SEBRÃ GOM-ZUG SÕSGÃ | Y SẼN TÕE N BOOG Y YƖƖRÃ TO-TO
Nebã maanda yɩɩr zĩig zãnga!
“Mam kẽnga butikẽ n na n da teedo, la yɩɩ biskui bal la m yã-yã. Rẽ me, ligdã rʋga wʋsgo, tɩ pa tõe n ta ye. Vẽkembeoogã, baa fʋɩ ra pa le tõe n paam butigsẽ wã meng ye.”—A Poll sẽn be Zimbabwe.
“Mam sɩdã boola maam n zĩnigi, n yeel tɩ yẽ na n basa maam ne d kambã, n tɩ vɩɩmd ne pag a to. Woto sãama m sũur wʋsgo, tɩ m da sokd m meng m sẽn na n maanega. M maanda wãn ne m kambã?”—A Zanet sẽn be Etazĩni.
“A wuu sẽn kelmã, mam bãngame tɩ m segd n zoe n baoo soondg zĩigã. M sẽn kẽ wã, m gãanda tẽnga, tɩ bõmb-rãmbã lʋɩt yɩngã n pusdẽ. Maana lɛɛr-dãmb tɩ mam nusã ket n digda.”—A Alona sẽn be Israyɛll.
Tõnd vɩɩ “tood” wakate, tɩ bũmb wʋsg wat ne yɩɩre. (2 Tɩmote 3:1) Neb kẽer tara ligd zu-loeese, tɩ sãnda yaa b kãadem n kao. Zabã, bã-kɛgemsã la sabab-wẽnsã me wata ne zu-loeese. La pa rẽ bal ye. Tõe tɩ nina yãa kagf a yĩngẽ wã, n yɛɛsd sã n pa na n wa lebg kãnsɛɛre. Kom-kãsems kẽer me tagsda b yagensã yelle, m maand yɩɩr b vɩɩmã sẽn na n wa yɩ to-to.
La pa yɩɩr fãa n yaa wẽng ye. Wala makre, d sã n kẽng logtor-yir n tɩ maan ɛgzame n gũud logtorã sẽn na n yɛɛlga, d tõe n maanda yɩɩr bilfu. Tõe n yɩɩ woto me d sã n wa segd n gom neb taoore, wall d sã n baood tʋʋmde, tɩ tʋʋmdã taoor soab bool-d n dat n sõs ne-do, n bãng a sã n na n dɩk-d lame. Wakat ninga, rabeem pʋd n tõe n kɩtame tɩ d gil yelle. La d yɩɩrã sã n loog noore, wall a sã n kaoos ne-do, tõe n waa ne yelle. Sẽn nan pa kaoose, logtoɛɛmb n vaees n mik tɩ ned sã n maand yɩɩr wakat fãa, tõe n kʋʋga a yõore. Yɩɩ neb 68000 la zak la b tik n maan vaeesgã. Rẽnd a Zeezi bee bʋʋm. Bala, a soka woto: “Yãmb ned a bõe n tõe n paas a vɩɩmã woglem kãntɩɩg a yembr tãa a sẽn maand yɩɩr yĩnga?” Yɩɩr sɩd pa paasd ned vɩɩm woglem ye. Yaa rẽ la a Zeezi sẽn yeel tɩ d ‘ra maan yɩɩrã.’ (Matye 6:25, 27) La ned tõeeme n da maan yɩɩr sɩda?
N-ye! La a segd n talla yam, n bɩɩs tẽeb hakɩɩka, la a kɩs sɩd tɩ manegr n wate. Baa d sã n nan pa tar zu-loe-kɛgenga, tõe n wa waame. Woto wã, bɩ d ges bõn-kãensã sẽn sõng a Poll ne a Zanet la a Alona to-to tɩ b boog b yɩɩrã.
