Il-Bibbja X’Tgħid Dwar il-Pandemiji?
It-tweġiba tal-Bibbja
Il-Bibbja bassret li matul l-aħħar jiem kien se jkun hemm mard li jittieħed, inkluż il-pandemiji. (Luqa 21:11) Pandemiji bħal dawn mhumiex kastig mingħand Alla. Fil-fatt, permezz tas-Saltna tiegħu, Alla dalwaqt se jġib fi tmiem il-problemi taʼ saħħa kollha, inkluż il-pandemiji.
Il-Bibbja bassret li kien se jkun hemm pandemiji?
Il-Bibbja ma tbassarx pandemiji jew mard speċifiku, bħall-COVID-19, l-AIDS, jew l-influwenza Spanjola. Però tbassar “mard li jittieħed” u “mard li jġib il-mewt.” (Luqa 21:11; Rivelazzjoni 6:8) Dawn il-ġrajjiet jagħmlu parti mis-sinjal tal-“aħħar jiem,” magħrufin ukoll bħala l-“konklużjoni tas-sistema.”—2 Timotju 3:1; Mattew 24:3.
Alla ġieli kkastiga lin-nies bil-mard?
Fil-Bibbja nsibu xi ftit rakkonti fejn Alla uża l-mard biex jikkastiga lin-nies. Pereżempju, hu ġiegħel li xi individwi jkollhom il-ġdiem. (Numri 12:1-16; 2 Slaten 5:20-27; 2 Kronaki 26:16-21) Madankollu, dawn l-inċidenti iżolati ma xterdux fuq nies innoċenti. Pjuttost, ġrajjiet bħal dawn kienu ġudizzji speċifiċi fuq individwi li b’mod ċar kienu rribellaw kontra Alla.
Il-pandemiji tal-lum huma kastig mingħand Alla?
Le. Xi nies jemmnu li Alla qed juża l-pandemiji u mard ieħor biex jikkastiga lin-nies illum. Però, dan mhux appoġġat mill-Bibbja. Għala le?
L-ewwel nett, xi qaddejja t’Alla, kemm tal-passat u kemm tal-preżent, mardu. Pereżempju, ir-raġel leali Timotju spiss marad. (1 Timotju 5:23) Imma l-Bibbja ma tgħidx li dan kien għaliex Timotju m’għoġobx lil Alla. Bl-istess mod illum, xi qaddejja leali t’Alla jimirdu. Ħafna drabi, dawn l-individwi sempliċement kienu fil-post ħażin fil-ħin ħażin.—Ekkleżjasti 9:11.
Iżjed minn hekk, il-Bibbja tgħallem li għadu ma wasalx iż-żmien għal Alla biex jikkastiga lill-ħżiena. Minflok, aħna qed ngħixu “f’jum taʼ salvazzjoni”—jiġifieri, fi żmien meta Alla qed jistieden lill-bnedmin kollha biex jersqu lejh u jsalvaw. (2 Korintin 6:2) Mod wieħed kif qed jistieden lin-nies hu permezz taʼ xogħol taʼ ppritkar mad-dinja kollha b’messaġġ pożittiv—“l-aħbar tajba tas-saltna.”—Mattew 24:14.
Qatt se neħilsu mill-pandemiji?
Iva. Il-Bibbja tbassar żmien fil-futur qrib meta ħadd ma jkun marid. Taħt is-Saltna tiegħu, Alla se jfejjaq il-problemi kollha taʼ saħħa. (Isaija 33:24; 35:5, 6) Se jneħħi t-tbatija, l-uġigħ, u l-mewt. (Rivelazzjoni 21:4) U se jerġaʼ jagħti lura l-ħajja lil dawk li mietu biex hekk ikunu jistgħu jgawdu saħħa tajba fuq l-art f’kundizzjonijiet perfetti.—Salm 37:29; Atti 24:15.
Versi mill-Bibbja dwar il-mard
Mattew 4:23: “[Ġesù] mar idur il-Galilija kollha, jgħallem fis-sinagogi tagħhom u jippriedka l-aħbar tajba tas-saltna u jfejjaq kull xorta taʼ mard u kull xorta taʼ nuqqas taʼ saħħa fost in-nies.”
Xi Jfisser: Il-mirakli taʼ Ġesù wrew fuq skala żgħira dak li s-Saltna t’Alla se tagħmel dalwaqt għall-bnedmin kollha.
Luqa 21:11: “Ikun hemm mard li jittieħed.”
Xi Jfisser: Il-problemi taʼ saħħa madwar id-dinja kollha huma parti mis-sinjal tal-aħħar jiem.
Rivelazzjoni 6:8: “Ara, żiemel aħdar safrani; u dak li kien riekeb fuqu kien jismu Mewt. U l-Qabar kien ġej eżatt warajh. U ngħatatilhom l-awtorità . . . biex joqtlu . . . b’mard li jġib il-mewt.”
Xi Jfisser: Il-profezija dwar l-erbaʼ rikkieba taż-żwiemel tal-Apokalissi tindika li fi żmienna kien se jkun hemm il-pandemiji.
Tistaʼ Tara Wkoll
IT-TORRI TAL-GĦASSA
It-tbatija—Hi kastig mingħand Alla?
Qed juża Alla l-mard jew it-traġedji biex jikkastiga lin-nies għal dnubiethom?
ESSENTIAL BIBLE TEACHINGS
Alla għala jippermetti t-tbatija?
Il-Bibbja tipprovdi tweġiba taʼ sodisfazzjon u faraġ.
IT-TORRI TAL-GĦASSA
Meta Se Jiġi l-Aħħar tad-Dinja? Ġesù X’Qal?
Tistaʼ tara l-affarijiet li Ġesù qal li se jiġru?
MISTOQSIJIET DWAR IL-BIBBJA MWEĠBIN
X’Inhu s-Sinjal tal-“Aħħar Jiem,” jew “Żmien it-Tmiem”?
Il-Bibbja qalet li kienu se jiġru affarijiet li juruna li qed ngħixu fl-aħħar jiem.
MISTOQSIJIET DWAR IL-BIBBJA MWEĠBIN
Is-Saltna t’Alla X’Se Twettaq?
Tgħallem x’tistaʼ tistenna meta l-gvern t’Alla jaħkem għal fuq l-art.
