SEKIJ MOILJUIAJ AMO. Se tepajtijketl kiijtok kema se akajya moyakana ika Biblia eliskia kejuak se akajya kinekiskia momachtis Química ika se amochtli tlen kichijchijkej ipan xiuitl 1920. Katli amo kitlepanitaj Biblia uelis mitstlajtlanisej: “Tlaj tijnekiskia tijyekos kenijkatsa motekiuia se computadora katli namanok kiski, ¿tikitaskia ika se amochtli kampa kiijtoua kenijkatsa motekiuia se computadora tlen ya uejkaj kichijchijkej?”. Sekij moiljuiaj Biblia ayokmo uelis techpaleuis ipan ni tonali.

Ipan ni tonali, ixtlamatinij kichijchijtokej miak yajyankuik tlamantli. Yeka miakej moiljuiaj ayokmo moneki timoyakanasej ika Biblia. Ipan Internet, miakej kintlajtolmakaj sekinok maseualmej uan kiniljuiaj kenijkatsa kuali itstosej. Ipan televisión tlauel kinextiaj tlen kiijtouaj psicólogos, tlayakananij tlen se religión uan katli kiijkuilouaj amochtli. Onka tlauel miak amatlajkuiloli kampa kiijtoua se akajya iselti uelis mopaleuis, uan katli kinamakaj, kitlanij tlauel miak tomij.

Tlaj kampa ueli tijpantiaj yajyankuik tlamachtili, ¿kinamiki tikitasej tlake tetlajtolmaka Biblia tlaj kipia nechka 2,000 xiuitl ika moijkuilok? Miakej kiijtouaj tlaj timoyakanasej ika Biblia, eliskia kejuak timomachtiskiaj ika se amochtli tlen nama ayokmo tepaleuia. ¿Nelia tlen kiijtouaj? Amo, nopa amo nelia. Nochi tlen ciencia tlamachtia uan tlen ixtlamatinij kichiuaj, nimantsi mopatla. Maske kiampa pano, tlen maseualmej kinpoloua, amo kema mopatla. Maseualmej kinekij kuali itstosej, yolpaktosej, itstosej ika temachili, yolpakisej ika ininchampoyouaj uan ika ininuampoyouaj.

Maske Biblia kipia miak xiuitl ika moijkuilok, kiijtoua kenijkatsa uelis yolpakisej maseualmej. Nojkia kiijtoua toTeotsij kichijki ma moijkuilo. Nopaya toTeotsij kuali techtlajtolmaka uan techmachtia kenijkatsa tikixnamikisej tlaouijkayotl (2 Timoteo 3:16, 17). Nochi tlen Biblia kiijtoua uejkauas nochipa pampa nochi tlen techtlajtolmaka amo kema mopatlas. Biblia kiijtoua: “ITlajtol toTeko yoltok” (Hebreos 4:12).

¿Nelia tlen tikijtouaj? ¿Ayokmo techpaleuia Biblia, o eli se amochtli tlen “yoltok” katli tlauel kuali techyakana? Ipan ni achtoui pilamochtsi, monankilia nopa tlajtlanili.