Kena. Katli tijtekipanouaj Jehová tijneltokaj Biblia “toTeko temakak nochi nopa tlatsejtseloltik Tlajkuiloli, uan [...] techmachtia tlen melauak” (2 Timoteo 3:​16). Ni kiijtosneki tijneltokaj nopa Achtoui Tlajtoli uan nopa Yankuik Tlajtoli. Uan pampa amo tijnekij ma kiijtokaj Nopa Achtoui Tlajtoli ayokmo tepaleuia ipan ni tonali tikiljuiaj Escrituras Hebreas uan Nopa Yankuik Tlajtoli tikiljuiaj Escrituras Griegas Cristianas.

 ToTeotsij kichijki apóstol Pablo ma kiijkuilo: “Nochi tlen kiijkuilojkej uejkajkia, kiijkuilojkej para techmachtis” (Romanos 15:4). Uajka ipan Escrituras Hebreas onka miak kuajkuali tlamachtili. Nopaya onka tlamachtili tlen techpaleuia ipan tonemilis uan nojkia techiljuia tlen uejkajkia panok.

•   Tlen uejkajkia panok. Escrituras Hebreas kiijtoua kenijkatsa toTeotsij kichijchijki Tlaltipaktli uan kenijkatsa maseualmej pejkej tlajtlakolchiuaj. Ni techpaleuia ma tijmatikaj ajkia techchijki uan kenke timikij (Génesis 2:7, 17). Nojkia techiljuia kenijkatsa toTeotsij kinpaleuik itekipanojkauaj katli kipixkej tlaouijkayotl kej tojuantij (Santiago 5:​17).

•   Tlamachtili tlen techpaleuia ipan tonemilis. Ipan Escrituras Hebreas ijkuilijtok pilamochtsi Proverbios uan Eclesiastés, uan nopaya ijkuilijtok miak tlamachtili tlen techpaleuia ipan ni tonali. Techiljuia kenijkatsa uelis tiyolpakisej ininuaya tochampoyouaj (Proverbios 15:17), kenijkatsa kinamiki ma tikitakaj tekitl (Proverbios 10:4; Eclesiastés 4:6), uan kenijkatsa telpokamej uelis yolpakisej (Eclesiastés 11:9–​12:1).

 Nojkia tlauel techpaleuis tlaj timomachtisej nopa Tlanauatili katli Moisés kimakakej tlen eltok ipan amatlajkuiloli Torá o Pentateuco (nopa achtoui makuili pilamochtsitsij tlen Biblia). Maske ipan ni tonali ayokmo timoyakanaj ika nopa Tlanauatili, nopa tlamachtili kena techpaleuia ma tiyolpakikaj (Levítico 19:18; Deuteronomio 6:​5-7).