‘ယေဟောဝါသည် သူတို့၌ မျက်နှာတော်အလင်းကို လွှတ်တော်မူသည်’

လူ့မျက်နှာတွင် ကြွက်သား ၃၀ ကျော်ရှိသည်။ သင် ပြုံးရုံပြုံးလိုက်သည်နှင့် ကြွက်သား ၁၄ ခုတစ်ပြိုင်တည်းလုပ်ဆောင်ဖို့လိုသည်။ ယင်းကြွက်သားများမရှိပါက သင်စကားပြောဆိုရာတွင် မည်သို့ဖြစ်မည်ကို မြင်ယောင်ကြည့်ပါ။ နှစ်သက်ဖွယ်ဖြစ်မည်လော။ ဝေးလေစွ။ သို့သော် နားမကြားသူတို့အတွက် မျက်နှာကြွက်သားများသည် အသက်ပါသောစကားပြောဆိုမှုထက်မက များစွာလုပ်ဆောင်သည်။ ယင်းကြွက်သားများကို ကိုယ်လက်အမူအရာနှင့်ပေါင်းစပ်လိုက်သောအခါ အတွေးအခေါ်များနှင့် အယူအဆများကိုဖော်ပြသည့် ထူးခြားသောအဓိပ္ပာယ်များဖြစ်လာသည်။ လက်ဟန်ပြစကားသည် အဓိပ္ပာယ်အသေးစိတ်အပါအဝင် ရှုပ်ထွေးသောအတွေးအခေါ်များကိုပင် ဖော်ပြနိုင်စွမ်းရှိပုံကို လူအများ အံ့သြခဲ့ကြသည်။

မကြာသေးမီက ကမ္ဘာတစ်ဝန်းရှိနားမကြားသူတို့သည် ထူးခြားသည့်ဂုဏ်ရည်ဖော်ပြရာ မျက်နှာပုံပန်းနှင့် အရောင်အသွေးတွင် အဘယ်လူ့မျက်နှာထက်မဆို သာလွန်သောမျက်နှာတစ်ခုကို မြင်တွေ့ကြသည်။ ပုံဆောင်သဘောအရပြောရလျှင် သူတို့သည် ‘ယေဟောဝါ၏မျက်နှာတော်’ ကိုမြင်တွေ့လာကြသည်။ (မြည်. ၂:၁၉) ယင်းသည် တိုက်ဆိုင်မှုကြောင့်မဟုတ်ပါ။ ယေဟောဝါသည် နားမကြားသူတို့အပေါ် ကြီးမားသောမေတ္တာကို ကြာမြင့်စွာကတင်ပြတော်မူခဲ့သည်။ ကိုယ်တော်သည် ရှေးဣသရေလလူမျိုးအချိန်ကတည်းကပင် ယင်းသို့တင်ပြခဲ့ခြင်းဖြစ်၏။ (ဝတ်. ၁၉:၁၄) မျက်မှောက်ခေတ်တွင် နားမကြားသူတို့ကိုချစ်သော ကိုယ်တော်၏မေတ္တာကို အထင်အရှားမြင်တွေ့နေရသည်။ “ဘုရားသခင်၏အလိုတော်မှာ လူအမျိုးမျိုးတို့သည် ကယ်တင်ခံရ၍ အမှန်တရားဆိုင်ရာ တိကျမှန်ကန်သောအသိပညာကို သိရှိလာရန်ဖြစ်၏။” (၁ တိ. ၂:၄) ဘုရားသခင်နှင့်ပတ်သက်သော တိကျမှန်ကန်သည့်အသိပညာရရှိခြင်းအားဖြင့် နားမကြားသူများစွာသည် ကိုယ်တော်၏မျက်နှာတော်ကို တကယ်ပင် မြင်တွေ့လာကြသည်။ နားမကြားသူတို့သည် မကြားနိုင်သော်လည်း ယင်းသို့ မည်သို့ဖြစ်နိုင်သနည်း။ ယင်းမေးခွန်းကို မဖြေဆိုမီ လက်ဟန်ပြဘာသာစကားသည် နားမကြားသူတို့အတွက် အဘယ်ကြောင့် အရေးကြီးကြောင်း ဦးစွာသုံးသပ်ကြည့်ကြစို့။

