Biblia kiijtoua kenijkatsa tiitstoskiaj, tlake panoskia uan kenijkatsa eliskiaj maseualmej kema “nechkatitos para tlamis ni tonali” (Mateo 24:3). Biblia nojkia kitokaxtia “kema tlamis tonali” o “itlamia tonali” (Daniel 8:19; 2 Timoteo 3:1).

 Biblia kiijtok panoskia miak tlamantli tlen kinextiskia tiitstokej ipan itlamia tonali (Lucas 21:7). Ma tikitakaj tlake panoskia:

 Kampa ueli onkaskia tlauilankayotl. Jesús kiijtok: “Kampa ueli motlalanasej uan moteuisej tlakamej ipan sekinok tlaltinij. Tlanauatianij uan ininsoldados tlateuisej ininuaya sekinok tlanauatianij uan ininsoldados” (Mateo 24:7). Nojkia ipan Apocalipsis 6:4 kiixnextia tlauilankayotl ika se katli tlejkotok ipan se kauayo tlen kikixtiskia “tlaseuilistli tlen Tlaltipaktli”.

 Mayantli. Jesús kiijtok onkaskia “mayantli” (Mateo 24:7). Apocalipsis kiijtoua seyok katli nojkia tlejkotok ipan se kauayo, uan kichiuaskia ma onka mayantli kampa ueli (Apocalipsis 6:5, 6).

 Mojmolinis tlali. Jesús kiijtok: “Kampa ueli tlauel mojmolinis tlali” (Mateo 24:7; Lucas 21:11). Kema panoskia nopa, maseualmej tlauel tlaijiyouiskiaj uan kichiuaskia miakej ma mikikaj.

 Kokolistli. Jesús kiijtok onkaskia “uejueyi kokolistli” (Lucas 21:11).

 Kichiuaskiaj tlen amo kuali. Maske nochipa onkatok tlen amo kuali, Jesús kiijtok ipan itlamia tonali momiakiliskiaj “tlen axkintlepanitasej tlen kipia tlanauatili uan tlauel miak tlajtlakolchiuasej” (Mateo 24:12).

 Maseualmej tlauel kinempoloskiaj Tlaltipaktli. Apocalipsis 11:18 kiijtoua tlaxoleuaskiaj o tlanempoloskiaj “ipan Tlaltipaktli”. Ni amo san kiijtosneki maseualmej kichiuaskiaj tlen amo kuali, nojkia tlauel kisokiuiskiaj Tlaltipaktli.

 Maseualmej tlauel amo kuali monejnemiltiskiaj. Biblia kiijtok miakej maseualmej “axmotlaskamatisej [...yon] axtetlasojtlasej. San teijilnamikisej. Tlakamej ayok uelis monauatisej [...,] tekokosej ika pakilistli, uan kikokolisej nochi tlen kuali. [...] Kinkajkayauasej hasta ininuampoyouaj uan mosisinisej uan kichiuasej tlen ueli tlamantli. Moiljuisej miak inintlalnamikilis, pero axneli” (2 Timoteo 3:1-4). Biblia kiijtoua tlen kinextiskiaj maseualmej ipan itlamia tonali eliskia “nelia fiero”.

 Kintlauelkauaskiaj ininchampoyouaj. Biblia kiijtoua ipan 2 Timoteo 3:2, 3, miakej maseualmej amo kinextiskiaj tlaiknelili ika ininchampoyouaj uan konemej amo kintlepanitaskiaj “ininnanauaj uan inintatauaj”.

 Miakej maseualmej ayokmo kiikneliskiaj toTeotsij. Jesús kiijtok: “Miakej tlakamej tlen kineltokaj toTeko ayok kiiknelisej keja achtoui” (Mateo 24:12). Uan nojkia ipan 2 Timoteo 3:4 kiijtoua ipan itlamia tonali maseualmej “kitemosej san tlen ika uelis mopakilismakasej, pero axkitemosej toTeko”.

 Miakej amo nelnelia kitlepanitaskiaj toTeotsij. Biblia kiijtoua ipan 2 Timoteo 3:5, miakej maseualmej kiijtoskiaj kitekipanouaj toTeotsij uan ika tlen kichiuaskiaj kinextiskiaj amo nelia.

 Mokuamachiliskia miak tlajtolpanextili. Ipan amochtli Daniel kiijtoua ipan “itlamia tonali” miakej maseualmej kikuamachiliskiaj tlen Biblia tlamachtia. Se neskayotl, kuali kikuamachiliskiaj nopa tlajtolpanextili tlen moaxitia ipan ni tonali (Daniel 12:4).

 Momoyauaskia nopa kuali tlamachtili ipan nochi Tlaltipaktli. Jesús kiijtok: “Tlakamej tlakamauitij ni kuali tlamachtili [...] ipan nochi tlaltinij ipan ni Tlaltipaktli” (Mateo 24:14).

 Maseualmej amo kinekiskiaj kitlakakilisej yon amo kineltokaskiaj tiitstokej ipan itlamia tonali. Jesús kiijtok miakej maseualmej amo kineltokaskiaj tiitstokej ipan itlamia tonali (Mateo 24:37-39). Uan amo san nopa kichiuaskiaj, 2 Pedro 3:3, 4 kiijtoua amo kineltokaskiaj uan kiijtoskiaj amo nelia tiitstokej ipan itlamia tonali.

 Moaxitiskia nochi tlajtolpanextili. Jesús kiijtok ipan itlamia tonali moaxitiskia nochi tlajtolpanextili uan amo san se keski (Mateo 24:33).

 Kena. Tlen panotok ipan Tlaltipaktli uan tlen kiijtoua Biblia kinextia itlamia tonali pejki ipan 1914, uan ipan nopa xiuitl mochijki nopa Achtoui Ueyi Tlauilankayotl. Xikita ni video uan xikita kenijkatsa tlen panotok ipan ni tonali kinextia tiitstokej ipan itlamia tonali:

 Ipan 1914, toTeotsij iTlanauatijkayo pejki tekichiua ipan iluikak. Kema pejki tekichiua, kinkixtijkej Diablo uan amo kuali iajakauaj tlen iluikak, uan yeka nama san kichiuaj tlen kinekij ipan Tlaltipaktli (Apocalipsis 12:7-12). Kej monejnemiltiaj uan moyoliljuiaj maseualmej kinextia Satanás kinyakantok. Yeka ipan itlamia tonali “nelia fiero” (2 Timoteo 3:1).

 Miakej maseualmej tlauel mokuesouaj pampa tiitstokej ipan tonali tlen tlauel ouij. Nojkia kiitaj tlauel amo kuali tlen kichiuaj maseualmej. Uan sekinok tlauel mokuesouaj pampa moiljuiaj maseualmej ininselti momiktisej se ika seyok.

 Uan maske miakej maseualmej nojkia kintekipachoua tlen pano ipan ni tonali, motemachiaj teipa kuali itstosej. ¿Kenke kiampa moiljuiaj? Pampa motemachiaj toTeotsij iTlanauatijkayo nechka kitlamiltis nochi kuesoli tlen onka ipan ni tonali (Daniel 2:44; Apocalipsis 21:3, 4). Nojkia kinextiaj kipiaj ininyolo uan kichiaj toTeotsij ma kichiua tlen kiijtojtok uan tlauel kinyolchikaua tlen Jesús kiijtok: “Pero ajkeya kiijiyouis nochi tlen panotiualas hasta itlamia tonali, nijmakixtis” (Mateo 24:13; Miqueas 7:7).