Nopa tlajtoli néfesch ika hebreo uan nopa tlajtoli psykjé ika griego kitlajtolkuepkej ipan Biblia kej alma. Ika hebreo kiijtosneki “katli tlaijiyotilana”, uan ika griego kiijtosneki “katli yoltok”, “tlakamej o maseualmej”. a Uajka, alma kiijtosneki se akajya inemilis o nopa maseuali itlakayo; uan amo eli se tlamantli tlen eltok ipan totlakayo tlen amo miki. Ma tikitakaj se keski textos tlen kiampa kinextia.

•   Kema Jehová kichijchijki nopa achtoui maseuali katli kitokaxtik Adán, Biblia kiijtoua ya “pejki kipia yolistli” (Génesis 2:7). Uajka, Adán amo kiselik se alma, ya elki se alma o pejki kipia yolistli, ni kiijtosneki elki se maseuali.

•   Biblia kiijtoua se alma uelis kiitskis se mijkatsi (Levítico 5:2), tlakuas (Levítico 7:20), tekitis (Levítico 23:30), kinekis kikuas nakatl (Deuteronomio 12:20) uan kineltokas tlanauatili (Romanos 13:1). San maseualmej uelij kichiuaj ni tlamantli.

¿Nopa alma miki?

 Kena. Nopa alma kena miki. Onka miak textos tlen kiampa kinextia. Ma tikitakaj se keski.

•   Biblia kiijtoua: “Ajkeya tlajtlakolchiuas elis tlen mikis ipampa itlajtlakol” (Ezequiel 18:4, 20).

•   Kema israeleuanij kitlatsakuiltiyayaj se akajya katli kichiuayaya se ueyi tlajtlakoli, nopa tlanauatili kiijtouayaya: “Nopa maseuali moneki xijmiktikaj” (Éxodo 12:15, 19; 31:14, Reina-Valera, 1909; Levítico 7:20, 21, 27). Levítico 19:8, La Biblia de las familias católicas kej ni kiijtoua kintlatsakuiltiyayaj: “Nopa alma moneki mikis”.

•   Kema miki se akajya, ipan Biblia kemantika kiijtoua “se mijkatsi itlakayo” (Levítico 21:11; Números 6:6). Maske ipan se keski Biblias kitlajtolkuepaj kej “se mijkatsi itlakayo” o “se maseuali katli miktok”, nopa tlajtoli néfesch ika hebreo kiijtosneki “alma”.

Alma uan nemilistli

 Ipan Biblia, alma nojkia kiijtosneki nemilistli. Se neskayotl, ipan Job 33:22 nopa tlajtoli “alma” ika hebreo (néfesch) kiijtosneki “nemilistli”. Kemantika kitekiuiaj nopa tlajtoli kema se akajya nechka mikis, yeka Biblia kiijtoua ‘kinekiyayaj kimiktisej’ (Éxodo 4:19; Jueces 9:17; Filipenses 2:30).

 Kema tijmatij tlake kiijtosneki alma techpaleuia ma tijkuamachilikaj se keski textos tlen Biblia. Se neskayotl, ipan Génesis 35:18 kiijtoua ialma se siuatl “kisayaya” o kej kiijtoua nopa Biblia Torres Amat, “kikixtiyaya ialma”. Ni neskayotl kinextia nopa siuatl nechka mikiskia. Yeka ipan sekinok Biblias kiijtoua nopa siuatl “nechka ayokmo tlaijiyotilanaskia” (La Biblia Latinoamérica, 2011).

¿Kanke pejki kineltokaj nopa alma amo miki?

 Ni tlamachtili amo mokixtijtok ipan Biblia uan pejkej kineltokaj uejkajkia ipan Grecia uan nama ipan miak religiones nojkia kiampa tlamachtiaj. Nopa Diccionario enciclopédico del Cristianismo kiijtoua: “Ni tlamachtili pejkej kineltokaj ipan Grecia, uan kiijtouayayaj se maseuali katli kipia itlakayo (sōma), nojkia kipia alma o tonaltsi (psychḗ) uan yeka se maseuali amo uelis itstos tlaj amo kipia ialma. Maske kiampa kiijtouaj, Biblia tlamachtia se maseuali amo kipia ipan itlakayo se tlamantli tlen kichiua ma yolto”.

 ToTeotsij amo kineki ma momanelo tlen maseualmej kineltokaj ika tlen ya tlamachtia, kej kema kiijtouaj nopa alma amo miki. Biblia kiijtoua: “Ximomokuitlauikaj para axaka inmechkajkayauas ika miak tlajtoli yejyektsitsij uan keja nopa inmechilpis ipan tlen axmelauak uan tlen axipati. Tlen inijuantij inmechmachtiaj uala tlen inintlalnamikilis tlakamej uan tlen ajakamej uan axya nopa tlen xitlauak” (Colosenses 2:8).