မြင်နေရခြင်းသည် ကြားနေရခြင်းဖြစ်

နားမကြားသူတို့နှင့်  လက်ဟန်ပြဘာသာစကားအပေါ် နားလည်မှုလွဲခြင်းများစွာရှိသည်။ ယင်းတို့ထဲမှအချို့ကို နားလည်အောင်ကူညီပေးပါမည်။ နားမကြားသူတို့သည် မော်တော်ကားများ မောင်းနိုင်သည်။ နှုတ်ခမ်းလှုပ်ပုံကိုကြည့်ပြီး အဓိပ္ပာယ်ဖော်ခြင်းသည် သူတို့အတွက် အလွန်ခက်ခဲ၏။ လက်ဟန်ပြဘာသာစကားသည် မျက်မမြင်စာနှင့် တခြားစီပင်ဖြစ်သည်၊ ယင်းသည် ပြောလိုရာကို ကိုယ်ဟန်အမူအရာဖြင့်ဖော်ပြခြင်းမျှသာမဟုတ်။ ကမ္ဘာသုံးလက်ဟန်ပြဘာသာစကားတစ်ခုဟူ၍ မရှိပါ။ ထို့ပြင် နားမကြားသူတို့တွင် ဒေသအလိုက်လက်ဟန်ပြသင်္ကေတများရှိကြသည်။

နားမကြားသူတို့သည် စာဖတ်နိုင်သလော။ အချို့တို့သည် ကောင်းစွာဖတ်နိုင်သော်လည်း နားမကြားသူအများစုသည် စာဖတ်ခြင်းတွင် အခက်အခဲရှိကြသည်မှာ အမှန်ပင်ဖြစ်၏။ အဘယ်ကြောင့်နည်း။ အကြောင်းမှာ ပုံနှိပ်စကားလုံးသည် နေ့စဉ်သုံးဘာသာစကားမှ ပေါ်ပေါက်လာသောကြောင့်ဖြစ်၏။ ကြားနိုင်စွမ်းရှိသောကလေးတစ်ဦးသည် ဘာသာစကား မည်သို့သင်ယူသည်ကို သုံးသပ်ကြည့်ပါ။ ကလေးသည် မွေးဖွားချိန်မှစ၍ သူ့ဝန်းကျင်တွင် ဒေသခံဘာသာစကားပြောသူများရှိနေသည်။ မကြာမီတွင် သူသည် စကားလုံးများကို တွဲတတ်၊ ဝါကျများဖွဲ့တတ်လာသည်။ ယင်းသည် နေ့စဉ်သုံးဘာသာစကားကြားရုံနှင့် အလိုအလျောက်တတ်လာခြင်းဖြစ်၏။ ထို့ကြောင့် ကြားနိုင်စွမ်းရှိသောကလေးများ စာစဖတ်လာသောအခါ ယင်းသည် သူတို့သိရှိထားပြီးဖြစ်သောစကားသံနှင့် စကားလုံးများကိုယ်စားပြုသည့် စာမျက်နှာပေါ်က အမှတ်အသားမည်းများကို သင်ယူခြင်းဖြစ်သည်။

သင်သည် တိုင်းတစ်ပါးတွင် မှန်ဖြင့်ပြုလုပ်ထားသောအသံလုံအခန်းတစ်ခန်း၌ ရောက်ရှိနေသည်ဟု မြင်ယောင်ကြည့်ပါ။ သင်သည် ဒေသခံနေ့စဉ်သုံးဘာသာစကားကို တစ်ခါမျှမကြားခဲ့ဖူးပါ။ ဒေသခံလူတို့သည် နေ့တိုင်း သင့်ထံလာပြီး မှန်တစ်ဖက်မှ ကြိုးစားစကားပြောကြသည်။ သူတို့ပြောနေသည့်အရာကို သင်မကြားနိုင်။ သူတို့၏ နှုတ်ခမ်းများ လှုပ်နေသည်ကိုသာ သင်မြင်ရသည်။ သူတို့ပြောသည်ကို သင်နားမလည်ကြောင်း သူတို့သိရှိသည့်အခါ သူတို့သည် စာရွက်ပေါ်တွင်ရေးကာ ယင်းတို့ကို မှန်တစ်ဖက်မှ သင့်အား ပြကြသည်။ ယင်းကို သင်နားလည်နိုင်ရမည်ဟု သူတို့ယူဆကြသည်။ သင် မည်မျှနားလည်မည်ထင်သနည်း။ ဤအခြေအနေတွင် ပြောဆိုဆက်သွယ်ခြင်းသည် လုံးဝနီးပါးမဖြစ်နိုင်သည်ကို တွေ့ရလိမ့်မည်။ အဘယ်ကြောင့်နည်း။ ရေးသားထားရာများသည် သင်တစ်ခါမျှမကြားဖူးသည့်ဘာသာစကားကို ကိုယ်စားပြုသောကြောင့်ဖြစ်၏။ ယင်းသည် နားမကြားသူအများစု ရင်ဆိုင်ကြုံတွေ့ရသည့် အခြေအနေအတိအကျပင်ဖြစ်သည်။

