•  ကျမ်းစာအဖြေ

•  အပျိုစင်က ဘယ်လို ကလေးမွေးနိုင်သလဲ

•  အပျိုစင်ကို ကလေးမွေးစေရတဲ့ ရည်ရွယ်ချက်က ဘာလဲ

•  မာရိဟာ အမြဲ အပျိုစင်ပဲလား

•  အပျိုစင်ကနေ ယေရှု မွေးဖွားခြင်းက “လုံးဝ အပြစ်ကင်းတဲ့ သန္ဓေတည်ခြင်း” လား

•  မာရိကို ဘယ်လို ရှုမြင်သင့်သလဲ

 မာရိဟာ အပျိုစင်ဘဝမှာ ယေရှုကို မွေးဖွားရတဲ့ အခွင့်ထူး ရရှိခဲ့တယ်လို့ ကျမ်းစာက ဆိုတယ်။ ဒီအံ့ဖွယ်အမှုအကြောင်းကို ဟေရှာယကျမ်းမှာ ကြိုဟောထားတယ်။ ပြည့်စုံချက်ကို မဿဲနဲ့ လုကာခရစ်ဝင်ကျမ်းတို့မှာ မှတ်တမ်းတင်ထားတယ်။

 မေရှိယ ပေါ်ထွန်းခြင်းနဲ့ပတ်သက်တဲ့ ပရောဖက်ပြုချက် တစ်ချက်မှာ “မိန်းမပျိုတစ်ယောက် ကိုယ်ဝန် ရှိပြီး သားလေး မွေးလာမယ်” လို့ ဟေရှာယ ကြိုဟောခဲ့တယ်။ (ဟေရှာယ ၇:၁၄) ဟေရှာယ ကြိုဟောချက်ဟာ ယေရှုကို မာရိ ကိုယ်ဝန်ဆောင်ချိန်မှာ ပြည့်စုံတယ်လို့ ဘုရားသခင့် စွမ်းအားတော် လမ်းညွှန်မှုနဲ့ ခရစ်ဝင်ကျမ်းရေးသူ မဿဲက ဖော်ပြတယ်။ မာရိ အံ့ဖွယ်နည်းနဲ့ ကိုယ်ဝန်ဆောင်တဲ့အကြောင်း မှတ်တမ်းတင်ပြီးနောက် မဿဲ ဒီလို ဖော်ပြတယ်– “ဒါတွေ ဖြစ်ပျက်လာတဲ့အတွက် ပရောဖက်ကတစ်ဆင့် ယေဟောဝါ ပြောခဲ့တဲ့စကား ပြည့်စုံလာတယ်။ ‘အပျိုစင် aဟာ ကိုယ်ဝန် ရှိလာပြီး သားလေး မွေးလိမ့်မယ်။ အဲဒီသားကို ဧမာနွေလလို့ နာမည်ပေးလိမ့်မယ်’ ဆိုတဲ့စကားပဲ။ ဧမာနွေလဆိုတာ ‘ငါတို့နဲ့အတူ ဘုရားသခင် ရှိတယ်’ လို့ အဓိပ္ပာယ်ရတယ်။”—မဿဲ ၁:၂၂၊ ၂၃။

 ခရစ်ဝင်ကျမ်းရေးသူ လုကာကလည်း မာရိ အံ့ဖွယ်နည်းနဲ့ ကိုယ်ဝန်ရှိခြင်းအကြောင်း မှတ်တမ်းတင်ခဲ့တယ်။ ဘုရားသခင်က ကောင်းကင်တမန် ဂါဗြေလကို “ဂါလိလဲပြည်၊ နာဇရက်မြို့မှာရှိတဲ့၊ မာရိလို့ခေါ်တဲ့ အပျိုစင်တစ်ယောက်ဆီ စေလွှတ်တယ်။ မာရိဟာ ဒါဝိဒ်အမျိုးထဲက ယောသပ်လို့ခေါ်တဲ့ လူတစ်ယောက်နဲ့ စေ့စပ်ထားတယ်” လို့ ရေးခဲ့တယ်။ (လုကာ ၁:၂၆၊ ၂၇) မာရိကိုယ်တိုင်လည်း မိမိဟာ အပျိုစင်ဖြစ်ကြောင်း ပြောခဲ့တယ်။ မေရှိယ ယေရှုရဲ့ မိခင် ဖြစ်လာမယ်လို့ ကြားတဲ့အခါ “ဒါ ဘယ်လိုလုပ် ဖြစ်နိုင်မှာလဲ။ ကျွန်မဟာ အပျိုစင်ပါ” လို့ မာရိ ပြောခဲ့တယ်။—လုကာ ၁:၃၄။

