ယုံကြည်ချက်ကြောင့် ထောင်ချခံရ—ရုရှား
မျက်မှောက်ခေတ်ရုရှားက ယေဟောဝါသက်သေတွေရဲ့သမိုင်းကြောင်းဟာ ဖိနှိပ်မှု၊ နှိပ်စက်မှုမှတ်တမ်းပါပဲ။ သက်သေခံတွေဟာ ဥပဒေကိုလေးစားပြီး ငြိမ်းချမ်းစွာနေထိုင်ကြတဲ့ နိုင်ငံသားတွေဖြစ်ပေမဲ့ ၂၀ ရာစုရဲ့ အချိန်အများစုမှာ အာဏာပိုင်တွေက သက်သေခံတွေကို မတရားဆက်ဆံခဲ့ကြတယ်။ ဆိုဗီယက်ပြည်ထောင်စုအစိုးရရဲ့ ရည်ရွယ်ချက်က သက်သေခံတွေကို အနုနည်း၊ အကြမ်းနည်း သုံးပြီး ဆိုဗီယက်အတွေးအခေါ်ကို လက်ခံလာအောင်လုပ်ဖို့ဖြစ်တယ်။ သက်သေခံတွေဟာ ကျမ်းစာနဲ့ ကျမ်းစာစာပေတွေ လက်ဝယ်ပိုင်ဆိုင်ခွင့် မရခဲ့ကြဘူး။ အမြဲလိုလို စောင့်ကြည့်ခံနေရပြီး ဘာသာရေးအစည်းအဝေးတွေကို တိတ်တဆိတ် ကျင်းပခဲ့ရတယ်။ မိသွားရင် ရိုက်နှက်ခံရတယ်၊ နှစ်ရှည်ထောင်ဒဏ် ချမှတ်ခံရတယ်။ အစိုးရက သက်သေခံထောင်နဲ့ချီကို ဆိုက်ဘေးရီးယားဆီ ပြည်နှင်ခဲ့တယ်။
၁၉၉၁ ခုနှစ်မှာ အပြောင်းအလဲ ဖြစ်လာတယ်။ ရုရှားအစိုးရက ယေဟောဝါသက်သေတွေကို တရားဝင်အသိအမှတ်ပြုလိုက်ပြီး အာဏာပိုင်တွေရဲ့အနှောင့်အယှက်မရှိ လွတ်လွတ်လပ်လပ် ဝတ်ပြုခွင့်ပေးခဲ့တယ်။ ဒါပေမဲ့ ငြိမ်းငြိမ်းချမ်းချမ်း နေရတဲ့အချိန်က သိပ်မကြာခဲ့ပါဘူး။
၂၀၀၉ ခုနှစ်မှာ ရုရှားတရားရုံးချုပ်က ယေဟောဝါသက်သေ အသင်းတော်တစ်ခုကို “အစွန်းရောက်အသင်း” အဖြစ် သမုတ်တဲ့ အောက်တရားရုံးရဲ့ဆုံးဖြတ်ချက်ကို အတည်ပြုလိုက်တဲ့အခါ ဆန့်ကျင်မှုနဲ့ ပိတ်ပင်မှုတွေ စတင်တိုးများလာတယ်။ နှစ်များစွာ တရားရေးရင်ဆိုင်မှုတွေလုပ်ပြီးနောက် ၂၀၁၇ ခုနှစ်၊ ဧပြီလမှာ ရုရှားတရားရုံးချုပ်က သက်သေခံတွေရဲ့တရားဝင်အသင်းအဖွဲ့တွေကို အစွန်းရောက်အဖွဲ့ဆိုတဲ့ စွဲချက်နဲ့ ပိတ်ပင်လိုက်တယ်။ ရုရှားအာဏာပိုင်တွေက ချက်ချင်းပဲ အသင်းအဖွဲ့တွေရဲ့ပိုင်ဆိုင်ရာကို သိမ်းတယ်၊ ဝတ်ပြုရာနေရာတွေကို ပိတ်ပင်တယ်၊ ဘာသာရေးစာပေတွေကို “အစွန်းရောက်စာပေ” အဖြစ် သတ်မှတ်လိုက်တယ်။