လက်ဟန်ပြဘာသာစကားသည် နားမကြားသူတို့အတွက် ကောင်းမွန်လှသောဆက်သွယ်နည်းဖြစ်၏။ လူတစ်ဦးသည် စိတ်ကူးစိတ်သန်းများကိုပုံဖော်ရန် လက်ဟန်ပြသည်။ သူ၏မျက်နှာအနေအထားနှင့်အတူ သူ၏လက်ဟန်ပြရာများသည် လက်ဟန်ပြဘာသာစကား၏သဒ္ဒါနည်းစနစ်များနှင့်အညီ ဖြစ်သည်။ ဤနည်းဖြင့် မျက်စိကို သတင်းအချက်အလက်ဖော်ပြနိုင်သည့် မျက်မြင်ဘာသာစကား ပေါ်ထွက်လာသည်။

အမှန်တွင် နားမကြားသူတစ်ဦးလက်ဟန်ပြနေစဉ် သူ့လက်၊ ကိုယ်ခန္ဓာနှင့် မျက်နှာ၏လှုပ်ရှားမှုအားလုံးနီးပါး အဓိပ္ပာယ်ရှိသည်။ မျက်နှာအနေအထားများသည် ဟန်ပန်အမူအရာမျှသာ မဟုတ်ပါ။ ယင်းတို့သည် လက်ဟန်ပြဘာသာစကား၏ အရေးပါသောသဒ္ဒါအစိတ်အပိုင်းဖြစ်သည်။ ဥပမာပြရသော်– မျက်ခုံးမြှင့်ခြင်းဖြင့်မေးခွန်းတစ်ခုမေးခြင်းသည် အဖြေမတောင်းသောမေးခွန်းတစ်ခုကို ဖော်ပြခြင်းဖြစ်နိုင်သကဲ့သို့ ဟုတ်ကဲ့၊ မဟုတ်ဘူးအဖြေကို နှိုက်ယူခြင်းလည်းဖြစ်နိုင်သည်။ မျက်ခုံးများကို လျှော့ထားပါက ဘယ်သူလဲ၊ ဘာလဲ၊ ဘယ်မှာလဲ၊ ဘယ်အချိန်မှာလဲ၊ ဘာကြောင့်လဲ သို့မဟုတ် ဘယ်လိုလဲ မေးခွန်းကို ဖော်ပြခြင်းဖြစ်နိုင်သည်။ ပါးစပ်လှုပ်ရှားမှုအချို့သည် အရာဝတ္ထု၏အရွယ်အစား သို့မဟုတ် လုပ်ရပ်၏ပြင်းထန်မှုကို ဖော်ပြခြင်းဖြစ်ပေမည်။ နားမကြားသူတစ်ဦး၏ခေါင်းလှုပ်ရှားပုံ၊ ပခုံးမြှင့်ပုံ၊ ပါးလှုပ်ပုံနှင့် မျက်တောင်ခတ်ပုံတို့က ပြောနေသည့်အကြောင်းအပေါ် မသိမသာကွဲပြားသည့် အဓိပ္ပာယ်အသေးစိတ်ကို ထပ်ဆင့်ပေးသည်။

ယင်းသို့သောလှုပ်ရှားမှုများက ရှုမြင်သူအား အလွန်နှစ်သက်ဖွယ်သောနည်းဖြင့်  သတင်းအချက်အလက်ကိုနားလည်ရန် အထောက်အကူပြုသည်။ အသွင်မျိုးစုံသောဤပြောဆိုဆက်သွယ်နည်းကိုအသုံးပြုကာ လက်ဟန်ပြဘာသာစကားကိုကောင်းစွာသိသော နားမကြားသူတို့အား ကဗျာလင်္ကာမှသည် နည်းပညာ၊ အချစ်ရေးရာမှသည် ဟာသရေးရာ၊ မြင်နိုင်ရာများမှသည် မမြင်နိုင်ရာများအဆုံး မည်သည့်အယူအဆကိုမဆို ကောင်းစွာဖော်ပြနိုင်သည်။