 မာရိဟာ ဘုရားသခင့် သန့်ရှင်းသော စွမ်းအားတော် တန်ခိုးကြောင့် ကိုယ်ဝန် ရှိလာတယ်။ (မဿဲ ၁:၁၈) “ခင်ဗျားအပေါ် သန့်ရှင်းသော စွမ်းအားတော် သက်ရောက်ပြီး အမြင့်ဆုံးအရှင်ရဲ့ တန်ခိုးတော် လွှမ်းမိုးလိမ့်မယ်။ ဒါကြောင့် မွေးလာမယ့် ကလေးဟာ သန့်ရှင်းတဲ့သူ၊ ဘုရားသခင်ရဲ့ သား b လို့ အခေါ်ခံရလိမ့်မယ်။” (လုကာ ၁:၃၅) ဘုရားသခင်က သားတော်ရဲ့ အသက်ကို မာရိရဲ့ သားအိမ်ထဲ အံ့ဖွယ်ရွှေ့ပြောင်းပေးပြီး ကိုယ်ဝန် ရှိစေခဲ့တယ်။

 အပျိုစင်ကို ဘုရားသခင် အသုံးပြုရတာက စုံလင်တဲ့ လူသားတစ်ယောက်အဖြစ် ယေရှု မွေးဖွားလာပြီး လူသားတွေကို အပြစ်နဲ့ သေခြင်းကနေ ကယ်နုတ်ဖို့ ဖြစ်တယ်။ (ယောဟန် ၃:၁၆။ ဟီဘရူး ၁၀:၅) ဘုရားသခင်က ယေရှုရဲ့ အသက်ကို မာရိရဲ့ သားအိမ်ထဲ ပြောင်းရွှေ့ပေးခဲ့တယ်။ ဘုရားရဲ့ သန့်ရှင်းသော စွမ်းအားတော်က မစုံလင်မှု လုံးဝ မပါတဲ့ သန္ဓေသားအနေနဲ့ ကြီးထွားလာစေဖို့ ကာကွယ်ပေးခဲ့တယ်။—လုကာ ၁:၃၅။

 ဒါကြောင့် ယေရှုဟာ အာဒံ အပြစ် မလုပ်မီကလိုမျိုး စုံလင်တဲ့ လူသားအနေနဲ့ မွေးဖွားလာတယ်။ ယေရှု “အပြစ် မကျူးလွန်ခဲ့ဘူး” လို့ ကျမ်းစာက ဆိုတယ်။ (၁ ပေတရု ၂:၂၂) စုံလင်တဲ့ လူသားအနေနဲ့ ယေရှုဟာ လူသားတွေကို အပြစ်နဲ့ သေခြင်းကနေ ပြန်ရွေးဖို့ ရွေးဖိုး ပေးနိုင်ခဲ့တယ်။—၁ ကောရိန္သု ၁၅:၂၁၊ ၂၂။ ၁ တိမောသေ ၂:၅၊ ၆။

 မာရိဟာ အပျိုစင် အမြဲဖြစ်တယ်လို့ ကျမ်းစာ မသွန်သင်ဘူး။ မာရိမှာ တခြားကလေးတွေ ရှိတယ်လို့ ဖော်ပြထားတယ်။—မဿဲ ၁၂:၄၆။ မာကု ၆:၃။ လုကာ ၂:၇။ ယောဟန် ၇:၅။

