Biblia kiijtok ipan ni tonali mojmoliniskia tlali, onkaskia mayantli, uejueyi kokolistli, uan tlamantli tlen temajmatiskia (Lucas 21:10, 11). Tlen panok ipan xiuitl 2022 a kinextia nojua moaxitia tlen kiijtoua ni tlajtolpanextili. Ma timoiljuikaj tlen pano ipan Ucrania, miakej maseualmej tlauel tlaijiyouiaj pampa mochijtok tlauilankayotl. Uan ni pejki, kema nojua onkatoya COVID-19 ipan nochi Tlaltipaktli. Nojkia, miakej maseualmej tlauel tlaijiyouijkej pampa mojmolinik tlali ipan Haití, tlauel tlakiajki uan tlaajakak ipan Centroamérica, Filipinas uan sureste tlen África. ¿Kenijkatsa Jehová itlajtoltemakauaj kinpaleuijkej toikniuaj?

 Ipan xiuitl 2022, Jehová itlanechikol kinpaleuik toikniuaj kema se 200 tlamantli tlasosolok kampa itstoyaj. Motekiuik nechka 12 millones de dólares. b Ma tikitakaj kenijkatsa motekiuik tomij tlen toikniuaj temakaj uan kiampa kinpaleuijkej miakej toikniuaj kema ome tlamantli kintlasojsoljuilik.

 Ipan agosto 14, 2021, ipan sur tlen Haití chikauak mojmolinik tlali, elki magnitud 7.2. Tlauel techyolkokoua pampa omej tosiuaikniuaj uan se toikni mijkej. Miakej katli amo mijkej, tlauel tlaijiyouijkej pampa ayokmo kuali itstoyaj uan amo kuali kiyolmatiyayaj. Se toikni katli itoka Stephane, kiijtok: “Tlauel miakej maseualmej mijkej, yeka ipan sejse semana nochipa kitlalpachouayayaj se akajya, kiampa panok ome metstli”. Seyok toikni katli itoka Éliézer, kiijtok: “Miakej toikniuaj sosolijki ininchaj, ininyoyo, ininzapatos uan sekinok tlamantli tlen tlauel kitekiuiyayaj. Uan pampa miakpa nojua mojmolinik tlali maske amo chikauak, miakej itstoyaj ika majmajtli”.

 Toikniuaj nimantsi pejkej tlapaleuiaj. Kali Betel tlen Haití temakak yoyonkali, lonas, colchones, tlen ika ueliskia kicargarosej teléfonos ika tonati (cargadores solares) uan 53 toneladas tlakualistli. Nojkia mokualchijchijki kipano 100 kali. Ika nochi tlen mochijki, motekiuik kipano se millón de dólares.

 Toikniuaj tlauel kitlaskamatij pampa kinpaleuijkej. Lorette kiijtok: “Kema mojmolinik tlali, tlauel kisojsolok tochaj uan kampa titekitiyayaj, yon amo tijpiayayaj tlen tijkuasej. Maske kiampa techpanok, Jehová itlanechikol nochipa techmakak tlen techpolouayaya”. Micheline kiijtok: “Na uan nokoneuaj tiitstoyaj ipan se xajkali, yeka kema mojmolinik tlali nima sosolijki. San ueliyaya nimomaijtoua, uan Jehová nechnankilik ika tlen kichijkej toikniuaj. Pampa techpaleuijkej, nama tijpiaj se kali tlen kuali kichijchijtokej. Jehová tlauel nechpaleuijtok, yeka mojmostla nijneki nijnextilis tlauel nijtlaskamatilia”.

 Tekichiuanij kiitakej kenijkatsa tekitij toikniuaj. Se tekichijketl tlen altepetl L’Asile kiijtok: “Nijneki niinmechiljuis tlauel kuali pampa nima inualajkej intlapaleuikoj. Uan nojkia pampa inkinextiaj inkintlepanitaj tekichiuanij. Tlauel nechpaktia nikitas intlapaleuiaj pampa inmechtekipachoua tlen kinpano sekinok uan amo pampa inkinekij tomij. Nima nesi inkichiuaj pampa inteikneliaj”.

 Ipan enero 24, 2022, ipan Mozambique tlauel chikauak tlaajakak uan tlakiajki, uan teipa nojkia kiampa panok ipan Malaui. Nopa kichijki ma uetsi tlauel miak atl uan chikauak ma tlaajaka (100 kilómetros por hora). Ayokmo onkak tlauili, tlauel tlatemik uan sosolijki puentes.