လက်ဟန်ပြဘာသာစကားထုတ်ဝေမှုများက ထူးခြားမှုဖြစ်စေ

ယေဟောဝါနှင့်ဆိုင်သောအသိပညာကို လက်ဟန်ပြဘာသာစကားဖြင့် ထင်ရှားမြင်သာအောင်ဖော်ပြသောအခါ နားမကြားသူတစ်ဦးသည် သတင်းစကားကို တကယ်ပင်ကြားနိုင်ပြီး ယင်းသတင်းစကား၏မူလအရှင်ကို “ယုံကြည်” လာသည်။ ထို့ကြောင့် ယေဟောဝါသက်သေများသည် ကမ္ဘာတစ်ဝန်းရှိ နားမကြားသူတို့ကို ဟောပြောရန်နှင့် သူတို့အတွက် အကျိုးရှိသည့်အကြောင်းအရာကို ထုတ်ဝေရန် ဇွဲလုံ့လထုတ်ကြိုးစားခဲ့ကြသည်။ (ရော. ၁၀:၁၄) ယခုအခါ ကမ္ဘာတစ်ဝန်း၌ လက်ဟန်ပြဘာသာစကားဘာသာပြန်အဖွဲ့ ၅၈ ခုရှိပြီး လက်ဟန်ပြဘာသာစကား ဒီဗီဒီထုတ်ဝေမှုများကို လက်ဟန်ပြဘာသာစကား ၄၀ ဘာသာဖြင့် ယခုရရှိနိုင်သည်။ ယင်းလုပ်ဆောင်မှုအားလုံးသည် လုပ်ရကျိုးနပ်ခဲ့သလော။

ဂျယ်ရမီ၏မိဘသည် နားမကြားသူတို့ဖြစ်၏၊ သူဤသို့ပြောသည်– “ကျွန်တော့်အဖေဟာ သူ့အိပ်ခန်းထဲမှာ ကင်းမျှော်စင်ပါဆောင်းပါးထဲက စာပိုဒ်အနည်းငယ်ကို နာရီအတော်ကြာ ထက်ထက်သန်သန်လေ့လာပြီး နားလည်အောင်ကြိုးစားနေတာကို ကျွန်တော်မှတ်မိသေးတယ်။ သူ အခန်းထဲကနေ ရုတ်တရက်ထွက်လာပြီး စိတ်လှုပ်ရှားစွာ လက်ဟန်နဲ့ဒီလိုပြောတယ်– ‘အဓိပ္ပာယ်ကို ငါနားလည်ပြီ! ငါနားလည်ပြီ!’ ပြီးတော့ ဆောင်းပါးရဲ့အဓိပ္ပာယ်ကို ကျွန်တော့် ကို ရှင်းပြခဲ့တယ်။ အဲဒီတုန်းက ကျွန်တော် ၁၂ နှစ်ပဲရှိသေးတယ်။ ကျွန်တော် စာပိုဒ်ကိုမြန်မြန်ဖတ်ပြီး လက်ဟန်နဲ့ဒီလိုပြောလိုက်တယ်– ‘အဖေ၊ အဓိပ္ပာယ်က အဲလိုမဟုတ်ဘူးထင်တယ်။ အဲဒါက . . .။’ ဆက်မပြောဖို့ ကျွန်တော့်ကို လက်ဟန်ပြပြီး ရေးထားတဲ့စာသားအဓိပ္ပာယ်ကို နားလည်အောင်လုပ်ဖို့ သူ့အခန်းထဲ ပြန်သွားခဲ့တယ်။ အိပ်ခန်းထဲ သူပြန်လျှောက်သွားတာကို ကျွန်တော်ကြည့်နေစဉ် စိတ်ပျက်လက်ပျက်ဖြစ်သွားတဲ့ အဖေရဲ့မျက်နှာရယ်၊ အဖေ့အပေါ် ကျွန်တော်လေးစားသွားတာကိုရယ် ဘယ်တော့မှ မေ့မှာမဟုတ်ဘူး။ ဒါပေမဲ့ အခုတော့ လက်ဟန်ပြဘာသာစကားနဲ့ ဒီဗီဒီထုတ်ဝေမှုတွေကြောင့် အကြောင်းအရာတွေကို ပိုပြီးနားလည်နိုင်ခဲ့တယ်။ ယေဟောဝါနဲ့ပတ်သက်တဲ့ သူ့ခံစားချက်ကိုဖော်ပြတဲ့အခါ သူပျော်ရွှင်နေတာကို မြင်တွေ့ရလို့ ကျွန်တော်အရေးမထားဘဲမနေနိုင်ခဲ့ဘူး။”

