oso “amichtsitsin”.
^ Oso “amichtsitsin”.
^ Oso “kitemitijkej”.
^ Xikonita tanauatijkej.
^ Oso “pankiskej”.
^ Itech griego, “kemej 25 oso 30 estadios”. Itamachiuj se estadio katka 185 metros.
^ Oso “amo pankiska”.
^ Oso “pankiskej”.
^ Itech griego, “Rabí”.
^ Oso “nechtalilij sello tein ika kinextij ke nikyolpaktia”.
^ Oso “akin”, “akaj”.
^ Itech griego, “amo nankipiaj nemilis namotech”.
^ Oso xa “kampa miakej mosentiliaj”.
^ Itech griego, “desde ipeujyan”.
^ Oso “tiitekitikauj Dios akin tiYektik”.
^ Oso “namechixpejpenak”.
^ Oso “amokuali”.