 Kipano 30,000 toikniuaj tlen Malaui uan Mozambique kintlasojsoljuilik nopa ajakatl. Charles, se toikni katli kinpaleuik toikniuaj, kiijtok: “Kema nikitak toikniuaj tlauel tlaijiyouiyayaj uan kipolojtoyaj nochi tlen kipixtoyaj, tlauel nechyolkokok uan amo nijmatki tlake nijchiuas”. Nojkia kipolojkej nochi tlakualistli tlen kiajoktoyaj, tlen kitoktoyaj uan nojkia ininchaj. Tlauel amo kuali tlen kipanok se toikni, pampa isiua uan omej isiuapiljuaj misauijkej kema mixkuepki tlen ika yauiyayaj.

 Nopa atl tlauel tlasosolok. Kema panok tlajkoyoual, toikniuaj Sengeredo kikajkej kema nopa atl chikauak monechkauijtiauiyaya ininchaj, pampa mixkuepki atl tlen ome atemitl. Toikni Sengeredo kiniljuik ichampoyouaj monekiyaya kisteuasej. Kuali tlen kitlapejpenik toikni, pampa san onkistejkej uan nopa atl nima kikuitikis ininchaj uan nochi tlen kipixtoyaj ijtlakajki uan sekij kiuikak atl. Ni toikniuaj yajkej ipan kali kampa mosentiliyayaj. Maske nochipa asiyayaj ipan tlajko hora, nama kichijkej ome hora. Kema asitoj tlauel xolontoyaj uan siajtoyaj pero amo tleno kinpanok.

 Kali Betel tlen Malaui uan Mozambique nima kiitakej kenijkatsa kinpaleuisej toikniuaj. Kiniljuijkej toikniuaj katli tepaxalouaj chijchikuasej metstli uan ueuejtlakamej ma kiitakaj kenijkatsa itstoyaj toikniuaj, ma kinyolchikauakaj uan ma kinpaleuikaj nojua kuali ma tlaneltokakaj. Katli kiitaj kema se tlenijki tetlasojsoljuilia kiniljuijkej ma kiyakanakaj nopa tekitl. Pampa kiampa kichijkej, toikniuaj nima kiselijkej tlakualistli uan sekinok tlamantli tlen tlauel moneki. Motekiuik kipano 33,000 dólares tlen ika kinmakakej tlen monekiyaya, uan kipano 300,000 dólares tlen ika kikualchijchijkej ininchaj.

 Katli kiitaj kema se tlenijki tetlasojsoljuilia kuali kiteuijkej tomij, tlauel kuali tlen kichijkej pampa tlauel tlapatiyojki. Kema panotoya chikome metstli ika pejtoyaj kinpaleuiaj toikniuaj, tixtli patiyojki se 70 %, nopa tlauel motekiuia ipan Malaui. Gasolina nojkia patiyojki. Toikniuaj kikojkej miak tlakualistli, kiampa amo kitekiuijkej miak tomij, pampa amo patiyo tlaxtlajkej yon amo miak kininankej kema kinkauilitoj nopa tlakualistli.

 Nochi tlen kichijki Jehová itlanechikol tlauel kinyolchikajki toikniuaj. Felisberto, se toikni tlen eua Mozambique, kiijtok: “Nikitstok amo onka yon se religión tlen temaka miak tlamantli: tlen ika kalchiuasej, tlen ika kiuikasej tlen kitekiuisej, katli tekitisej, tlen kikuasej uan katli tlayakanaj ika miak tlaiknelili. Tlen kichijkej toikniuaj kinextik tlauel teikneliaj, kej Jesús kiijtok ipan Juan 13:34, 35”. Ester, se toikni tlen eua Malaui, uan katli ya miktoya iueue uan sosolijki ichaj, kiijtok: “Tlauel nimokuesojtoya pampa amo nijpiayaya tomij tlen ika nijchijchiuaskia seyok kali. Yeka, kema toikniuaj nechchijchiuilijkej seyok nochaj, nijmatki kejuak ya niitstoya ipan Xochimili”.

 Tijmatij ipan ni tonali nojua onkatias miak tlamantli tlen tetlasojsoljuilis (Mateo 24:7, 8). Timotemachiaj toikniuaj nochipa kipiasej tlen kinpolos, pampa inmojuantij tlauel inmechpaktia intemakasej. Ipan donate.isa4310.com inkiitasej kenijkatsa uelis intemakasej tomij. Tlauel tiinmechtlaskamatiliaj pampa intemakaj tlen inkipiaj.