ရုရှားအာဏာပိုင်တွေဟာ သက်သေခံတွေရဲ့ တရားဝင်အသင်းအဖွဲ့တွေကို တိုက်ခိုက်ရုံသာမက သက်သေခံတစ်ဦးချင်းစီကိုပါ ပစ်မှတ်ထားတိုက်ခိုက်လာတယ်။ အာဏာပိုင်တွေဟာ ဘောင်ကျော်ပြီး သက်သေခံတစ်ဦးစီရဲ့ ကိုယ်ပိုင်ဝတ်ပြုရေးကို ပိတ်ပင်ထားတဲ့အဖွဲ့အစည်းနဲ့ ဆက်စပ်ခဲ့တယ်။ သက်သေခံတွေရဲ့အိမ်ကို ဝင်ရောက်စီးနင်းချိန်မှာ သူတို့ကို ကိုယ်ထိလက်ရောက် စော်ကားတယ်၊ ပြင်းထန်တဲ့ စစ်ကြောမေးမြန်းမှုတွေ လုပ်တယ်။ သက်သေခံကျားမကြီးငယ်မရွေးကို ဖမ်းဆီးပြီး စွဲချက်တင် ထောင်ချတယ်၊ နေအိမ်အကျယ်ချုပ်ချတယ်။
၂၀၁၇ ခုနှစ်၊ ဧပြီလကစပြီး သက်သေခံရာနဲ့ချီကို အစွန်းရောက်သမားဆိုတဲ့ စွဲချက်နဲ့ အချုပ်ထောင်ထဲပို့တယ်၊ မတရားထောင်ချတယ်။ ၂၀၂၄ ခုနှစ်၊ ဧပြီ ၁၇ ရက်အထိဆိုရင် ယေဟောဝါသက်သေ ၁၂၃ ဦး ထောင်ကျနေတယ်။
ယေဟောဝါသက်သေတွေအပေါ် ရုရှားရဲ့အကြမ်းဖက်ဖိနှိပ်မှုကို ပြစ်တင်ဝေဖန်ကြ
မညှာမတာနှိပ်စက်မှုတွေကို ရပ်တန့်ဖို့ နိုင်ငံတကာက ရုရှားကို ပြောနေကြပေမဲ့ ရုရှားအာဏာပိုင်တွေက သက်သေခံတွေကို အစွန်းရောက်သမားတွေအဖြစ် ဆက်လက်စွပ်စွဲနေဆဲပါ။ ယေဟောဝါသက်သေတွေကို မညှာမတာနှိပ်စက်နေတဲ့ ရုရှားအစိုးရကို ရုရှားနိုင်ငံပြင်ပက လေ့လာရေးသမားတွေနဲ့ တရားရုံးတွေကလည်း ပြစ်တင်ရှုတ်ချကြတယ်။
လူ့အခွင့်အရေးဆိုင်ရာ ဥရောပတရားရုံး– ၂၀၂၂ ခုနှစ်၊ ဇွန် ၇ ရက်မှာ လူ့အခွင့်အရေးဆိုင်ရာ ဥရောပတရားရုံးက ယေဟောဝါသက်သေတွေကို နှိပ်စက်ညှဉ်းပန်းတဲ့ ရုရှားနိုင်ငံကို အရှုံးပေးစီရင်ချက်ချခဲ့တယ် (Taganrog LRO and Others v. Russia, nos. 32401/10 and 19 others)။ သမိုင်းတွင် စီရင်ချက်ပါပဲ။ ယေဟောဝါသက်သေတွေကို ပိတ်ပင်တဲ့ ရုရှားအစိုးရရဲ့ ၂၀၁၇ ခုနှစ်အမိန့်ဟာ ဥပဒေနဲ့မညီဘူးလို့ တရားရုံးက