Yɩ-y ned sẽn mi beoogo
A 3 soabã:
Yɩ-y ned sẽn mi beoogo
BÕE LA BIIBLÃ YETA? “Bɩ y pʋʋs Wẽnnaam bark bũmb fãa yĩnga.”—1 Tesalonik rãmba 5:18.
BÕE N KƖT TƖ PA NANA? D vɩya neb sẽn yaa wuk-m-mens rãmb la zɩ-beoog rãmb sʋka, tɩ d sã n pa gũus bɩ d tõe n wa wõneg-ba. (2 Tɩmote 3:1, 2) Sẽn paase, d zɩɩbã zoe n yaa wʋsgo, la ne rẽ fãa, d tõe n wa ratame n bao tʋʋm a taab n paase. Yɛlã tõe n wa looga d nugu, wall d tõe n wa rɩkda d sẽkã fãa n tʋmd n baood d mengã nafre, n pa nand d sẽn zoe n tarẽ wã, bɩ n pa wilgd d taabã d mi-beoog bũmb nins b sẽn maand n kõt-dã yĩng ye.
BÕE LA Y SEGD N MAANE? Rɩkd-y sẽk n bʋgsd bõn-sõma nins y sẽn zoe n tarẽ wã zugu. Yaa sɩd tɩ y tõe n wa tagsdame tɩ y yɛlã yɩɩda y nugu. Sã n yaa rẽ bɩ y tẽeg rĩm a Davɩɩd yelle. A sũurã ra mi n sãamame hal t’a raoodã sa. La ne rẽ fãa, a pʋʋsa Wẽnnaam n yeel woto: “Mam tẽegda . . . yãmb tʋʋmã fãa yelle, la m tagsd yãmb nus-tʋʋmã yelle.” (Yɩɩl Sõamyã 143:3-5) A Davɩɩd zu-loeesã fãa pʋgẽ, a ra ket n pẽgda Wẽnnaam, la a maand sũ-noogo.
Tags-y bũmb nins y taabã sẽn maan n sõng yãmbã yelle, la y wilg-b y mi-beoogo. Rẽ wɛɛngẽ a Zezi kõo mak-sõng sẽn ka to. Wala makre, a zoa a Maari ra wa n dɩka kaam ligd sẽn yaa toog n pʋdg a zugã la nao wã. La neb nins sẽn zĩnd be wã kẽer soka woto: “Yaa bõe tɩ b sãam tɩdar kaamã?” * Wɩtbã yeelame tɩ b ra tõe n koosa kaamã n dɩk ligdã n sõng naong rãmba. La a Zezi leok-b-la woto: “Bas-y-yã-a laafɩ. Yaa bõe tɩ yãmb namsd-a?” Rẽ poore, a paasa woto: “A maana a sẽn tõe.” (Mark 14:3-8; Zã 12:3) A Zezi pa sãam a sũur pagã sẽn maan woto wã yĩng ye. A pʋd n pẽg-a-la rẽ yĩnga.
Yaa neb kẽer ned sẽn wat n maan kaalem, pa rẽ bɩ bãmb ne b zoa zood sẽn wat n sãam zugẽ, wall b sẽn wat n bõn bark a taab b sẽn da tar la b yaoond n bãng b yõodã. Y sã n dat n gil sũ-sãams a woto buudu, segdame tɩ y tagsd bõn-sõma nins y sẽn zoe n tarẽ wã yelle. Ning-y bũmb nins fãa y sẽn tar tɩ kɩt tɩ y pẽgd Wẽnnaamã y yamẽ, wall y gʋls n bĩngi.
“Kũun-sõng fãa” sẽn yit Wẽnnaam nengẽ wã yĩnga, yɩta sõma tɩ d pʋʋsd-a bark n wilgd-a d mi-beoogo. (Zak 1:17, Kãab-paalgã Koe-noogo) D sã n maand woto wakat fãa, na n sõng-d lame tɩ d yɩ neb sẽn mi beoogo, la d noogd d sũur ne d sẽn tarã.—Filip rãmba 4:6, 7.
[Tẽngr note]
^ sull 6 Pipi kiris-nebã wakatẽ, ned sã n da reeg a to sãando, a pʋdgda kaam a soabã zug n wilg t’a reeg-a-la ne a sũur fãa. Ned sã n pʋdg kaam sãan nao zugu, a wilgdame t’a sikda a meng a taoore.
[Picture on page 6]
Yãmb wilgda y taabã y mi-beoog bũmb nins b sẽn maand n kõt-yã yĩng bɩ?