Maske uelis kinpaleuis, nojkia uelis kinpanos ni tlamantli tlaj amo kitekiuiaj Internet kej kinamiki:

• Uelis motonalpolosej uan ayokmo itstosej sansejko.

• Ayokmo mosiajkauasej uan nojua tekitisej ininchaj.

• Ininnamik moiljuis kichijtok tlen amo kinamiki o uelis mokajkayauasej.

KEMA ITSTOKEJ SANSEJKO

Se tlakatl katli itoka Michael, kiijtoua: “Kema niitstok iuaya nosiua, kemantika nijyolmati kejuak amo itstok nouaya pampa nochipa kitlachilijtok icelular uan kiijtoua: ‘Xinechtlapojpoljui, amo ueltoya nijpoua tlen nechtlajkuiljuilijkejʼ”. Jonathan, katli nojkia kipia isiua, kiijtoua kemantika “katli mosenkajtokej kiyolmatij mouejkatlalijtokej maske sansejko itstokej”.

XIMOILJUI NI: ¿Miakpa nechnojnotsaj o nechtlajkuiljuiliaj ika celular uan yeka amo ueli niitstok iuaya nonamik? (EFESIOS 5:33).

IPAN TEKITL

Se keskij maseualmej moneki tekitisej kema kinnojnotsasej maske ya tlayoua. Uan sekij maske amo moneki kiampa tekitisej, nojua tekitij ininchaj. Se tlakatl katli itoka Lee, kiijtoua: “Kema niitstok iuaya nosiua, nochipa nitlanankilia kema nechnojnotsaj uan nijtlachilia tlen nechtlajkuiljuiliaj ipan noteki”. Uan se siuatl katli itoka Joy, kiijtoua: “Nitekiti nochaj, uan yeka ouij nijmati nimosiajkauas. Moneki nijchiuas kampeka nikitas noteki kej kinamiki”.

XIMOILJUI NI: ¿Kuali tijtlakakilia monamik kema mitskamanaljuijtok? (LUCAS 8:18).

UELIS MOKAJKAYAUASEJ

Se keskij ixtlamatinij kiijtouaj, miakej katli mosenkajtokej mokualaniaj pampa amo kimatij tlake kitlalia ininnamik ipan redes sociales. Katli kintlajtlanijkej, se 10% kiijtojkej kitlalijkej se keski tlamantli ipan Internet uan amo kiiljuijkej ininnamik.

Maseualmej kiijtouaj redes sociales eli kej “se bomba tlen uelis kintlanauis katli mosenkajtokej” uan uelis kichiuas ma momekatikaj. Se keskij abogados kiijtouaj miakej mokauaj pampa tlauel kitekiuiyayaj redes sociales.

XIMOILJUI NI: ¿Amo tijnextilia monamik tlen tijtlajkuiljuilia se akajya? (PROVERBIOS 4:23).

XIJCHIUA TLEN TLAUEL IPATI

Se akajya katli amo kikua tlen kinamiki, teipa uelis mokokos. Uan katli amo kichiua kampeka itstos iuaya inamik, teipa nojkia kipias miak tlaouijkayotl (Efesios 5:28, 29).

Xikitakaj tlen inmechpaktiskia inkichiuasej o xikijkuilokaj tlen inmechpaleuis amo inkipiasej tlaouijkayotl pampa inkitekiuiaj Internet.

• Tijchiuasej kampeka titlakuasej sansejko maske sempatsi ipan se tonal.

• Tijchiuasej kampeka amo tlauel tijtekiuisej celular o tableta.

• Tijchiuasej sansejko se tlamantli tlen techpaleuis nojua tlauel ma timoiknelikaj.

• Tijseuisej tocelular o tableta ika tlayoua, uan tijkauasej kampa amo nima tijkuisej.

• Mojmostla tijchiuasej kampeka tikamanaltisej 15 minutos uan amo tijtekiuisej celular yon tableta.

• Timoiljuisej tlake hora ayokmo tijtekiuisej Internet.