ကြေညာခဲ့တယ်။ “ယေဟောဝါသက်သေတွေအပေါ် စွဲဆိုထားတဲ့ ပြစ်မှုအားလုံးကို ရုပ်သိမ်းဖို့ လုပ်နိုင်တာမှန်သမျှ လုပ်ဆောင်ရမယ် . . . (ထောင်ကျနေတဲ့) ယေဟောဝါသက်သေတွေကို ပြန်လွှတ်ပေးရမယ်” လို့ ရုရှားအစိုးရကို တရားရုံးက အမိန့်ပေးခဲ့တယ်။ ဒါ့အပြင် သိမ်းယူထားတဲ့ ပိုင်ဆိုင်မှုအားလုံးကို ပြန်ပေးဖို့ ဒါမှမဟုတ် ယူအက်စ်ဒေါ်လာ သန်း ၆၀ ကျော် လျော်ကြေးပေးဖို့၊ လျှောက်ထားသူတွေကို ယူအက်စ်ဒေါ်လာ ၃ သန်းကျော် နစ်နာကြေးပေးဖို့ အမိန့်ထုတ်ခဲ့တယ်။
ဥရောပကောင်စီရဲ့ အထွေထွေ အတွင်းရေးမှူးဆီကစာ– မာရီယာ ပစီနိုဗစ် ဘူးရစ်က ၂၀၂၂ ခုနှစ်၊ ဒီဇင်ဘာ ၉ ရက် နေ့စွဲနဲ့ ရုရှားနိုင်ငံ၊ နိုင်ငံခြားရေးဝန်ကြီးဆီ ရေးတဲ့စာမှာ အခုလို ဖော်ပြခဲ့တယ်– “မော်စကို ယေဟောဝါသက်သေတွေနဲ့ အခြား နဲ့ ကရူကာနဲ့ အခြား အမှုမှာ အာဏာပိုင်တွေက လျှောက်ထားသူတွေရဲ့ ဘာသာရေးအဖွဲ့အစည်းကို ဖျက်သိမ်းပြီး ဘာသာရေးလုပ်ဆောင်မှုတွေကို ပိတ်ပင်ခဲ့တယ်၊ ငြိမ်းချမ်းစွာ ဆောင်ရွက်တဲ့ ဘာသာရေးအခမ်းအနားတွေကို ဖျက်သိမ်းတယ်၊ ဆက်လက်ပြီး လျှောက်ထားသူတချို့ရဲ့ လွတ်လပ်မှုကို ပိတ်ပင်တားဆီးတယ်။ ဒါကြောင့် ယေဟောဝါသက်သေအဖွဲ့အစည်းအားလုံးအပေါ် ချမှတ်ထားတဲ့ ပိတ်ပင်မှုကို ပြန်လည်ရုပ်သိမ်းဖို့၊ သူတို့အပေါ် ပြစ်မှုနဲ့ တရားစွဲတာအားလုံးကို ရပ်တန့်ဖို့ ကော်မတီက အာဏာပိုင်တွေကို အပြင်းအထန် တိုက်တွန်းပါတယ်။”
ဥရောပကောင်စီ ဝန်ကြီးများကော်မတီရဲ့ဆုံးဖြတ်ချက်– ၂၀၂၃ ခုနှစ်၊ စက်တင်ဘာလ အစည်းအဝေးမှာ ဝန်ကြီးများကော်မတီက အခုလိုပြောကြားခဲ့တယ်– “[လူ့အခွင့်အရေးဆိုင်ရာ ဥရောပတရားရုံးရဲ့] ဥရောပပဋိညာဉ်စာတမ်း အပိုဒ် ၄၆ အပေါ် အခြေခံထားတဲ့ သုံးသပ်ချက်တွေကိုရော၊ တော့ဂန်ရော့စ် ဘာသာရေးအသင်းအဖွဲ့များ နှင့်အခြား အမှုစီရင်ချက်မှာ ညွှန်ကြားထားတာတွေကိုပါ ရုရှားအာဏာပိုင်တွေက တမင်တကာ လျစ်လျူရှုနေတာ အင်မတန်စိုးရိမ်စရာကောင်းလှပါတယ်။ အထူးသဖြင့် . . . ထောင်ကျနေတဲ့ ယေဟောဝါသက်သေတွေကို လွှတ်ပေးရေးကိစ္စပါ။” ဒါကြောင့် “ဒီကိစ္စတွေကို ကုလသမဂ္ဂ လူ့အခွင့်အရေးကော်မတီ၊ ကုလသမဂ္ဂ လူ့အခွင့်အရေးကောင်စီရဲ့ ဥပဒေမဲ့ဖမ်းဆီးမှု စုံစမ်းရေးဆိုင်ရာ အလုပ်အမှုဆောင်အဖွဲ့၊ ယေဟောဝါသက်သေတွေကို ရုရှားအစိုးရ နှိပ်စက်ညှဉ်းပန်းတဲ့ကိစ္စနဲ့ပတ်သက်ပြီး လိုက်လံဆောင်ရွက်ပေးနေတဲ့ သက်ဆိုင်ရာနိုင်ငံတကာ အဖွဲ့အစည်းတွေဆီ တင်ပြသွားမှာဖြစ်တယ်။ ချမှတ်ထားတဲ့ စီရင်ချက်တွေအတိုင်း ရုရှားအစိုးရ လိုက်နာဆောင်ရွက်မှုရှိစေဖို့ ဒီလိုလုပ်ရခြင်းဖြစ်ပါတယ်။”
မကြာသေးခင်က ချမှတ်ခဲ့တဲ့ ပြင်းထန်တဲ့ တရားရုံးဆုံးဖြတ်ချက်တချို့
၂၀၂၄ ခုနှစ်၊ ဇန်နဝါရီ ၂၅ ရက်မှာ အသက် ၃၇ နှစ်အရွယ် အိမ်ထောင်သည် ညီအစ်မ ဆိုနာ အိုလိုပိုဗာဟာ အလုပ်ကြမ်းနဲ့ထောင်ဒဏ်နှစ်နှစ် ချမှတ်ခံရတယ်။ အဲဒီနှစ်နှစ်အတွင်း ဆမာရာဒေသက ထောင်ထဲမှာ နေရမှာပါ။
၂၀၁၈၊ ဇူလိုင် ၂၈ ရက်နေ့မှာ ရဲအရာရှိတွေက ညီအစ်မ ယေလီနာရဲ့ အသက် ၉၀ အရွယ် အဘွားနေတဲ့ တိုက်ခန်းကို ဝင်ရောက်စီးနင်းတယ်။ ဒီမီထရီနဲ့ ယေလီနာ ဘာမကင်တို့က အဘွားကို ပြုစုစောင့်ရှောက်ဖို့ အဲဒီကို ရောက်နေတာပါ။ နှစ်ယောက်စလုံးကို အဘွားအိမ်ကနေ ၁၀၉ မိုင်အကွာမှာရှိတဲ့ နေရင်းမြို့ဖြစ်တဲ့ ဗလာဒီဗော့စ်တော့မြို့ကို ခေါ်သွားပြီး ဒီမီထရီကို ဖမ်းဆီးလိုက်တယ်။ “အစွန်းရောက်အဖွဲ့အစည်းရဲ့ လုပ်ငန်းတွေကို စီစဉ်ကြီးကြပ်မှု” ဆိုတဲ့ပြစ်ချက်နဲ့ နောက်တစ်နှစ်မှာ ပြစ်မှုဖွင့်တယ်။ ၂၀၂၄ ခုနှစ်၊ ဖေဖော်ဝါရီ ၆ ရက်မှာ အယူခံတရားရုံးက ဒီမီထရီကို အပြစ်ရှိကြောင်း အတည်ပြုဆုံးဖြတ်တယ်။ ထောင်ဒဏ်ရှစ်နှစ်ချမှတ်ပြီး တရားခွင်ကနေ ချက်ချင်းဖမ်းခေါ်သွားတယ်။ ယေလီနာလည်း ယုံကြည်ချက်ကြောင့် တရားရင်ဆိုင်နေရတယ်။