 မဟုတ်ပါဘူး။ ကက်သလစ် စွယ်စုံကျမ်းသစ်အရ လုံးဝ အပြစ်ကင်းတဲ့ သန္ဓေတည်ခြင်း အယူဝါဒကြောင့် “အပျိုစင် မာရိဟာ မိခင်ဝမ်းထဲကတည်းက အပြစ်နဲ့ ကင်းသူ ဖြစ်တယ်ဆိုတဲ့ အယူအဆ ပေါ်ပေါက်စေတယ်။ လူသားတွေဟာ အပြစ်ကို အမွေရခဲ့ပေမဲ့ မာရိကတော့ အပြစ်မပါဘဲ မွေးဖွားလာတဲ့ အထူးကျေးဇူးတော် ခံစားခဲ့ရတယ်” လို့ ဖော်ပြထားတယ်။ c

 မာရိဟာ အပြစ်မပါဘဲ မွေးဖွားလာတယ်လို့ ကျမ်းစာ ဘယ်နေရာမှာမှ မဖော်ပြထားဘူး။ (ဆာလံ ၅၁:၅။ ရောမ ၅:၁၂) မောရှေပညတ်မှာ မိခင်တွေကို အပြစ်ဖြေရာအလှူ ပူဇော်ဖို့ တောင်းဆိုထားတယ်။ အဲဒီအလှူ မာရိ ပူဇော်ခဲ့တာကို ကြည့်ရင် အပြစ်သား ဖြစ်ကြောင်း ထင်ရှားတယ်။ (ဝတ်ပြုရာ ၁၂:၂-၈။ လုကာ ၂:၂၁-၂၄) ကက်သလစ် စွယ်စုံကျမ်းသစ် မှာ ဒီလိုဖော်ပြထားတယ်– “လုံးဝ အပြစ်ကင်းတဲ့ သန္ဓေတည်ခြင်း အယူအဆ ကျမ်းစာမှာ မသွန်သင်ထားဘူး။ ဘုရားကျောင်းတော် ထွင်လိုက်တဲ့ အယူအဆ ဖြစ်ကြောင်း ထင်ရှားတယ်။”

 မာရိဟာ ယုံကြည်ခြင်း ရှိသူ၊ နာခံမှု၊ နှိမ့်ချမှု၊ ဘုရားရေးရာ စိတ်ထားရှိသူအဖြစ် စံနမူနာကောင်း တင်ပြခဲ့တယ်။ တုပထိုက်တဲ့ သစ္စာရှိသူတွေထဲမှာလည်း ပါဝင်တယ်။—ဟီဘရူး ၆:၁၂။

 ယေရှုရဲ့ မိခင်အဖြစ် ထူးမြတ်တဲ့တာဝန် ရရှိပေမဲ့ မာရိကို ဝတ်ပြုကိုးကွယ်သင့်တယ်၊ သူ့ဆီ ဆုတောင်းသင့်တယ်လို့ ကျမ်းစာက မသွန်သင်ဘူး။ ယေရှုက မိခင်ကို အထူးဂုဏ်တင်ခဲ့တာမျိုး မရှိသလို ဂုဏ်တင်ဖို့ တပည့်တွေကိုလည်း မမှာကြားခဲ့ဘူး။ မာရိအကြောင်းကို ခရစ်ဝင်ကျမ်းတွေနဲ့ တမန်တော်ကျမ်းမှာ တစ်ခါပဲ ဖော်ပြထားတယ်။ ဓမ္မသစ်ကျမ်းလို့ခေါ်တဲ့ တခြားကျမ်းစောင် ၂၂ စောင်မှာ မာရိအကြောင်း မပါတော့ဘူး။—တမန်တော် ၁:၁၄။

 မာရိဟာ ပထမရာစု ခရစ်ယာန်တွေရဲ့ အထူးအာရုံစိုက်မှု၊ ကြည်ညိုမှု ရထားတယ်ဆိုတဲ့ အထောက်အထား တစ်ခုမှ ကျမ်းစာမှာ မပါဘူး။ ဘုရားသခင် တစ်ပါးတည်းကိုသာ ဝတ်ပြုကိုးကွယ်ဖို့ ခရစ်ယာန်တွေကို ကျမ်းစာ သွန်သင်ထားတယ်။—မဿဲ ၄:၁၀။