M roagdbã kaoo b kãadmã: M manesem tog yɩɩ wãna?
Fo sẽn tõe n maane
Kɩt tɩ b bãng f sũ-sãangã. Togs f roagdbã tɩ yellã namsda foo wʋsgo, la tɩ f pa mi f sẽn maand ye. Tõe tɩ rẽ kɩt tɩ b togs foo bũmb ning sẽn be, tɩ boog f sũ-sãangã.
Sã n mikame tɩ f roagdbã pa tõe n sõng foo, gom ne ned f sẽn kɩs sɩd ne.—Yel-bũnã 17:17.
La sẽn yɩɩda, f tõe n goma ne f saasẽ Ba wã, bala a ‘kelgda pʋʋsgo.’ (Yɩɩn-sõamyã 65:3) Pelg f pʋg n togs-a fãa, bala ‘a geta fo yelle.’—1 Pɩyɛɛr 5:7.
Fo sẽn pa tog n maane
F roagdb sã n kao b kãadem, yaa wa f nug sẽn kao. Zabdame, la na n wa maagame
Ra tall sũ-kẽk ne-b ye. A Daniel roagdbã basa taaba, rẽ t’a tara yʋʋm a yopoe. Ad a sẽn yeele: “Yaa bãmb mensã yell n da pak-ba. B pa tags tõnd yelle, b tags b yam-yãkrã sẽn da na n kɩt tɩ tõnd nams to-to wã me ye.”
A Daniel sã n pa sik a sũur la a bas sũ-kẽkã, na n baasa wãna? (Karem Yel-bũn 29:22.)
Ra tall yel-manesem sẽn na n wẽneg n wã foo ye. A Denny yeelame: “M roagdbã sẽn kao b kãadmã poore, m sũurã sãama hal wʋsg tɩ m da lebg wa nimbãan-neda. M wa n sɩng n paamda zu-loees lekollẽ wã, tɩ kɩt tɩ m pa long roog ye. Rẽ poore, m da baooda zab ne nebã fãa. Karen-saambã sã n wa, m da pa zĩ sɩɩ baa-baa.”
Sã n yaa ne foo, bõe la a Denny ra rata?
Wãn to la Galat-rãmb 6:7 goamã tõe n sõng a Denny la kom-bɩɩs a taab tɩ b ra tall manesem sẽn na n wẽneg n wã b mensã?
Yaa sɩd tɩ bi-bɩɩg roagdb sã n kao b kãadem tɩ sãam a sũur wʋsgo, kaoosdame tɩ sũ-sãangã ketẽ. La bilf-bilfu, a sã n wa tõog n mao ne sũ-sãangã, a vɩɩmã na n le wa talla yamleoogo.