ဆမာရာဒေသ၊ တတ်လီယတ်တီမြို့၊ စဲန်ထရယ်နီ ခရိုင်တရားရုံးက အသက် ၅၃ နှစ်အရွယ် အိမ်ထောင်သည်ညီအစ်ကို အလက်ဇန်းဒါး ချာဂန်ကို အပြစ်ရှိကြောင်း စီရင်ပြီး ထောင်ဒဏ်ရှစ်နှစ် ချမှတ်ခဲ့တယ်။ ရုရှားက ညီအစ်ကိုတွေ ချမှတ်ခံရတဲ့ အရှည်ကြာဆုံး ထောင်ဒဏ်ပါပဲ။ ၂၀၂၄ ခုနှစ်၊ ဖေဖော်ဝါရီ ၂၉ ရက်၊ အမှုကြားနာမှုအပြီးမှာ တရားခွင်ကနေ ဖမ်းဆီးခေါ်ဆောင်သွားတယ်။ လက်ရှိ ဆမာရာဒေသက အကျဉ်းထောင်အမှတ် ၄ မှာ ထောင်ကျနေပါတယ်။
ဆိုက်ဘေးရီးယား အရှေ့ပိုင်း၊ အီရကွတ်ဒေသတရားရုံးက ယေဟောဝါသက်သေညီအစ်ကို ကိုးယောက်ကို အစွန်းရောက်သူတွေအဖြစ် အပြစ်ရှိကြောင်း ဆုံးဖြတ်ခဲ့တယ်။ ၂၀၂၄ ခုနှစ်၊ မတ် ၅ ရက်မှာ ညီအစ်ကိုကိုးယောက်စလုံး ခုနစ်နှစ်အထိ ထောင်ဒဏ်အသီးသီး ချမှတ်ခံရတယ်။ အသက်အကြီးဆုံးညီအစ်ကိုဟာ ၇၂ နှစ်အရွယ်ပါ။ ၂၀၂၁ ခုနှစ်၊ အောက်တိုဘာလမှာ သူတို့အိမ်တွေကို ရဲအရာရှိတွေ ဝင်ရောက်ရှာဖွေပြီးတဲ့နောက် ပြစ်မှုနဲ့ တရားစွဲခံခဲ့ရတာဖြစ်တယ်။ ယာရိုဆလဗ် ကလင်ဆိုရင် စီရင်ချက်ချတဲ့အချိန်မှာ ထောင်ကျနေတာ နှစ်နှစ်ရှိနေပြီ။ “ကျွန်တော်တို့ကို အဆိုးဆုံးထောင်ခန်းတွေမှာ ထားတာ” လို့ သူ့ရဲ့ ခါးသီးတဲ့ ထောင်အတွေ့အကြုံအကြောင်း ပြောပြတယ်။
မတရားထောင်ချမှု ရပ်တန့်သွားစေဖို့ ဆက်လက်ကြိုးပမ်း
ကမ္ဘာတစ်ဝန်းက ယေဟောဝါသက်သေတွေဟာ ယုံကြည်သူချင်းတွေ ရုရှားနိုင်ငံက မညှာမတာ ဆက်ဆံခံနေတဲ့အကြောင်း ကြားရလို့ အတော်စိတ်မကောင်းကြဘူး။ ကမ္ဘာတစ်ဝန်းက သက်သေခံသန်းချီဟာ ထောင်ကျနေတဲ့ ယုံကြည်သူချင်းတွေအတွက် ရုရှားအစိုးရရုံးတွေဆီ စာရေးတောင်းဆိုကြတယ်။ ယေဟောဝါသက်သေတွေရဲ့ ရှေ့နေတွေက ရုရှားတရားရုံးအဆင့်ဆင့်မှာလည်း အယူခံဝင်ကြတယ်။ လူ့အခွင့်အရေးဆိုင်ရာ ဥရောပ တရားရုံးဆီကိုလည်း လျှောက်လွှာတွေ တင်ကြတယ်။ ကုလသမဂ္ဂ လူ့အခွင့်အရေး ကော်မတီ၊ မတရား ဖမ်းဆီးထိန်းသိမ်းခြင်းဆိုင်ရာ ကုလသမဂ္ဂ လုပ်ငန်းအဖွဲ့ (WGAD) ဆီ တိုင်ကြားစာ တင်တယ်။ လူ့အခွင့်အရေးချိုးဖောက်မှုတွေကို စောင့်ကြည့်နေတဲ့ နိုင်ငံတကာအဖွဲ့အစည်းတွေဆီကိုလည်း တရားဝင်မှတ်တမ်းတွေ ပေးပို့ကြတယ်။ ယေဟောဝါသက်သေတွေဟာ ရုရှားက ယုံကြည်သူချင်းတွေရဲ့ ဒုက္ခကို အများသူငှာ မြင်သာစေဖို့၊ ဆိုးရွားလွန်းတဲ့ ဘာသာရေးနှိပ်ကွပ်မှုတွေကို ရပ်တန့်သွားစေဖို့ အဲဒီလိုနည်းတွေနဲ့ ဆက်လက်ကြိုးပမ်းနေမှာဖြစ်တယ်။
အချိန်ပြဇယား
ဧပြီ ၁၇၊ ၂၀၂၄
ယေဟောဝါသက်သေ ၁၂၃ ယောက် ထောင်ကျနေပါတယ်။
အောက်တိုဘာ ၂၄၊ ၂၀၂၃
အီလစ်တာနဲ့ အဘင့်စ်မြို့က ဒေသခံဘာသာရေးအဖွဲ့အစည်းတွေနဲ့ပတ်သက်ပြီး ကုလသမဂ္ဂ လူ့အခွင့်အရေးဆိုင်ရာ ကော်မတီ (CCPR) က စာတမ်းနှစ်ခု ထုတ်ပြန်ခဲ့တယ်။ နိုင်ငံတကာ နိုင်ငံသားနှင့်နိုင်ငံရေးဆိုင်ရာအခွင့်အရေး သဘောတူစာချုပ်၊ အပိုဒ် ၁၈.၁ (“လွတ်လပ်စွာ စဉ်းစားတွေးခေါ်ခွင့်၊ လွတ်လပ်စွာခံယူခွင့်၊ ဘာသာရေးလွတ်လပ်ခွင့်”) နဲ့ အပိုဒ် ၂၂.၁ (လွတ်လပ်စွာ စုဆုံပေါင်းသင်းခွင့်) အရ ယေဟောဝါသက်သေတွေရရှိထားတဲ့ အခွင့်အရေးကို ရုရှားအစိုးရ ချိုးဖောက်ကြောင်း CCPR သုံးသပ်ဆုံးဖြတ်ခဲ့တယ်။ ယေဟောဝါသက်သေတွေရဲ့ ဘာသာရေးစာပေတွေဟာ မုန်းတီးမှု၊ အကြမ်းဖက်မှုကို အားပေးအားမြှောက်ခြင်းမရှိကြောင်းလည်း အတည်ပြုဆုံးဖြတ်ခဲ့တယ်။
ဇွန် ၇၊ ၂၀၂၂
‘တော့ဂန်ရော့စ် ဘာသာရေးအသင်းအဖွဲ့များ နှင့်အခြား’ နှင့် ‘ရုရှား’ အမှုမှာ ယေဟောဝါသက်သေတွေကို နှိပ်စက်ညှဉ်းပန်းတဲ့ ရုရှားကို လူ့အခွင့်အရေးဆိုင်ရာ ဥရောပတရားရုံးက အရှုံးပေးစီရင်ခဲ့တယ်။
ဇန်နဝါရီ ၁၂၊ ၂၀၂၂
ရုရှားဖယ်ဒရေးရှင်း တရားရေး ဝန်ကြီးဌာနက JW Library app ကို အစွန်းရောက် ပစ္စည်းစာရင်းမှာ ထည့်သွင်းလိုက်တယ်။ ရုရှားမှာ အစွန်းရောက် app အဖြစ် သတ်မှတ်ခံရပြီး ပိတ်ပင်ခံရတဲ့ ပထမဦးဆုံး၊ တစ်ခုတည်းသော app ဖြစ်ပါတယ်။
