Miak Biblias tein uejkaujya motajtolkepkej kemej Scío de San Miguel uan Reina-Valera (tein mokixtij itech xiuit 1909) kikuij tajtol infierno itech seki tajkuilolmej (Salmo 16:10; [15:10, Scío de San Miguel]; Hechos 2:27 a). Miakej kineltokaj ke infierno kansaika kampa nochipaya kintajyouiltijtokej akin amo yolkualmej itech tit, kemej moita itech taixkopin tein yetok ipeujyan nejin tamachtilis. Sayoj ke ¿yejua nejon tein tamachtia Biblia?

Itech nejin tamachtilis tikitaskej nejin:

•  ¿Infierno kijtosneki kansaika kampa nochipaya kintajyouiltijtokej akin amo yolkualmej katkaj?

•  ¿Toni kijtosneki ixneskayot kampa Jesús ika tajtoj takat tominpixkej uan Lázaro?

•  ¿Se yetos itech infierno kijtosneki se tajyouijtos porin amo kuali se mouika iuan Dios?

•  ¿Aksa kisani den infierno?

•  Tajkuilolmej itech Biblia tein ika tajtouaj infierno oso Miketekoch

•  Tajtolmej tein yekinika mokuikej itech Biblia itech hebreo uan griego

•  Keniuj peuak kineltokaj se infierno kampa motatikuitok

 Amo. Seki Biblias tein uejkaujya kitajtolkepkej kikuij tajtol “infierno” para kitajtolkepaskej tajtol hebreo Seol uan tajtol griego Hades. Keman mokuij nejin tajtolmej ika moixnextia kampa moajsij mikemej, tein kijtosneki, Miketekoch. Biblia kinextia ke akin moajsij itech Miketekoch amo yoltokej, amo nemijok.

•   Mikemej amo teyi kimatijok uan amo tajyouiaj. “Amo onkas tekit uan tanemilil, uan taixmatilis, uan tamatilis itech infierno kampa tejua tiouj” (Eclesiastés 9:10, Jünemann). Akin yetokej itech infierno amo tsajtsitokej porin tajyouijtokej, ta Biblia kijtoua: “Akin amo yolkualmej maj mopinaujtikan, maj motentsakuakan itech Miketekoch [itech infierno, La Biblia del Oso]” (Salmo 31:17, Nueva Traducción Viviente [31:18, La Biblia del Oso]; 115:17).

•   Dios kiixtalij ke akin tajtakolchiuaj kintatsakuiltis ika mikilis, amo itech tit. Dios kiluij yekinika takat, Adán, ke komo amo kitakamatia itanauatil mikiskia (Génesis 2:17). Amo keman kijtoj ke kitajyouiltiskia nochipaya itech tit, satepan Adán tajtakoj uan Dios kiluij keniuj kitatsakuiltiskia: “Titalnex uan talnex timokepas” (Génesis 3:19). Adán amo nemiskiaok. Komo Dios kitatsakuiltiskia itech se infierno kampa nochipaya tatatoskia, xa kiluiskia. Axkan, komo amo no tiktakamatij itanauatiluan Dios no tikseliskej nejon tatsakuiltilis. Tein melauj, miak xiujmej satepan ke Adán momikilij, Dios kichiuak maj se takat akin kijkuiloj Biblia kijtouani: “Tajtakol techtaxtauia ika mikilis” (Romanos 6:23). Amo monekiok okse taman tatsakuiltilis, “porin akin momikilia kitapojpoluiliaj itajtakol” (Romanos 6:7).

•   Dios hasta kikualantia itech tanemilis ke nochipaya tetajyouiltijtok (Jeremías 32:35). Keman tamachtiaj ke Dios tetajyouiltia itech tit, amo mouika ika tein kijtoua Biblia: “Dios yejua tetasojtalis” (1 Juan 4:8). Yejuatsin kineki maj tikueyichiuakan porin tiktasojtaj uan amo porin tikmouiliaj maj nochipaya techtajyouilti (Mateo 22:36-38).

•   Sekin akin yolkualmej katkaj yajkej infierno. Seki Biblias tein kikuij tajtol infierno no kijtouaj ke seki takamej akin amo kikaujkej Dios, kemej Jacob uan Job, kijtojkej ke yaskiaj infierno (Génesis 37:35; Job 14:13). Hasta moijtoua ke Jesús yajki infierno keman kimiktijkej uan ompa yetoya hasta keman oksepa nemik (Hechos 2:31, 32). Yejua ika senkis moita ke keman nejon Biblias kikuij tajtol infierno, tein melauj kijtosnekij Miketekoch. b

 Nejin se parábola tein Jesús kitetapouij uan moajsi itech Lucas 16:19-31. Parábola kijtosneki se tetapouilis tein amo yekmelauj panok tein techmachtia keniuj timonejnemiltiskej oso keniuj kiita Dios seki taman. Yejua ika keman Jesús ika tajtoj takat tominpixkej uan Lázaro, sayoj katka se tetapouilis, amo yekmelauj panoka (Mateo 13:34). Komo tikonneki okachi tikonixmatis nejin tetapouilis, xikonita tamachtilis “¿Akonimej katkaj takat tominpixkej uan Lázaro?”.

 Amo. Keman motamachtia ke akin amo yolkualmej kisentokaj nemij satepan ke momikiliaj, uan ke tajyouiaj porin kimatij ke amo kuali mouikaj iuan Dios kiixnamiki tein Biblia kijtoua, porin ompa motamachtia ke mikemej amo teyi kimatijok (Salmo 146:3, 4; Eclesiastés 9:5).

 Kemaj. Biblia ininka tajtoua chiknaui taltikpakneminij akin momikilijkaj uan yajkej Miketekoch (tein itech seki Biblias motajtolkepa kemej “infierno”), uan satepan oksepa nenkej. c Komo kisentokaskiaj yoltoskiaj itech infierno kijtoskiaj tein kipanokej. Sayoj ke nion semej kitetapouij ke kitajyouiltijkaj oso ke kipanoka okse taman. ¿Keyej? Porin kemej Biblia tamachtia, amo teyi kimatiajok, ta kemej yeskia ‘kochtoyaj’ (Juan 11:11-14; 1 Corintios 15:3-6).