Proverbji 10:1-32
10 Il-proverbji taʼ Salamun.
Iben għaref iferraħ lil missieru,Imma iben iblah inikket lil ommu.
2 Il-ġid li jinkiseb bid-diżonestà ma jkunx taʼ benefiċċju,Imma li wieħed jagħmel dak li hu tajjeb jeħilsu mill-mewt.
3 Ġeħova ma jħallix lil min hu ġust* ibati l-ġuħ,Imma lill-ħżiena ma jagħtihomx dak li jixtiequ.
4 L-għażżien isir fqir,Imma min jaħdem iebes isir sinjur.
5 It-tifel li jaħsad fis-sajf jaġixxi b’mod intelliġenti,Imma t-tifel li jorqod fil-fond matul żmien il-ħsad iġib diżunur fuqu nnifsu.
6 Il-ġust se jirċievi l-barkiet,Imma l-ħażin jaħbi l-intenzjonijiet vjolenti meta jitkellem.
7 Il-ġust se jiġi mfakkar u mbierek,Imma isem il-ħażin se jitħassar.
8 Persuna għarfa taċċetta l-pariri,*Imma min jitkellem bla sens se jbati.
9 Min hu onest se jgħix fis-sigurtà,Imma min hu diżonest se jinqabad.
10 Min jegħmeż bil-moħbi jġib l-uġigħ,U min jitkellem bla sens se jbati.
11 Il-kliem tal-ġust iġib il-ħajja,Imma l-ħażin jaħbi l-pjanijiet tiegħu biex iweġġaʼ lil oħrajn.
12 Il-mibegħda taqlaʼ l-ġlied,Imma l-imħabba tgħatti n-nuqqasijiet kollha.
13 Min jaf jagħraf it-tajjeb u l-ħażin jitkellem bl-għerf,Imma min jitkellem bla sens jiġi kkastigat bil-bastun.
14 Dawk li huma għorrief japprezzaw* l-għarfien,Imma dak li jgħid l-iblah iwassal għall-qerda.
15 Il-ġid* tas-sinjur hu bħal belt iffortifikata.
Il-foqra jbatu għax m’għandhom xejn.
16 Ix-xogħol tal-ġust iwassal għall-ħajja;Imma l-qligħ tal-ħażin iwassal għad-dnub.
17 Min jagħti kas id-dixxiplina hu triq tal-ħajja għal oħrajn,*Imma min jinjora l-korrezzjoni jwassal lil oħrajn fit-triq il-ħażina.
18 Min jaħbi l-mibegħda tiegħu jigdeb,U min ixerred qlajjaʼ* hu stupidu.
19 Min jitkellem ħafna żgur li jiżbalja,Imma min jikkontrolla dak li jgħid jaġixxi bil-għaqal.
20 Dak li jgħid il-ġust qisu l-aqwa fidda,Imma l-ħsibijiet* tal-ħażin ma jiswew għal xejn.
21 Il-kliem tal-ġust se jgħin* lil ħafna nies,Imma l-iblah imut għax m’għandux sens.
22 Hi l-barka taʼ Ġeħova li tagħmel wieħed sinjur,U l-barkiet tiegħu ma jġibux uġigħ.*
23 L-istupidu jieħu pjaċir jagħmel affarijiet tal-mistħija,Imma l-għerf hu għal min jaf jagħraf it-tajjeb u l-ħażin.
24 Dak li jibżaʼ minnu l-ħażin se jiġi fuqu;Imma l-ġust se jingħata dak li jixtieq.
25 Meta tgħaddi l-maltempata, il-ħażin se jispiċċa;Imma l-ġust hu bħal pedament li jibqaʼ għal dejjem.
26 Bħalma l-ħall idejjaq is-snien u d-duħħan l-għajnejn,L-għażżien idejjaq lill-imgħallem tiegħu.*
27 Min jirrispetta ħafna lil* Ġeħova se jkollu ħajja twila,Imma l-ħżiena se jmutu qabel iż-żmien.
28 L-istennija* tal-ġusti ġġib il-ferħ,Imma t-tama tal-ħżiena tispiċċa fix-xejn.
29 Kulma jagħmel* Ġeħova hu biex jipproteġi lin-nies bla ħtija,Imma hu jeqred lill-ħżiena.
30 Il-ġust qatt ma jitfixkel,Imma l-ħażin ma jibqax jgħix fuq l-art.
31 Il-kliem tal-ġust hu mimli għerf,Imma min jgħid affarijiet mhux veri se jiġi msikket għal dejjem.
32 Il-ġust jgħid dak li hu xieraq,Imma l-ħażin jitkellem bil-qerq.
Noti taʼ taħt
^ Jew “ir-ruħ tal-ġust.”
^ Letteralment “il-kmandamenti.”
^ Jew “jaħżnu.”
^ Jew “L-affarijiet taʼ valur.”
^ Jew forsi “hu jkun fit-triq tal-ħajja.”
^ Jew “rapport ħażin.”
^ Letteralment “il-qalb.”
^ Jew “jiggwida.”
^ Jew “dwejjaq; tbatija.”
^ Letteralment “lil min jibagħtu.”
^ Letteralment “jibżaʼ minn.”
^ Jew “It-tama.”
^ Letteralment “It-triq taʼ.”