ချီလီနိုင်ငံရှိ နားမကြားသောအမျိုးသမီးငယ် ဟီစဲန်ယာနှင့်စကားပြောခဲ့သော သက်သေခံဇနီးမောင်နှံ၏တွေ့ကြုံမှုကိုလည်း သုံးသပ်ကြည့်ပါ။ ချီလီလက်ဟန်ပြဘာသာစကားဖြင့် ကျွန်ုပ်၏ကျမ်းစာပုံပြင်စာအုပ်—ဒီဗီဒီကို ဟီစဲန်ယာအားပြရန် သူ့မိခင်၏ခွင့်ပြုချက်ရပြီးနောက် သူတို့ဤသို့ပြန်ပြောပြသည်– “သူစကြည့်တဲ့အခါ ရယ်မောနေတယ်၊ ပြီးတော့ ငိုတယ်။ ဘာကြောင့်ငိုတာလဲလို့ သူ့အမေကမေးတော့ သူကြည့်နေတဲ့အရာကို နှစ်သက်လို့ဆိုပြီး ပြန်ပြောခဲ့တယ်။ ဒီဗီဒီမှာပြတဲ့အရာအားလုံးကို သူနားလည်နိုင်တယ်ဆိုတာကို သူ့အမေသဘောပေါက်တော့တယ်။”

ဗင်နီဇွဲလားနိုင်ငံရှိ ကျေးလက်ဒေသတစ်ခုတွင်နေထိုင်သော နားမကြားသည့်အမျိုးသမီးတစ်ဦးတွင် ကလေးတစ်ဦးရှိပြီး သူ့တွင် ကိုယ်ဝန်ရှိနေသည်။ သူနှင့်သူ့ခင်ပွန်းတို့သည် စီးပွားရေးအခြေအနေကြောင့် နောက်ကလေးတစ်ဦးကို ကျွေးနိုင်မည်မဟုတ်ဟု သူတို့ခံစားခဲ့ရသည်၊ ထို့ကြောင့် ကိုယ်ဝန်ဖျက်ချဖို့ သူတို့စဉ်းစားနေသည်။ ယင်းအခြေအနေကိုမသိသော ယေဟောဝါသက်သေများသည် သူတို့ထံလည်ပတ်ခဲ့ပြီး ဗင်နီဇွဲလားလက်ဟန်ပြဘာသာစကားဖြင့် ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်း ဗီဒီယိုခွေ၏အခန်း ၁၂ ကိုသူတို့အား ပြသခဲ့သည်။ ယင်းအခန်းတွင် ကိုယ်ဝန်ဖျက်ချခြင်း၊ လူ့အသက်သတ်ခြင်းနှင့်ပတ်သက်သော ဘုရားသခင့်အမြင်ကို ရှင်းပြထားသည်။ နောက်ပိုင်းတွင် အမျိုးသမီးသည် ယင်းသင်ခန်းစာကို လေ့လာခဲ့ရသည့်အတွက် အလွန်ကျေးဇူးတင်ကြောင်း သက်သေခံများကိုပြောခဲ့သည်။ ယင်းကြောင့် ကိုယ်ဝန်မဖျက်ချဖို့ သူတို့ဆုံးဖြတ်ခဲ့ကြောင်း သူပြောခဲ့သည်။ လက်ဟန်ပြဘာသာစကားဒီဗီဒီထုတ်ဝေမှု အကူအညီကြောင့် မမွေးသေးသည့်ကလေး အသက်ရှင်ခဲ့သည်။

နားမကြားသောသက်သေခံတစ်ဦးဖြစ်သူ လော်ရဲန် ဤသို့ရှင်းပြသည်– “ကျမ်းစာလေ့လာတာဟာ ဉာဏ်စမ်းရုပ်ဆက်ပုံကြီးတစ်ခု ချထားတာနဲ့တူတယ်။ ရုပ်ပုံတစ်ခုလုံးနဲ့ပတ်သက်တဲ့ ကျွန်မရဲ့နားလည်မှုမှာ ပျောက်နေတဲ့အပိုင်းအစတွေဖြစ်တဲ့ ဖြည့်ဖို့လိုတဲ့နေရာတွေရှိတယ်။ ဒါပေမဲ့ သမ္မာကျမ်းစာအမှန်တရားတွေကို လက်ဟန်ပြဘာသာစကားနဲ့ရရှိတဲ့အခါ လိုနေတဲ့နေရာတွေ ပြည့်သွားပြီ။” နားမကြားသူဖြစ်ပြီး သက်သေခံဖြစ်သည်မှာ ၃၈ နှစ်ရှိပြီဖြစ်သော ဂျော့ဂ်ျ ဤသို့ပြောသည်– “အကြောင်းအရာတစ်ခုကို နားလည်နိုင်ပြီဆိုရင် အဲဒါက ကိုယ့်ကိုယ်ကိုလေးစားမှုနဲ့ ယုံကြည်စိတ်ချမှုအတော်အတန်ရှိစေတယ်ဆိုတာ သံသယရှိစရာမလိုပါဘူး။ ကျွန်တော့်ရဲ့ဝိညာဉ်ရေးတိုးတက်မှုနဲ့ပတ်သက်ရင် လက်ဟန်ပြဘာသာစကားဒီဗီဒီတွေက အများဆုံးအကျိုးပြုခဲ့တယ်လို့ ခံစားရတယ်။”

