Ximoiljui ni: David nemi ipan icarro kampa amo tlaixmati. Kema kiita itoka nopa calles, kiita mokuapolojtok pampa amo nopaya kinekiyaya yas. Uelis David amo kiitak kenijkatsa yajki ipan seyok ojtli.

Tlaj ta nojkia mitspanoskia kej David, ¿tlake tijchiuaskia?

Uelis tijchiuas se tlen ni tlamantli:

1. Tikiljuis se akajya ma mitsnextili kenijkatsa tiasiti kampa tijnekiyaya tias.

2. Tikitas se mapa o tijtekiuis GPS.

3. Nojua tijtokilis nopa ojtli pampa timoiljuia teipa tiasiti kampa tijnekiyaya tias.

Tlauel amo kuali tlaj tijchiuaskia tlen kiijtoua nopa tlamantli 3.

Tlen kiijtoua nopa achtoui tlamantli amo tlauel mitspaleuis, uan tlen kiijtoua tlamantli 2 kena tlauel mitspaleuis pampa tikitas ipan mapa o ika GPS ipan tlake ojtli moneki tias.

Biblia nojkia uelis kiampa mitspaleuis.

Nopa amochtli tlen tlauel monamaka uelis:

• Mitsyakanas kema tijpias kuesoli.

• Mitspaleuis kuali ximoixmati uan nojua kuali ximonejnemilti.

• Mitsnextilis kenijkatsa kinamiki timonejnemiltis.

Kema peua tikamanaltij, tijnekij tijmatisej miak tlamantli:

• ¿Kanke tlami iluikaktli?

• ¿Kenke petlanij sitlalimej?

Teipa tijnekij tijmatisej kenke pano se keski tlamantli ipan Tlaltipaktli:

• ¿Kenke techpano tlen amo kuali?

• ¿Kenke timikij?

¿Tijmajtoya nochi ni tlajtlanili monankilia ipan Biblia?

Miakej kiijtouaj Biblia san kipia miak tlapoualistli tlen amo nelia panok, o kiijtouaj Biblia ayokmo motekiuia nama, o tlauel ouij se kikuamachilis. ¿Nelnelia tlen kiijtouaj? ¿Nelnelia tlen kiijtouaj nopa maseualmej tlen Biblia, o uelis san mokuapolojtokej?

Ximoiljui ni: maseualmej moiljuiaj Biblia kiijtoua toTeotsij kinauatia Tlaltipaktli. ¿Nelnelia tlen moiljuiaj? Ipan Tlaltipaktli pano tlen tlauel amo kuali. Kampa ueli tlauel tlaijiyouiaj, kipiaj kokolistli uan mikij, miakej amo kipiaj tomij, uan sekij kintlasojsoljuilia ajakatl. ¿Timoiljuia toTeotsij katli techiknelia kichijtok ma pano nopa?

¿Tijnekiskia tijmatis ajkia kinauatia Tlaltipaktli? Tlauel mitspaktis tikitas tlake kiijtoua Biblia.

Uelis tikitak nochi tlen tetlajtolmaka ni pilamochtsi mokixtijtok ipan Biblia. Jehová itlajtoltemakauaj motemachiaj Biblia uelis techyakanas ipan tonemilis, pampa kimatij “toTeko temakak nochi nopa tlatsejtseloltik Tlajkuiloli” tlen ika “techmachtia tlen melauak”, “techtlakaualtia [...] [uan] techtlalnamiktia” (2 Tim. 3:16, 17). Ximomachti nopa amochtli, pampa maske tlauel ya uejkaj kiijkuilojkej, tlauel tepaleuia ipan ni tonali.