စက်တင်ဘာ ၂၇၊ ၂၀၂၁
JW Library app ကို အစွန်းရောက်အဖြစ် ကြေညာပြီး ရုရှားနဲ့ ခရိုင်းမီးယားမှာ အသုံးပြုခွင့် ပိတ်ပင်တဲ့ ၂၀၂၁၊ မတ် ၃၁ စီရင်ချက်အတွက် အယူခံဝင်တာကို စိန့်ပီတာစဘတ်မြို့ တရားရုံးက ပယ်ချလိုက်တယ်။ တရားရုံးရဲ့ မူလ ဆုံးဖြတ်ချက် ချက်ချင်း အကျိုးသက်ရောက်တယ်။
ဧပြီ ၂၆၊ ၂၀၁၉
ဒီမီထရီ မီခေးလော့ဗ်ရဲ့ လူ့အခွင့်အရေး ချိုးဖောက်ခံနေရကြောင်း မတရား ဖမ်းဆီးထိန်းသိမ်းခြင်းဆိုင်ရာ ကုလသမဂ္ဂ လုပ်ငန်းအဖွဲ့ တွေ့ရှိခဲ့ပြီး ယေဟောဝါသက်သေတွေကို ရုရှား ညှဉ်းပန်းနှိပ်စက်နေမှုကို ပြစ်တင်ရှုတ်ချလိုက်တယ်။
ဧပြီ ၂၀၊ ၂၀၁၇
ရုရှား ဖယ်ဒရေးရှင်း နိုင်ငံတော် တရားရုံးချုပ်က ယေဟောဝါသက်သေများရဲ့ ရုံးနဲ့ ဒေသခံ ဘာသာရေး အဖွဲ့အစည်း ၃၉၅ ခုကို ဖျက်သိမ်းဖို့ အမိန့်ချလိုက်တယ်။
ကြိုက်လို ကြိုက်ငြား အကြောင်းအရာများ
သတင်းထုတ်ပြန်ချက်
နှိပ်စက်ညှဉ်းပန်းခြင်းကို ကြောက်စရာမလို
၂၀၁၉၊ နှစ်ပတ်လည်အစည်းအဝေးမှာ အုပ်ချုပ်ရေးအဖွဲ့ဝင် ညီအစ်ကို မာ့ခ် ဆန်ဒါစန်က “ဘာကြောက်စရာရှိလို့လဲ” ဆိုတဲ့ ဟောပြောချက်ကို ဟောသွားပါတယ်။ ဟောပြောချက်ထဲက ဒီဗီဒီယိုအတိုလေးမှာ နှိပ်စက်ညှဉ်းပန်းခံရတဲ့ ရုရှား ညီအစ်ကို/မတွေရဲ့ တွေ့ကြုံမှုတွေ ပါတယ်။
သတင်းထုတ်ပြန်ချက်
ရုရှားနိုင်ငံ၊ ဆူဂတ်မြို့မှာ ယေဟောဝါသက်သေတွေကို နှိပ်စက်ညှဉ်းပန်း
သတင်းထုတ်ပြန်ချက်
ရုရှားနိုင်ငံမှာ ဖမ်းဆီးထိန်းသိမ်းမှုတွေ ဆက်တိုက်ကြုံနေရ
သတင်းထုတ်ပြန်ချက်
ရုရှားမှာရှိတဲ့ ယေဟောဝါသက်သေတွေကို အကြမ်းဖက်ကင်ပိန်း စတင်
အခု ရုရှားအာဏာပိုင်တွေဟာ ယေဟောဝါသက်သေများရဲ့ အသင်းအဖွဲ့တွေကို ပိတ်ပင်ရာကနေ ယေဟောဝါသက်သေတွေနဲ့ ဝတ်ပြုရေးကို ဦးတည်တိုက်ခိုက်လာပြီ။