“ကျွန်တော့်ဘာသာစကားနဲ့ကျင်းပတဲ့ အစည်းအဝေးကြောင့်ပါပဲ”

ယေဟောဝါသက်သေများသည် လက်ဟန်ပြဘာသာစကားထုတ်ဝေမှုများအပြင် အစည်းအဝေးတစ်ခုလုံးကို လက်ဟန်ပြဘာသာစကားဖြင့်ကျင်းပသည့် အသင်းတော်များကိုပါ ဖွဲ့စည်းခဲ့ကြသည်။ ယခုအချိန်တွင် ကမ္ဘာတစ်ဝန်း လက်ဟန်ပြဘာသာစကားပြောအသင်းတော်ပေါင်း ၁,၁၀၀ ကျော်ရှိသည်။ နားမကြားသောပရိသတ်သည် မိမိတို့၏ဘာသာစကားဖြင့်ကြားနာခဲ့ကြသည်၊ ကျမ်းစာအမှန်တရားများကို နားမကြားသူတစ်ဦးစဉ်းစားသည့်နည်းဖြစ်သော သူ့ဘာသာစကားဖြင့်တင်ဆက်ခဲ့ကြသည်။ ယင်းတင်ဆက်မှုများကို သူ့ယဉ်ကျေးမှုနှင့်  ဘဝအတွေ့အကြုံကို လေးစားကြောင်းတင်ပြသည့်နည်းဖြင့် ဖော်ပြခဲ့ကြသည်။

လက်ဟန်ပြဘာသာစကားအသင်းတော်များ ဖွဲ့စည်းထားခြင်းသည် အကျိုးရှိခဲ့ပါသလော။ ၁၉၅၅ ခုနှစ်တွင် ယေဟောဝါသက်သေတစ်ဦးအဖြစ် နှစ်ခြင်းခံခဲ့သူ စိရယ်လ်၏တွေ့ကြုံမှုကို သုံးသပ်ကြည့်ပါ။ သူသည် ရေးသားထားသည့်စာပေများကို နှစ်များစွာ အတတ်နိုင်ဆုံးလေ့လာခဲ့ပြီး အစည်းအဝေးများကို မှန်မှန်တက်ရောက်ခဲ့သည်။ တစ်ခါတစ်ရံ လက်ဟန်ပြဘာသာစကားဖြင့် စကားပြန်များရှိပြီး တစ်ခါတစ်ရံ မရှိပါ။ မရှိသည့်အခါ သူသည် ဟောပြောစင်ပေါ်မှပြောသည့်အရာများကို သူ့အတွက် မှတ်စုရေးပေးခြင်းဖြင့် သူ့ကို ကြိုးစားကူညီပေးကြသည့်သက်သေခံများကို မှီခိုခဲ့ရသည်။ သက်သေခံဖြစ်သည်မှာ ၃၄ နှစ်ခန့်ဖြစ်သည့် ၁၉၈၉ ခုနှစ်ရောက်မှသာ အမေရိကန်ပြည်ထောင်စုရှိ ပထမဆုံးလက်ဟန်ပြဘာသာစကားအသင်းတော်ကို နယူးယောက်မြို့တွင် တည်ထောင်ခဲ့သည်။ ယင်းအသင်းတော်သားတစ်ဦးအနေနှင့် စိရယ်လ်မည်သို့ခံစားခဲ့ရသနည်း။ “တောနက်ထဲကနေထွက်လာတာနဲ့တူတယ်၊ မှောင်မည်းနေတဲ့ဥမင်လိုဏ်ခေါင်းကနေ အလင်းရောင်ထဲထွက်လာတာနဲ့တူတယ်။ ကျွန်တော့်ဘာသာစကားနဲ့ကျင်းပတဲ့ အစည်းအဝေးကြောင့်ပါပဲ။”

ယေဟောဝါသက်သေများ၏ လက်ဟန်ပြဘာသာစကားအသင်းတော်များသည် နားမကြားသူတို့ ဘုရားသခင်အကြောင်း သင်ယူရန်နှင့် ကိုယ်တော်အား ဝတ်ပြုကိုးကွယ်ရန် ပုံမှန်စုရုံးရောက်ရှိလာနိုင်သည့်နေရာများဖြစ်သည်။ ဘုရားသခင့်လူမျိုးများ ကူးလူးဆက်ဆံနိုင်သည့်၊ အားပေးမှုရရှိနိုင်သည့်နေရာများဖြစ်သည်။ ဘာသာစကားအရနှင့် လူမှုဆက်ဆံရေးအရ နားမကြားသူတို့ကို သီးခြားဖြစ်သွားစေနိုင်သည့်လောကအလယ်တွင် ယင်းအသင်းတော်များသည် ပြောဆိုဆက်သွယ်မှုနှင့် ပေါင်းသင်းမှုပြုလုပ်ရာနေရာများဖြစ်ပေသည်။ ယင်းသို့သောဝန်းကျင်တွင် နားမကြားသူတို့သည် သင်ယူ၊ တိုးတက်နိုင်ပြီး ယေဟောဝါ၏လုပ်ငန်းတော်တွင် တက်လှမ်းနိုင်ကြသည်။ နားမကြားသောသက်သေခံများစွာသည် အချိန်ပြည့်သတင်းကောင်းဟောပြောသူများအဖြစ်ပင် အမှုဆောင်နိုင်ခဲ့ကြသည်။ အချို့ဆိုလျှင် နားမကြားသူများ ယေဟောဝါအကြောင်း သင်ယူနိုင်ရန် အကူအညီပေးဖို့ တိုင်းတစ်ပါးသို့ ပြောင်းရွှေ့ခဲ့ကြသည်။ နားမကြားသော ခရစ်ယာန်အမျိုးသားများသည် ထိရောက်သောသွန်သင်သူများ၊ စီစဉ်သူများနှင့် သိုးထိန်းများဖြစ်ရန် သင်ယူကြပြီး များစွာတို့မှာ အသင်းတော်တွင် တာဝန်များထမ်းဆောင်ရန် အရည်အချင်းပြည့်မီနိုင်ကြသည်။

အမေရိကန်ပြည်ထောင်စုတွင် လက်ဟန်ပြဘာသာစကားအသင်းတော် ၁၀၀ ကျော်နှင့် အုပ်စု ၈၀ ခန့်ရှိသည်။ ဘရာဇီးနိုင်ငံတွင် လက်ဟန်ပြဘာသာစကားအသင်းတော် ၃၀၀ ခန့်နှင့် အုပ်စု ၄၀၀ ကျော်ရှိသည်။ မက္ကဆီကိုနိုင်ငံတွင် လက်ဟန်ပြဘာသာစကားအသင်းတော် ၃၀၀ နီးပါးရှိသည်။ ရုရှားတွင် လက်ဟန်ပြဘာသာစကားအသင်းတော် ၃၀ ကျော်နှင့် အုပ်စု ၁၁၃ ခုရှိသည်။ ယင်းတို့သည် ကမ္ဘာတစ်ဝန်းတွင် ဖြစ်ပေါ်တိုးတက်နေမှုများထဲမှ ဥပမာအနည်းငယ်သာဖြစ်သည်။

ယေဟောဝါသက်သေများသည် လက်ဟန်ပြဘာသာစကားဖြင့် စည်းဝေးပွဲများနှင့် စည်းဝေးကြီးများကိုလည်း ကျင်းပကြသည်။ လွန်ခဲ့သောနှစ်တွင် လက်ဟန်ပြဘာသာစကားအမျိုးမျိုးဖြင့် ကမ္ဘာတစ်ဝန်းတွင် စည်းဝေးကြီး ၁၂၀ ကျော်ကျင်းပခဲ့ကြသည်။ ယင်းအဖြစ်အပျက်များက နားမကြားသူသက်သေခံတို့အား မိမိတို့သည် အချိန်တန်ဝိညာဉ်အစာမှ အကျိုးခံစားနေကြသော ကမ္ဘာချီခရစ်ယာန်ညီအစ်ကိုအသင်းအပင်းအဝင်ဖြစ်ကြောင်း တွေ့မြင်စေနိုင်ခဲ့သည်။

လီယိုနာ့ဒ်သည် နားမကြားသူဖြစ်ပြီး ယေဟောဝါသက်သေတစ်ဦးဖြစ်သည်မှာ ၂၅ နှစ်ကျော်ပြီဖြစ်သည်။ သူဤသို့ပြန်ပြောသည်– “ယေဟောဝါဟာ စစ်မှန်တဲ့ဘုရားသခင်ဖြစ်တယ်ဆိုတာကို ကျွန်တော်အမြဲသိတယ်။ ဒါပေမဲ့ ဆင်းရဲခက်ခဲမှုတွေကို ကိုယ်တော်ဘာကြောင့်ခွင့်ပြုသလဲဆိုတာကို ရှင်းရှင်းလင်းလင်း တစ်ခါမှနားမလည်ခဲ့ဘူး။ အဲဒီအချက်ကြောင့် တစ်ခါတလေ ဘုရားသခင်ကို ကျွန်တော်စိတ်ဆိုးခဲ့တယ်။ ဒါပေမဲ့ လက်ဟန်ပြဘာသာစကားခရိုင်စည်းဝေးကြီးတစ်ခုမှာ ကြားရတဲ့ဟောပြောချက်တစ်ခုကြောင့် နောက်ဆုံးမှာ ပါဝင်ပတ်သက်တဲ့အရေးကိစ္စကို ကျွန်တော်နားလည်သဘောပေါက်ခဲ့တယ်။ ဟောပြောချက်ပြီးတဲ့အခါမှာ ကျွန်တော့်ဇနီးက ကျွန်တော့်ကို တံတောင်ဆစ်နဲ့တို့ထိပြီး ‘ရှင်ကျေနပ်ရဲ့လား’ လို့မေးတယ်။ ကျေနပ်ပါတယ်လို့ ကျွန်တော်ရိုးရိုးသားသားပြောနိုင်တယ်။ ၂၅ နှစ်ကြာပြီးတဲ့နောက်၊ ကျွန်တော် ယေဟောဝါကို ဘယ်တုန်းကမှမစွန့်ခွာခဲ့တဲ့အတွက် ကျေးဇူးတင်တယ်။ ကိုယ်တော်ကို ကျွန်တော်အမြဲချစ်တယ်၊ ဒါပေမဲ့ ကိုယ်တော့်အကြောင်းကို ပြည့်ပြည့်ဝဝ ကျွန်တော်နားမလည်နိုင်ခဲ့ဘူး။ အခုတော့ ကျွန်တော်နားလည်နိုင်ပြီ။”

စိတ်နှလုံးပါပါ ကျေးဇူးတင်လေးမြတ်

နားမကြားသူများ ယေဟောဝါအကြောင်းသင်ယူခြင်းဖြင့် ကိုယ်တော့်မျက်နှာတော်ပေါ်က အဘယ် “ဖော်ပြချက်များ” ကို သူတို့မြင်တွေ့ကြသနည်း။ မေတ္တာ၊ သနားကြင်နာမှု၊ တရားမျှတမှု၊ တည်ကြည်မှု၊ ချစ်ခင်ကြင်နာမှုနှင့် နောက်ထပ်အရာများစွာမြင်တွေ့ရသည်။

အပြည်ပြည်ဆိုင်ရာနားမကြားသူသက်သေခံတို့သည် ယေဟောဝါ၏မျက်နှာတော်ကို မြင်တွေ့နေကြပြီး ပို၍ရှင်းလင်းစွာပင် ဆက်မြင်တွေ့ကြရလိမ့်မည်။ နားမကြားသူတို့ကို စိတ်နှလုံးမှချစ်မြတ်နိုးသော ‘ယေဟောဝါသည် သူတို့၌မျက်နှာတော်အလင်းကို လွှတ်တော်မူသည်။’ (တော. ၆:၂၅) ယင်းနားမကြားသူတို့သည် ယေဟောဝါကို သိလာကြသည့်အတွက် အလွန်ကျေးဇူးတင်လေးမြတ်ကြပါသည်!

[စာမျက်နှာ ၂၄၊ ၂၅ ပါ ရုပ်ပုံ]

ကမ္ဘာတစ်ဝန်းတွင် လက်ဟန်ပြဘာသာစကားပြော အသင်းတော် ၁,၁၀၀ ကျော်ရှိ

[စာမျက်နှာ ၂၆ ပါ ရုပ်ပုံ]

နားမကြားသူတို့နယ်ပယ်တွင် ယေဟောဝါ၏မျက်နှာတော်အလင်း တောက်ပစွာထွန်းလင်း