LEZZJONI 60
Saltna li se tibqaʼ għal dejjem
Darba waħda billejl, is-Sultan Nebukadnessar ħolom ħolma stramba. Tant inkwetatu li ma setax jorqod. Għalhekk, hu sejjaħ quddiemu lil dawk li jipprattikaw il-maġija u qalilhom: ‘Spjegawli l-ħolma.’ Huma qalulu: ‘Għidilna xi ħlomt, O sultan.’ Imma Nebukadnessar qalilhom: ‘Le! Intom tridu tgħiduli xi ħlomt, inkella noqtolkom.’ Għal darba oħra wiġbuh: ‘L-ewwel trid tgħidilna xi ħlomt, imbagħad inkunu nistgħu ngħidulek xi tfisser.’ Hu qalilhom: ‘Intom kollha qed tipprovaw tqarrqu bija. Għiduli xi ħlomt!’ Huma qalu lis-sultan: ‘Dak li qed titlob mhux possibbli għax ma jeżisti ħadd li jistaʼ jagħmel dan.’
Nebukadnessar tant irrabja li ordna li jinqatlu l-irġiel għorrief kollha tal-pajjiż. Dan kien ifisser li anki Danjel, Sidrak, Mesak, u Għabednego kienu se jiġu maqtulin. Danjel staqsa lis-sultan biex itih ftit taż-żmien. Imbagħad, hu u t-tlett iħbieb tiegħu talbu lil Ġeħova għall-għajnuna. Ġeħova x’għamel?
Permezz taʼ viżjoni, Ġeħova wera lil Danjel il-ħolma li kellu Nebukadnessar u spjegalu xi tfisser. L-għada, Danjel mar għand il-qaddej tas-sultan u qallu: ‘Toqtol lil ħadd mill-irġiel għorrief. Jien nistaʼ nispjega l-ħolma li kellu s-sultan.’ Il-qaddej ħa lil Danjel quddiem Nebukadnessar. Danjel qal lis-sultan: ‘Alla wriek il-futur. Din hi l-ħolma tiegħek: Int rajt xbieha kbira ħafna, b’rasha tad-deheb, sidirha u dirgħajha tal-fidda, żaqqha u koxxtejha tar-ram aħmar, riġlejha tal-ħadid, u saqajha kienu tal-ħadid u tat-tafal imħalltin flimkien. Imbagħad, ġebla nqatgħet minn muntanja, u laqtet is-saqajn tax-xbieha. Ix-xbieha tfarrket u saret trab li tar mar-riħ. Imbagħad, il-ġebla saret muntanja kbira u mliet l-art kollha.’
Danjel imbagħad qal: ‘Dan hu dak li tfisser il-ħolma tiegħek: Is-saltna tiegħek hi r-ras tad-deheb. Il-fidda hija saltna li se tiġi warajk. Imbagħad, ħa jkun hemm waħda bħar-ram aħmar li se taħkem fuq l-art kollha. Is-saltna li tiġi warajha se tkun b’saħħitha daqs il-ħadid. Fl-aħħar, se jkun hemm saltna maqsuma li partijiet minnha se jkunu b’saħħithom daqs il-ħadid u partijiet minnha se jkunu dgħajfin bħat-tafal. Il-ġebla li se ssir muntanja hi s-Saltna t’Alla. Din se tfarrak dawn is-saltniet kollha u se tibqaʼ għal dejjem.’
Xħin semaʼ dan, Nebukadnessar niżel għarkopptejh b’wiċċu lejn l-art quddiem Danjel. Hu qal: ‘Alla tiegħek spjega din il-ħolma lilek. M’hemmx Alla ieħor bħalu.’ Imbagħad, minflok ma qatel lil Danjel, Nebukadnessar poġġieh kap fuq l-irġiel għorrief kollha u mexxej f’Babilonja. Qed tara b’liema mod Ġeħova wieġeb it-talba taʼ Danjel?
‘Ġabruhom flimkien lejn il-post li . . . jissejjaħ Armageddon.’—Rivelazzjoni 16:16